Numera

9 Ame hnei Iehova hna ithanata koi Mose ngöne la hnapapa e Sinai, ngöne la pane treu ne la hnaaluene macatre, thupene la angatr a mejë qa Aigupito. Öni nyidrëti ka hape: 2 “Qa i angetre Isaraela troa hnëkëne la huuj ne Paseka* ngöne la ijine hna sa. 3 Tro epuni a hnëkën ej ngöne la ijine hna sa, ngöne la hna 14 ne drai ne la treu celë, ngöne la kola lö la jö.* Nge tro epuni a hnëkën ej thenge la itre wathebo, me itre hna amekötin.”

4 Ame hnei Mose hna upe la angetre Isaraela troa hnëkëne la huuj ne Paseka. 5 Matre hnei angatr hna hnëkëne la huuj ne Paseka ngöne la hnapapa e Sinai, ngöne la hna 14 ne drai ne la pane treu, ngöne la kola lö la jö. Hnene la angetre Isaraela hna kuca asë, thenge lo hnei Iehova hna ahnithe koi Mose.

6 Ngo hnene la itre xaa trahmanyi hna apuingazonyi angatr, pine angatr ketr la ngönetrei ka mec. Matre tha ijiji angatre hë troa hnëkëne la huuj ne Paseka la drai cili. Ame hnei angatr hna tro koi Mose me Arona ngöne la drai cili, 7 me hape koi Mose: “Pui ngazo hë hun, ke hne huni hna ketr la ngönetrei ka mec. Hnauëne laka, tha tro kö huni a ce tro fë la huuj koi Iehova memine la angetre Isaraela ngöne la ijine hna sa?” 8 Matre sa jë hi Mose ka hape: “Pane cile ju, matre tro ni a pane dreng la hnei Iehova hna troa amekötin göi epun.”

9 Ame hnei Iehova hna qaja koi Mose ka hape: 10 “Hape jë kowe la angetre Isaraela: ‘Maine tro la ketre e epun, maine itre matra i epuni elanyi a pui ngazo pine ketr la ka mec, maine kola tro kowe la ketre nöje gaa nany, qa i angeice fe troa hnëkëne la huuj ne Paseka koi Iehova. 11 Tro angeic a hnëkën ej ngöne la hna 14 ne drai ne la hnaaluene treu, ngöne la kola lö la jö. Nge tro angeic a ce xen memine la falawa hna tha levenën, me itre dröne hnitre ka haitr. 12 Tha tro kö angeic a ami munën uti hë e hmakany, me axeciëne la ketre jun. Tro angeic a hnëkën ej thenge la nöjei wathebo göne la Paseka. 13 Ngo maine tha hnene kö la ketre atr ka pui loi hna hnëkëne la huuj ne Paseka, nge angeice hi ngöne la nöj, ke tro ha apatrenyi angeic, pine angeic tha tro fë la huuj koi Iehova ngöne la ijine hna sa. Tro hë angeice lai a xeni pune la ngazo i angeic.

14 “‘Nge maine hetre trenyiwa ka lapa thei epun, ke tro fe angeic a hnëkëne la huuj ne Paseka koi Iehova. Tro angeic a kuca thenge la wathebo ne Paseka, me thenge la hna amekötin. Casi hi la wathebo kowe la trenyiwa memine la atre Isaraela.’”

15 Ngo ame lo kola acil la uma maano, hnene la ketre iaw hna heetrën ej, ene la itat ne Anyipicin. Nge ame hë e jidr, hna të la ketre ewekë kösë eë hune la uma maano, uti hë e hmakany. 16 Matre hane hi la ewekë ka lapa traqa: e lai, kola heetrën la uma maano hnene la iaw, nge e jidr, kola heetrën ej hnene la ketre ewekë kösë eë. 17 Maine tro la iaw a elë draië qa ngöne la itat, ke qa ne la angetre Isaraela troa mejë me tro. Nge e cile hë ej ngöne la ketre götran, ke angetre Isaraela a acil la lapa i angatr e cili. 18 E Iehova a amekötin koi angatr troa lapa, ke angatr a lapa, nge e öni Iehova troa tro, ke angatr a mejë me tro. Ngo maine tro la iaw a të hune la uma maano, ke tro kö angatr a lapa e cili. 19 Maine kolo pala hi a lapa la iaw hune la uma maano koi nyimu drai, angetre Isaraela a drengethenge Iehova: tha angatre kö a mejë qa lai. 20 Ame itre xaa ijin, kolo hi a të la iaw hune la uma maano koi hnepe drai. E Iehova a amekötin koi angatr troa lapa, ke angatr a lapa, nge e öni Iehova troa tro, ke angatr a mejë me tro. 21 Nge ame itre xaa ijin, hnene la iaw hna lapa qaan e hej uti hë e hmakany. Ame hë la kola elë draië la iaw e hmakany, angatr a mejë me tro. Maine troa elë draië la iaw e lai me jidr, tro pala hi angatr a mejë me tro. 22 Nge maine kolo pala hi a lapa la iaw hune la uma maano koi lue drai, maine koi ca treu, maine koi nyimu drai, ke angatre pala hi a lapa e cili; Tha angatre kö a tro. Ngo e elë draië hë la iaw, angatr a mejë me tro. 23 Haawe, e Iehova a amekötin koi angatr troa lapa, ke angatr a lapa, nge e öni Iehova troa tro, ke angatr a mejë me tro. Nge hnei angatr hna drenthenge Iehova, me tro thenge la hna amekötin hnei Iehova jëne Mose.