Angetre Amekötin
14 Ame hnei Samasona hna uti a tro Timenatha, me öhn e cili la ketre jajinyi ne Filisiti.* 2 Matre hnei angeic hna elë hmaca troa thuemacane la kem me thine i angeic me hape: “Hnenge hna öhn e Timenatha la ketre jajinyi ne Filisiti. Nge eni a ajane tro epon a thei nyën matre troa föeng.” 3 Ngo önine jë hi la kem me thine i angeic ka hape: “Pëkö föe hnei ö hna öhn ngöne la fami i ö maine ngöne la nöje së? Hnauëne pena la eö a thele föe thene la angetre Filisiti, ketre nöj hna tha xötrehatren?”* Ngo öni Samasona kowe la keme i angeic: “Tro jë pe troa sipon, ke xapoti hi la ajang.”* 4 Tha trotrohnine kö la kem me thine i angeic laka, mekuna i Iehova lai, ke nyidrëti* a thele jën troa lep la angetre Filisiti. Eje hi, ngöne la ijine cili, angetre Filisiti la ka mus kowe la angetre Isaraela.
5 Thupene lai, hnei Samasona hna uti a tro Timenatha memine la kem me thine i angeic. Nge ame hë la angeic a traqa kowe la hnënge vin e Timenatha, ke fetra pi hi la ketre liona* ka ho. 6 Ame hnene la ua i Iehova hna hamë trengecatre i Samasona. Matre hnei angeic hna tha zezen la liona hnene la lue iwanakoime i angeic, tune lo kola thë la neköi nani. Ngo tha qaja pi kö angeic kowe la kem me thine i angeic. 7 Thupene lai, hnei angeic hna uti a tro Timenatha troa ithanata memine lai jajiny. Ngo ka xecie pala hi koi Samasona laka, xapoti hi la aja i angeic.
8 Ame ngöne la ketre ijin, la angeic a bëeke hmaca troa theng la föi angeic, hnei angeic hna pane jea troa goeëne la itrapajun ne la liona. Traqa ju hi angeic a öhn la ume bii me miel e kuhu hnine la itrapajun ne la liona. 9 Ame hnei angeic hna jeköth la miel ngöne la lue ime i angeic, me iji trootro. Nge ame hë la angeic a ixelë memine la kem me thine i angeic, hnei angeic hna thue ime i nyidro. Ngo tha qaja pi kö angeice laka, hna xom qa hnine la itrapajun ne la liona.
10 Thupene lai, hnene la keme i angeic hna tro kowe la hnalapa ne lai jajiny. Nge hnei Samasona hna hnëkë xen atrun, ke celë hi hna majemine kuca hnene la itre nekö trahmanyi ekö. 11 Matre ame hë la kola öhnyi angeic, hnei angatr hna hëne la 30 lao nekö trahmanyi troa xötrethenge angeic. 12 Matre öni Samasona jë hi koi angatr: “Tro ni a qaja la ijelaxötra koi epun. Nge maine tro epuni a öhn me qejepengöne koi ni ngöne la 7 lao drai ne easë ce xen, haawe, tro hë ni a hamën koi epun la 30 lao iheetre lino, me 30 lao hnaheetr ka pexej. 13 Ngo maine thatreine kö epuni qejepengöne koi ni, epuni pë hë la ka troa hamë ni la 30 lao iheetre lino, me 30 lao hnaheetr ka pexej.” Matre öni angatr: “Nga qaja jë la ijelaxötra i ö, matre tro huni a dreng.” 14 Nge öni angeice jë hi:
“Hna xulu la xen qaathene la atre xen,
Memine la ewekë ka menyik qaathene la atr ka catr.”
Traqa jë kö koi köni drai ne thele angatr, ngo pëkö ala cas ka atreine qejepengön. 15 Matre ame hë ngöne la hna 4 ne drai, hnei angatr hna qaja kowe la föi Samasona ka hape: “Kuca jë la ketre ewekë, matre tro la föi ö a amamai hun la ijelaxötra, wanga tro huni a dreuthetriji ö, memine la fami ne la keme i ö. Ke hapeu, epuni kö a hë hun troa xome la itre ewekë hun?” 16 Ame hnene la föi Samasona hna treije qalëne la föi angeic me hape: “Kösë nyipëti a methinë ni, tha hnimi ni kö hnei nyipë, ke hnei nyipëti hna qaja la ijelaxötra kowe la itre trahmanyi ne la nöjeng, ngo tha hna pane qejepengöne pe koi ni.” Matre öni Samasona jë hi: “Dreng, hnauëne pena la tro ni a qaja koi nyipo, nge tha hane fe kö ni qejepengöne koi kaka me nenë?” 17 Ngo tha mano kö nyëne treije qalë angeic uti hë la hna 7 ne drai ne angatr a ce xen. Matre hnei Samasona e cili hna qejepengöne la ijelaxötra kowe la föi angeic, ke nyën pala hi a iele angeic. Ame hnei nyën hna canga tro troa qaja kowe la itre trahmanyi ne la nöje i nyën. 18 Matre ame hë la hna 7 ne drai qëmekene troa lö la jö,* hnene la itre trahmanyi ne la traon hna qaja koi Samasona ka hape:
“Nemene la ewekë ka hnyapa kö hune la miel,
Nge nemene la ka catre kö hune la liona?”
Nge sa jë hi angeic ka hape:
“Maine tha hnei epuni ju hna uja dro memine la neköi kaung,*
Tha tro jë kö epuni a öhn la ijelaxötra.”
19 E cili, hnene la ua i Iehova hna thue trengecatre i angeic. Ame hnei Samasona hna uti a tro Asekelona, me humuth la 30 lao trahmany, me thapa la hnaheetre i angatr, matre hamëne pena kowe la itre ka qejepengöne la ijelaxötra. Ngo ka elëhni pala hi Samasona la angeic a bëeke kowe la hnalapa ne la keme i angeic.
20 Matre hna hamëne pë hë la föi Samasona kowe la ketre nekö trahmanyi ka xötrethenge angeic lo ijine faipoipo.