Salamo
Thatraqane la atre jumi traem; nyine nyima ngöne “Lili.” Qaathei Dravita.
69 Akötresieti fe, amele ni jë, ke tro ha xome la meleng hnene la itre tim.
2 Lö hë ni ngöne la trëtr ka jui, nge pëkö hnë cile ngön.
Nunucile hë ni hnine la itre tim ka jui,
Nge kola huli ni hnene la itre thelec.
3 Kucakuca ha ni hna sue;
Xeti hë la nyinawang.
Genyi hë la luemekeng hna treqene la Akötresing.
4 Ala nyimu kö la itre ka methinë ni nge pëkö kepin
Hune la itre pene heng.
Tru catre hë la itre atr ka pi humuthi ni,
Ene la itre ithupëjiang ka ihnihni.*
Hnei angatr hna iele ni troa hamëne la itre ewekë tha hnenge kö hna atrekënö.
5 Akötresieti fe, atre kö nyipëti la triang,
Nge ame la ngazong, ke tha hna juetrëne kö koi nyipë.
6 Joxu Ka Sisitria fe, Iehova joxu ne la itre trongene isi,
Epi tha tro kö la itre ka mejiune koi nyipëti a hmahma pi ni.
Akötresi Isaraela fe,
Epi tha tro kö a thaipiëne la itre ka thele nyipë pi ni.
7 Eni a thue la hmahma pi nyipë;
Kola lapane la iqëmekeng hnei hmahma.
8 Thatre ni hë hnene la itre trejin me eni,
Nge trenyiwa ha ni kowe la itre nekö ne la thineng.
9 Kola mel e kuhu hning la ajang kowe la hnalapa i nyipë, kösë ketre eë,
Nge kola bëeke koi ni la trenge iqaqa ne la itre ka qaqa nyipë.
10 Hnenge hna aipië ni kö me tha xen,*
Celë hi matre kola qaqa ni.
11 Hnenge hna heetrëne la ibëek ka tru thenyin,
Matre hna methinë* ni pë hë hnei angatr.
12 Kola qeje ni hnene la itre atr ka lapa ngöne la qëhnelö ne la traon,
Nge kola sili nyima ni hnene la itre ka hmo hnei ka haitr.
13 Ngo Iehova fe, epi traqa pi koi nyipë la thithing,
Ngöne la ijin hnei nyipëti hna ajan.
Akötresieti fe, ngöne la ejuine la ihnimi nyipici i nyipë,
Sa jë koi ni jëne la itre huliwa ne iamele i nyipëti ka tha tria kö.
14 Huli ni jë qa ngöne la trëtr;
The nue ni kö troa lö.
Amele ni jë qaathene la itre ka methinë ni
Me qa ngöne la itre tim ka jui.
15 The nue kö la thelec troa huli ni,
Nge the nue kö la itre gaa jui troa ulumi ni,
Nge the nue kö la hnaop troa thinge la ulan ej hung.
16 Iehova fe, sa jë koi ni, ke ka lolo la ihnimi nyipici i nyipë.
Ngöne la trenge utipine i nyipë, pane xei jë koi ni,
17 Nge the nuetrije kö la hlue i nyipë.
Canga sa jë koi ni, ke eni a akötr.
18 Easenyi ni jë, nge amele ni jë;
Itöne hmaca jë la meleng pine la itre ithupëjia me eni.
19 Atre hi nyipë laka, kola qaqa ni, me ahmahmanyi ni, me thaipië ni.
Öhne hi nyipë la nöjei ithupëjiang asë.
20 Hace catre la hning ke hna qaqa ni, nge pëkö nyine ameune la eatreng.*
Eni lo a ajan troa utipi ni, ngo pëkö,
Nge eni lo a treqen la itretre aupun, ngo tha öhne kö ni.
21 Ngo hnei angatre pe hna thuange poizin,*
Nge ame lo eni a meci hnei pi ij, hnei angatr hna thue imeng vinega.
22 Haawe, loi e tro la laulau i angatr a ketre hnö koi angatr,
Nge tro la itre ewekë i angatr a nyi ifile koi angatr.
23 Loi e tro la luemeke i angatr a hajihaj matre tha tro kö angatr a öhne koilo,
Nge tro pala hi la itre gö i angatr a hmengöhmengön hnei nyipë.
24 Nenge pi hui angatr la trenge elëhni i nyipë,
Nge loi e tro la elëhni atraqatr i nyipëti a eatrë angatr.
25 Loi e troa hnapapa la hnë acili itate* i angatr;
Loi e troa pë atren la itre itate i angatr.
26 Ke angatr a wej la hnei nyipëti hna lep,
Nge tha mano kö angatr qaja la itre akötr hnei nyipëti hna axulun kowe la hnei nyipëti hna lep.
27 Haawe, nyixane jë la itre ngazo i angatr,
Nge the jele meköti angatre kö.
28 Köletriji angatre pi qa ngöne la tusi ne mel,
Nge the cinyianyine kö la itre ëje i angatr memine la itre ka meköt.
29 Ngo akötre catre ni me hleuhleu.
Akötresieti fe, epi amele ni pi hnei nyipë me thupë ni.
30 Pi tro ni a atrune la ëje i Akötresie jëne la itre nyima,
Nge pi tro ni a atrunyi nyidrë memine la itre ole.
31 Celë hi ka troa amadrinë Iehova hune la kau trahmany,
Lo neköi kau ka hetre jian me itine waca.
32 Tro la itre ka ipië a öhne lai me madrin.
Ame epun itre ka thele Akötresie, epi troa mele hmaca la itre hni i epun.
33 Ke Iehova a drenge la itre ka pë ewekë,
Nge tha tro kö nyidrëti a methinëne la nöje i nyidrë hna kötre fë.
34 Epi tro la hnengödrai me fen a atrunyi nyidrë,
Memine la itre hnagejë me itre ka mele ngön.
35 Ke tro Akötresieti a amele Ziona
Me xupe hmaca la itre traon ne Iudra,
Nge tro hë la nöje i nyidrëti a kapa la nöj me lapan ej.
36 Tro la itre matran ne la itre hlue i nyidrë a mele ngön,
Nge tro la itre ka hnime la ëje i nyidrë a lapan ej.