Salamo
Thithi Dravita.
86 Iehova fe, pane drenge ju,* nge sa jë koi ni,
Ke hleuhleu catre ni nge pëkö ewekëng.
2 Thupëne ju la meleng, ke eni a mele nyipici.
Amelene jë la hlue i nyipë, lo atre mejiun koi nyipë,
Ke nyipëti la Akötresing.
3 Iehova fe, epi kepe ni hnei nyipë,
Ke o drai, eni a hë nyipë.
4 Amadrinëne jë la hlue i nyipë,
Ke Iehova fe, eni a mejiun koi nyipë.
5 Ke ame nyipë Iehova fe, ka lolo nyipë nge nyipëti a treqen troa nue la ngazo;
Tru la ihnimi nyipici i nyipë kowe la itre ka hë nyipë.
6 Iehova fe, drenge ju la thithing;
Nge hnangenyëne ju la itre xëweng.
7 Eni a hë nyipë ngöne la ijin akötr,
Ke tro kö nyipëti a sa koi ni.
8 Pëkö haze ka tui nyipë Iehova fe,
Nge pëkö huliwa ka tune la itre huliwa i nyipë.
9 Tro ha traqa la nöjei nöj hnei nyipëti hna xup
Matre thil qëmekei nyipë, Iehova fe,
Nge tro hë angatr a atrune la ëje i nyipë.
10 Ke ka sisitria nyipë, nge nyine haine la itre huliwa i nyipë;
Nyipëti hmekuje hi la Akötresie ka cas.
11 Iehova fe, ini ni jë la jë i nyipë.
Tro hë ni a tro ngöne la nyipici i nyipë.
Apexejene pi* la hning matre tro ni a xouene la ëje i nyipë.
12 Iehova fe Akötresing, eni a atrunyi nyipë hnene la hning ka pexej,
Nge pi tro ni a atrune la ëje i nyipë uti hë epin,
13 Ke atraqatr la ihnimi nyipici i nyipëti koi ni,
Nge hnei nyipëti hna amele ni qa ngöne la itre gaa jui ne la Hua.*
14 Akötresieti fe, kola cile koi ni hnene la itre atr ka pi tru;
Kola thele troa xome la meleng hnene la itre ka pë utipin,
Nge tha angatre kö a wangatrunyi nyipë.*
15 Ngo ame nyipë Iehova fe, nyipëti la Akötresie ka utipin nge ka itrotrohni,
Ka hmitre troa elëhni, nge ka tru trenge ihnimi nyipici.
16 Ujë jë koi ni, nge kepe ni ju.
Hamëne pi la catre i nyipë kowe la hlue i nyipë,
Nge amelene jë la nekö ne la föe ka nyihlue i nyipë.
17 Amamai ni jë la ketre hatrene la thiina ka lolo* i nyipë,
Matre öhne jë me hmahma la itre ka methinë ni.
Ke nyipëti Iehova la atre xatua ni me aupunyi ni.