Ezekiela

14 Ame hna traqa la itre xaa qatre ne Isaraela troa lapa qëmekeng. 2 Nge hnei Iehova hna ithanata koi ni me hape: 3 “Nekö i atr, xecie hnyawa ha koi angatre la, troa nyihluene la itre idrola ka sis* i angatr. Hnei angatr hna amë qëmeken la nöj la nyine akein kowe la ngazo. Matre hapeu, tro kö ni a nue angatr troa hnyinge koi ni? 4 Haawe, tro jë troa qaja koi angatr ka hape: ‘Hane hi la hna qaja hnei Iehova Joxu Ka Sisitria: “Maine xecie hë kowe la ketre atre Isaraela troa nyihluene la itre idrola ka sis i angeic, me amë qëmeken la itre atr la nyine akein, nge e tro angeic a tro troa hnying kowe la itre perofeta, tro hë ni Iehova a sa koi angeic pine la etrune la itre idrola ka sis i angeic. 5 Ke eje hi, tro ni a atiqane la hni ne la angetre Isaraela* hnei xou atraqatr, pine angatre trotriji ni troa nyihluene la itre idrola ka sis.”’

6 “Celë hi matre, qaja jë kowe la nöje Isaraela ka hape: ‘Hane hi la hna qaja hnei Iehova Joxu Ka Sisitria: “Bëeke hmaca jë, nge nuetrije pi la itre idrola i epun ka sis, nge the kuca hmaca kö la itre huliwa i epun hna methinën. 7 Ke maine tro la atre Isaraela maine ketre trenyiwa ka lapa e Isaraela a trotriji ni, nge maine ka xecie hnyawa koi angeic troa nyihluene la itre idrola ka sis, me amë qëmeken la itre atr la ewekë nyine akein, nge e tro angeic e thupen a tro troa hnying kowe la perofetang, tro hë ni Iehova a sipu sa koi angeic. 8 Tro ni a amekötin la atr cili, me xomi angeic matre tulu nyine hmekëne la itre xan, nge tro hë la itre atr a qeje angeic ngöne la kola edromë. Tro fe ni a hane apatrenyi angeic qa ngöne la nöjeng, nge tro hë epuni a atre laka, Iehova ni.”’

9 “‘Ngo maine troa iaöne la perofeta nge tro angeic a sa, kolo lai a hape, eni Iehova la ka amenune la perofeta cili. Tro hë ni a xejë la imeng matre lepi angeic, me apatrenyi angeic qa ngöne la nöjeng Isaraela. 10 Tro hë angatr a xeni pune la aqane huliwa menu i angatr. Nyidroti hi la atrekë zön, ene la atre hnying memine la perofeta, 11 matre tha tro hmaca kö la nöje Isaraela a tro ananyi ni, me pui ngazo hnene la itre tria i angatr. Tro hë angatr a nöjeng nge tro ni a Akötresi angatr,’ öni Iehova Joxu Ka Sisitria.”

12 Hnei Iehova hmaca hna ewekë koi ni me hape: 13 “Nekö i atr, maine tro la ketre nöj a kuca la ngazo qëmekeng ngöne la angatr a tha mele nyipici, tro hë ni a xejë la imeng troa lepi angatr: tro ni a apatren asë la itre kemeji* i angatr, me upe la jiin koi angatr, me apatrene la itre atr me itre öni ka mel e cili.” 14 “‘Ngacama tro ju hë Noa, me Daniela, me Iobu a mele ngöne la nöje cili, ngo tro hi angatr a amele angatre kö hnene la thiina i angatr ka meköt,’ öni Iehova Joxu Ka Sisitria.”

15 “‘Nge pane mekune jë laka, tro ni a upe la itre öni ka ihej troa trongëne la nöj, nge tro angatr a humuth asë la itre atren* matre hnapapa ju pe hi, nge pëhë ka troa cili thenge. 16 Maine nyipici laka, ka mele ni,’ öni Iehova Joxu Ka Sisitria, ‘ngacama tro ju hë la köni trahmanyi cili a mele ngöne la nöj, ngo tha tro jë kö angatr a amelene la itre nekö i angatr trahmanyi me jajiny; tro hi angatr a sipu amele angatre kö, nge tro pë hë la nöj a lapa pë atren.’”

17 “‘Maine pena, pane mekune jë laka, tro ni a axulune la taua kowe la nöje ce me hape: “Tro la taua a trongëne la nöj,” me humuth la itre atr me itre öni ka mel e cili, 18 maine nyipici laka, ka mele ni,’ öni Iehova Joxu Ka Sisitria, ‘ngacama tro ju hë la köni trahmanyi cili a mele ngöne la nöj, ngo tha tro jë kö angatr a amelene la itre nekö i angatr trahmanyi me jajiny; tro hi angatr a sipu amele angatre kö.’”

19 “‘Maine pena, pane mekune jë laka, tro ni a axulune la mec ka ixötrekeu me nenge la trengehning kowe la nöj, matre humuthe la ka ala nyim, me apatrene la itre atr me itre öni ka mel e cili, 20 ngacama tro ju hë Noa, me Daniela, me Iobu a mel ngöne la nöj, ngo eni a sisiny ngöne la meleng,’ öni Iehova Joxu Ka Sisitria, ‘tha tro jë kö angatr a amelene la itre nekö i angatre trahmanyi me jajiny; tro hi angatr a sipu amele angatre kö hnene la thiina i angatr ka meköt.’”

21 “Ke hane hi la hna qaja hnei Iehova Joxu Ka Sisitria: ‘Celë hi ka troa traqa e tro ni a upe la 4 lao akötr* koi Ierusalema (ene la taua, me jiin, me itre öni ka ihej, me meci ka ixötrekeu), matre apatrene la itre atr me itre öni ka mel e cili. 22 Ngo tro pe kö a mel hnene la itre xaa nekön, trahmanyi me jajiny, nge tro ha xomi angatre qa lai. Mai angatre hë lai, nge e öhne hë epun la aqane ujë i angatr me itre huliwa i angatr, ke tro ha aupunyi epun qa ngöne la akötr hnenge hna axulune koi Ierusalema, eje hi, qa ngöne la nöjei akötr hnenge hna axulun koi angeic.’”

23 “‘E öhne hë epun la aqane ujë i angatr me itre huliwa i angatr, ke tro ha aupunyi epun, nge tro hë epuni a trotrohnin laka, tha eni kö lo a lepi epuni menu,’ öni Iehova Joxu Ka Sisitria.”