Esodro

27 “Tro eö a cane la ita ne huuj hnei sinöe akasia. Tro ej a 5 kubit la eqean, nge 5 kubit* la eisaisan, nge tro hi a cas la eqeane la 4 lao götrane la ita ne huuj, nge tro ej a köni kubit la edraiën. 2 Tro eö a kuca la itre jian ngöne la 4 lao kona, nge tro itre ej a cas memine la ita ne huuj. Nge tro eö a heetrëne la ita ne huuj hnei kopa. 3 Nge tro eö a kuca la itre baketr nyine hleme la hnatresij, me itre pel, me itre kap, me itre ifok, me itre trepene eë.* Tro eö a kuca asë itre ej hnei kopa. 4 Tro eö a kuci ikalailai kowe la ita ne huuj, hna pewal kopa. Nge hune la hna pewal, tro eö a kuca la 4 lao otru kopa, ngöne la 4 lao kona. 5 Tro eö a amë la hna pewal fene la xötr ezin e nyipine la ita ne huuj. 6 Tro eö a kuca la itre tan hnei sinöe akasia, thatraqane la ita ne huuj, me heetrën itre ej hnei kopa. 7 Nge tro eö a aline la itre tan e hnine la itre otru, matre tro itre ej a lapa ngöne la lue götrane la ita ne huuj, e kola xututh. 8 Troa ceitu la ita ne huuj memine la ketre pua ka lai hnin, hna can hnei inehe. Troa kuca thenge lo hna amamane koi eö hune la wetr.

9 “Nge tro eö a kuca la götrane gaa pë ihakun ne la uma maano. Nge ame e cili, ngöne la götrane kolojë, troa amë la itre nyipi maano lino hna el, nge 100 lao kubit la eqean ej. 10 Nge troa hetrenyi e cili la 20 lao sine feni, me 20 lao trepene kopa hna kuj. Nge troa kuca hnei sileva la itre nyine jel, me itre otru. 11 Nge ketre tune kowe la götrane kolopi, tro la itre maano lino a 100 kubit la eqean. Nge tro fe a hetrenyi la 20 lao sine feni, me 20 lao trepene kopa hna kuj, me itre nyine jel me itre otru sileva, thatraqane la itre sine feni. 12 Nge ame ngöne la eisaisane lai götrane gaa pë ihakun qa kuë, troa hetrenyi la 50 lao kubit ne imaano lino, me 10 lao sine feni, me 10 lao trepene hna kuj. 13 Nge ame la eisaisane la götrane gaa pë ihakun qa koië, lo ka qëmeke kowe la hna fetra hnei jö, tro ej a 50 kubit la eisaisan. 14 Nge ame ngöne la ketre götran, troa hetrenyi la 15 kubit ne imaano lino, me köni sine feni, me köni trepene hna kuj. 15 Nge ame ngöne la ketre götran, troa hetrenyi la 15 kubit ne imaano lino, me köni sine feni, me köni trepene hna kuj.

16 Nge ngöne la hnë lö ne la götrane gaa pë ihakun, troa hetrenyi la ketre imaano ka 20 kubit la eqean, hna kuca hnei theny ka bulu, me drela ka madra, me theny ka madra palulu, me nyipi lino hna ce el, me 4 lao sine feni, me 4 lao trepene hna kuj. 17 Ame la nöjei sine feni ka cile kanothe la götrane gaa pë ihakun, tro itre ej a isa hetre otru, me itre nyine jel sileva. Ngo ame la itre trepen hna kuj, troa kuca hnei kopa. 18 Nge troa 100 kubit la eqeane la ihag ne la götrane gaa pë ihakun, nge 50 kubit la eisaisan, nge 5 kubit la edraiën. Nge troa can hnei nyipi maano lino hna el, nge tro ej a hetre trepene kopa hna kuj. 19 Nge ame la itre ewekë, me itre jian hna huliwan göne la uma maano, me itre nyine troa saan ej, me itre nyine saane la ihag, troa kuca asë hnei kopa.

20 “Nge ame göne la troa mel la itre laam, tro eö a ahnith kowe la itre nekö i Isaraela troa tro fë koi eö, la nyipi oel elaio* hna tranetran, matre tro pala hi a mel la itre laam. 21 Nge ame ngöne la itat ne icasikeu, qëmekene la imaano ne thewe hnahag, nge hmekune la nyine Anyipicin, tro Arona me itre nekö i angeic a thupën, matre tro pala hi a mel la itre laam qëmeke i Iehova, qaan e hej uti hë hmakany. Celë hi wathebo koi angetre Isaraela uti hë epine palua. Nge tro la nöjei xötre i angatr a trongën.