Esodro
16 Hnene la lapa i Isaraela asë hna mejë qa Elima, me traqa ngöne la hnapapa e Sin, nyipine Elima me Sinaï,* hmekune la hna 15 ne drai ne la hnaaluene treu, thupene la angatr a tro qa Aigupito.
2 Ame hnene la lapa ne Isaraela asë, hna nyiqaane nyiulil koi Mose me Arona ngöne la hnapapa. 3 Angetre Isaraela a qaja jë koi nyidro ka hape: “Ka loi ekö e tro la ime i Iehova a humuthi huni e Aigupito, lo eahuni a lapa ezine la itre öle mitr, me xeni meji la falawa. Hnei epon hna tro sai huni kowe la hnapapa celë, matre tro la nöj* a mec hnei mecijin.”
4 Nge öni Iehova koi Mose ka hape: “Tro ni a amalane qa hnengödrai la falawa koi epun. E nöjei drai, tro epuni a isa lö pi troa hleme la ka ijij kowe la drai, matre tro ni a tupathe la nöje ce, me wange ka hape, tro kö angatr a drenge la wathebong maine waea. 5 Ame ngöne la hna 6 ne drai, tro epuni a alua hleme hune la itre xa drai, me canga hnëkën.”
6 Öni Mose jë hi me Arona: “Edrae hej, tro hë epuni a atre laka, Iehova la atre thepe epuni qa Aigupito. 7 Nge e hmakany, tro hë epuni a öhne la elolo i Iehova, ke drenge hë Iehova la epuni a nyiulil koi nyidrë, nge ame nyio, drei nyio matre tro epuni a nyiulil koi nyio?” 8 Öni Mose hmaca jë hi ka hape: “Ame hë la Iehova a hamëne koi epuni la mitr e hej, me falawa e hmakany, ke tro epuni a xen uti hë la tro epuni a mej. Nge tro hë epuni a atre laka, drenge hë Iehova la epuni a nyiulil koi nyidrë. Ngo ame nyio, ke drei nyio? Tha epuni kö a nyiulil koi nyio, ngo koi Iehova pe.”
9 Nge öni Mose koi Arona: “Qaja jë kowe la lapa i Isaraela asë ka hape, ‘Easenyi jë qëmeke i Iehova, ke drenge hë nyidrë la epuni a eetr.’” 10 Matre ame hë la Arona a ase ewekë kowe la lapa i Isaraela, angatr a xei jë kowe la hnapapa, nge ame cili, mama pi hi la lolo i Iehova nyipine la iaw.
11 Nge öni Iehova hmaca koi Mose: 12 “Drenge hë ni la kola nyiulil la angetre Isaraela, matre qaja jë koi angatre ka hape, ‘Ame hë la kola lö la jö,* tro epuni a öni mitr, nge ame hmakany, tro epuni a meji hna xeni falawa. Nge tro hë epuni a atre laka, Iehova ni Akötresi epun.’”
13 Ngöne la heji cili, hnene la itre neköi waco* hna traqa me haöthe la lapa, nge e hmakany, hetre wene lepany xötreithe la lapa. 14 Nge ame hë la kola patre la wene lepany, mama pi hi hune la dro la itre neköi wen, kösë kiona hune la ihnadro. 15 Nge ame hë la angetre Isaraela a öhne lai, angatr a iqajakeune ka hape: “Nemene ewekë la?” Ke thatre kö angatr. Matre öni Mose: “Falawa lai hnei Iehova hna hamën nyine a i epun. 16 Hane hi la hna amekötin hnei Iehova, ‘Tro epuni a isa hlem la hna atreine xen. Tro epuni a hleme la ca omera* koi ca atr, thenge la etrune la itre atr ka lapa hnine la itre itate i epun.’” 17 Ame hnene la angetre Isaraela hna nyiqaane hlem. Hetre ka hlem atrun, nge hetre ka hlem acon. 18 Nge ngöne la angatr a tuluth hnene la omera, ame la ka hlem atrun, pëkö munën, nge ame la ka hlem acon, ijije hi la xen. Angatr a isa hlem la ka ijij troa xen.
19 Ame hnei Mose hna qaja koi angatre ka hape: “Pëkö troa ami kemej koi hmakany.” 20 Ngo tha drei Mose kö hnei angatr. Hetre ka ami kemej koi hmakany, matre kola si wanak, me pui hmëz. Ame hnei Mose hna elëhni koi angatr. 21 Angatr a hlem e nöjei hmakany, la falawa ka ijije troa xen. Nge ame hë la kola cici la jö, ej a hmu.
22 Ngöne la hna 6 ne drai, angatr a alua hleme jë lo etrune falawa, ene la lue omera koi ala cas. Nge itre tane lapa a isa traqa pi troa thuemacanyi Mose. 23 Matre öni Mose: “Hane hi la hna qaja hnei Iehova, ame elany, troa mano hnyawa,* Sabathe ka hmitrötr koi Iehova. Atrone jë la nyine atron, nge boelëne jë la nyine boelën. Nge amë acone ju la munën, matre nyine nyi kemej koi hmakany.” 24 Angatr a amë acone ju uti hë e hmakany, tune lo hna amekötin hnei Mose, nge tha pui hmëzi kö, me si wanak. 25 Matre öni Mose: “Enehila, xeni jë la xeni cili, ke sabathe koi Iehova la. Enehila, tha tro kö epuni a hane öhn ej hune la ihnadro. 26 Tro epuni a hleme ngöne la 6 lao drai, nge ngöne la hna 7 ne drai, e sabath, tha tro kö epuni a öhn. 27 Ngo hnene la itre xane hna lö pi troa hlem ngöne la hna 7 ne drai, ngo pëkö hnei angatre hna öhn.
28 Matre öni Iehova jë hi koi Mose: “Uti hë eu la tro epuni a xele ma drenge la itre hna amekötin, me itre wathebong? 29 The thëthëhmine kö laka, hnei Iehova hna hamë epuni la sabath. Celë hi matre, ngöne la hna 6 ne drai, nyidrëti a thue falawa i epun koi lue drai. Nge ngöne la hna 7 ne drai, tro la nöjei atr a isa lapa hnalapan, pëkö ka troa tro qa ngöne la götrane i angeic.” 30 Matre ngöne la hna 7 ne drai, hnene la nöj hna metrötrëne la Sabath.*
31 Hnene la nöje Isaraela hna hëne la falawa ka hape, “mana.”* Ka wië tune la itine persil, nge e kola xen, kola tune lo gato miel. 32 Matre öni Mose: “Hane hi la hna amekötin hnei Iehova, ‘Nyialiene jë la ca omera, nge tro ha amë acon, matre tro la itre xötre matra i epun, a öhne la falawa hnenge hna hamë epun ngöne la hnapapa, lo eni a thepe epuni qa Aigupito.’” 33 Öni Mose jë hi koi Arona: “Xome jë la ketre trengen, nge nyialiene ju hnene la ca omera ne mana, nge amë ju qëmeke i Iehova. Ewekë lai nyine troa thupën, ngöne la nöjei xötre atr.” 34 Ame hnei Arona hna amë qëmekene la Nyine Anyipicin, thenge lo hna amekötin hnei Iehova koi Mose, matre troa thupën ej. 35 Hnei angetre Isaraela hna xeni la mana koi 40 lao macatre, uti hë la angatr a traqa kowe la nöj gaa hetre atr. Angatr a xeni ju la mana, uti hë la angatr a traqa kowe la ifego memine la nöje Kanana. 36 Ame la ca Omera, tre 2 lit.