Numera

3 Haawe, hane hi la itre matra i Arona me Mose, ngöne lo Iehova a ithanata me Mose hune la wetre Sinai. 2 Hane hi la itre ëjene la itre nekö i Arona: Nadaba la ka tru, me Abiu, me Eleazara, me Ithamara. 3 Celë hi itre ëjene la itre nekö i Arona, lo itre atre huuj hna acil ngöne la hnëqa ne atre huuj. 4 Ngo hna humuthi Nadaba me Abiu qëmekei Iehova, lo nyidroti a tro fë eë ka tha meköti kö koi Iehova, ngöne la hnapapa e Sinai. Nge pëkö nekö i nyidroti trahmany. Ngo ame kö Eleazara me Ithamara, ke lue atre huuje pala kö nyidro, me Arona keme i nyidro.

5 Nge öni Iehova koi Mose ka hape: 6 “Hëne jë la angetre Levi, nge acilë angatre jë qëmekei Arona atre huuj, nge tro angatr a huliwa koi angeic. 7 Qa i angatre troa eatrëne la hnëqa i angatre koi Arona, me kowe la nöj asë qëmekene la itat ne icasikeu, ene la troa huliwa ngöne la uma maano. 8 Tro angatr a thupëne la itre jia ne huliwa ne la itat ne icasikeu, nge tro angatr a eatrëne la hnëqa i angatr kowe la angetre Isaraela, ene la troa huliwa ngöne la uma maano. 9 Tro eö a hamëne la angetre Levi koi Arona me kowe la itre nekö i angeic, angatre la itre hna xome qa ngöne la angetre Isaraela, nge hna hamëne koi Arona. 10 Tro eö a acili Arona me itre nekö i angeic ngöne la hnëqa ne atre huuj, nge qa i angatr troa eatrëne lai; tro ha humuth la nöjei atre ka easenyine la uma ne hmi, ngo ka tha ijije* pe.”

11 Nge öni Iehova hmaca jë hi koi Mose: 12 “Ngo ame ni, eni a xome la angetre Levi nyipine la angetre Isaraela, nyine nyihnane la itre pane neköne la angetre Isaraela; itre ewekënge la angetre Levi. 13 Ke thatraqange la itre pane nekön asë. Ame lo drai hnenge hna lepe lo itre pane neköne la angetre Aigupito, hnenge fe hna ahmitrötrëne la itre hna pane nekön hna hnahon e Isaraela, ene la itre atr me itre öni. Itre ewekëng asë hi. Iehova ni.”

14 Nge öni Iehova hmaca jë hi koi Mose ngöne la hnapapa e Sinai ka hape: 15 “E jë la itre nekö i Levi, thenge la itre lapa i angatr, me itre fami i angatr. Nge tro eö a sija la ëjene la itre trahmanyi ka ca treu a tro draië.” 16 Ame hnei Mose hna sija la ëje i angatr, tune lo hnei Iehova hna amekötin koi angeic. 17 Hane hi la itre ëjene la itre nekö i Levi: Geresoma, me Kohatha, me Merari.

18 Hane hi la lue ëjene la lue nekö i Geresoma, thenge la lue fami i nyidro: Libeni me Simei.

19 Itre nekö i Kohatha thenge la itre fami i angatr: Amerama, me Izara, me Heberona, me Uziela.

20 Lue nekö i Merari, thenge la lue fami i nyidro: Maheli me Musi. Celë hi la itre fami ne la angetre Levi, thenge la itre lapa i angatr.

21 Kola fetra qaathei Geresoma la itre fami ne la angetre Libeni me Simei. Hane hi la pengöne la itre fami ne la angetre Geresoma. 22 Ame la etrune la itre trahmanyi thei angatr hna siji ëjen, nge ka ca treu a tro draië, ke ala 7 500. 23 Nge ame la itre fami ne la angetre Geresoma, angatr a lapa tröne la uma maano, ngöne la götrane kuë. 24 Nge ame la tixe ne lapa i angetre Geresoma, ke Eliasafa nekö i Laela. 25 Nge ame göne la itat ne icasikeu, qa ne la itre nekö i Geresoma troa thupëne la uma maano, memine la itat, memine la isitr, memine la irido ka hmelele ne la hnë lö ne la itat ne icasikeu, 26 memine la itre imaano ne la ikur, memine la imaano ka hmelele ne la hnë lö ne la ikur, lo ka kanothe la uma maano memine la ita ne huuj, me itre otren ej, memine la nöjei huliwa hna kuca thatraqane la itre ewekë cili.

27 Kola fetra qaathei Kohatha la itre fami ne la angetre Amerama, memine la fami ne la angetre Izaia, memine la fami ne la angetre Heberona, memine la fami ne la angetre Uziela. Hane hi la pengöne la itre fami ne la angetre Kohatha. 28 Ame la etrune la itre trahmanyi ka ca treu a tro draië, ke 8 600; hnëqa i angatr troa thupëne la götrane gaa hmitrötr. 29 Nge ame la itre fami ne la itre nekö i Kohatha, ke angatr a lapa ngöne la götrane kolojë ne la uma maano. 30 Ame la tixe ne lapa i angetre Kohatha, ke Elizafana nekö i Uziela. 31 Hnëqa i angatre troa thupëne la Pua,* memine la laulau, memine la ita ne laam, memine la itre ita ne huuj, memine la itre jia ne huliwa göne la götrane gaa hmitrötr, memine la imaano ne thewe hnahag, memine la nöjei huliwa thatraqane la itre ewekë cili.

32 Ame la tane la itre tixe i angetre Levi, ke Eleazara nekö i Arona atre huuj; angeic e hune la itre ka trene hnëqa ngöne la götrane gaa hmitrötr.

33 Kola fetra qaathei Merari la itre fami ne la angetre Maheli, memine la fami ne la angetre Musi. Hane hi la pengöne la itre fami i angetre Merari. 34 Ame la etrune la itre trahmanyi thei angatr hna siji ëjen, nge ka ca treu a tro draië, ke ala 6 200. 35 Ame la tixe ne la lapa ne la angetre Merari, ke Zuriela nekö i Abihaila. Nge ame la angetre Merari, angatr a lapa ngöne la götrane kolopi ne la uma maano. 36 Hnëqa ne la itre nekö i Merari troa thupëne la itre inehe ne la uma maano, me itre agö, me itre ikapa, me itre trepen hna kuj, me itre jia ne huliwa, me itre nyine kuca thatraqane la itre ewekë cili, 37 memine fe la itre ipoto ka cile xötreithe la ikur, memine la itre trepen hna kuj, me itre nyine saan, me itre enon ej.

38 Ame la itre ka lapa ngöne la götrane koië qëmekene la uma maano, me qëmekene la itat ne icasikeu, ngöne la hna fetra hnei jö, ke Mose, me Arona me itre nekö i angeic. Hnëqa i angatre troa thupëne la uma ne hmi; hnëqa i angatre lai thatraqane la angetre Isaraela. Nge troa humuth la nöjei atr ka easenyine la uma ne hmi, ngo ka tha ijije* pe.

39 Matre traqa koi 22 000 lao trahmanyi thene la angetre Levi, ka ca treu a tro draië, lo hnei Mose me Arona hna siji ëjen thenge la itre fami i angatr, tune lo hnei Iehova hna amekötin.

40 Thupene lai, öni Iehova koi Mose ka hape: “Sija jë la ëjene la itre pane nekön ne la angetre Isaraela, ka ca treu a tro draië. E jë la etru i angatr, nge fejane jë la itre ëje i angatr. 41 Tro eö a xome thatraqai ni la angetre Levi, matre nyihnane la itre pane neköne la angetre Isaraela. Tro fe a xome koi ni la itre öni hna axöj ne la angetre Levi, nyine nyihnane la itre pane neköne la itre si i angetre Isaraela. Iehova ni.” 42 Ame hnei Mose hna siji ëjene la itre pane neköne la angetre Isaraela, tune lo hnei Iehova hna amekötin koi angeic. 43 Matre ame la etrune la itre pane neköne trahmany, ka ca treu a tro draië, nge hna siji ëjen, ke ala 22 273.

44 Nge öni Iehova hmaca jë hi koi Mose: 45 “Xome jë la angetre Levi nyine nyihnane la itre pane neköne la angetre Isaraela, me itre öni hna axöj ne la angetre Levi, nyine nyihnane la itre öni hna axöj ne la angetre Isaraela. Nge itre ewekënge la angetre Levi. Iehova ni. 46 Ame la thupen nyine itöne la 273 lae pane neköne la angetre Isaraela, ka sasaithe la etrune la angetre Levi, 47 ke 5 sekel* e ca atr, thenge la tulu ne sekel ngöne la götrane gaa hmitrötr.* Ame la ca sekel, ke 20 gera.* 48 Nge tro eö a hamëne la mani koi Arona me itre nekö i angeic, nyine itöne lo itre munëne lo etrune la angetre Levi.” 49 Ame hnei Mose hna xome la thupene thene lo itre munëne lo etrune la angetre Levi. 50 Hnei angeic hna xome la mani thene la itre pane neköne la angetre Isaraela, matre traqa koi 1 365 sekel, thenge la tulu ne sekel ngöne la götrane gaa hmitrötr. 51 Thupene lai, hnei Mose hna hamëne la mani koi Arona me itre nekö i angeic, thenge la hna qaja hnei Iehova, tune lo hnei Iehova hna amekötin koi Mose.