Salamo
Salamo i Dravita. Nyima nyine xötrei lö hnine la uma.
30 Iehova fe, tro ni a atrunyi nyipë, ke hnei nyipëti hna amejë ni;*
Tha hnei nyipëti kö hna nue la itre ithupëjiang troa hnyimasai ni.
2 Iehova Akötresinge fe, hnenge hna sipo ixatua koi nyipë, nge hnei nyipëti hna ameunyi* ni.
3 Iehova fe, hnei nyipëti hna amejë ni qa ngöne la Hua.*
Hnei nyipëti hna thupëne la meleng; me sewe ni troa kei kowe la hnaop.*
4 Nyima atrunyi* Iehova jë, epun itre ka mele nyipici koi nyidrë,
Nge atrune jë la ëje i nyidrëti ka hmitrötr;*
5 Ke koi hnepe ijine hi la troa xomihnine la elëhni i nyidrë,
Ngo ame la troa kepe* së hnei nyidrë, ke uti hë la tro sa mec.
Ngacama troa treij e hej, ngo e hmakany, tro ha sue madrin.
6 Ame lo eni a mele tingeting, öning:
“Tha tro pi kö ni a enienij.”*
7 Iehova fe, ame lo nyipëti a kepe ni, hnei nyipëti hna acatrenyi ni tune la ketre wetr.
Ngo ame hë lo nyipëti a xele ma wai ni, hna traqa koi ni la xou atraqatr.
8 Iehova fe, nyipëti hi lo hnenge hna hën;
Nge Iehova fe, hnenge pala hi hna sipo nyipë troa kepe ni.
9 Nemene la eloine la tro ni a mec* me uti kowe la hnaop?*
Tro kö la xaxau a atrunyi nyipë? Tro kö ej a qaja la aqane nyipici i nyipë?
10 Iehova fe, drenge ju nge kepe ni jë.
Iehova fe, pane amele ni jë.
11 Hnei nyipëti hna nyihnane la itre treijeng hnei fia;
Hnei nyipëti hna xometrije la bëek ka tru thenyin me heetrë ni hnene la madrin,
12 Matre tro ni* a nyima atrunyi nyipë nge tha tro kö ni a lapa thaup.
Iehova Akötresinge fe, tro hë ni a atrunyi nyipë epine palua.