Numera

31 Thupene lai, öni Iehova jë hi koi Mose: 2 “Tro jë troa lep la angetre Midiana matre të koi angatr la hna kuca kowe la angetre Isaraela. Thupene lai, tro ha acasi ö memine la nöje i ö.”*

3 Matre öni Mose jë hi kowe la nöj: “Hnëkëne jë la itre xaa trahmany qaathei epun matre troa isi memine la angetre Midiana, me nyithupene koi angatr, thenge la hna amekötin hnei Iehova. 4 Qa i epun troa upe la 1 000 lao trahmany troa isi qa ngöne la isa ca tribu, ene la nöjei tribu ne Isaraela asë.” 5 Thene la itre milie* e Isaraela, hna xome la 1 000 lao trahmany qa ngöne la isa ca tribu, matre traqa koi 12 000 lao trahmany hna hnëkën thatraqane la isi.

6 Ame hnei Mose hna upe la 1 000 lao trahmany qa ngöne la isa ca tribu troa isi. Nge hnei Fineasa, nekö i Eleazara atre huuj, hna ce tro memine la trongene isi. Hnei angeic hna xometrongëne la itre ewekë ka hmitrötr, me itre trutru nyine troa uf. 7 Nge hnei angatr hna isi memine la angetre Midiana, tune la hnei Iehova hna amekötin koi Mose. Ame hnei angatr hna humuth asë la itre trahmany. 8 Hnei angatre fe hna humuth la itre joxu ne Midiana: ene Evi, me Rekem, me Zura, me Huro, me Reba, lo 5 lao joxu ne Midiana. Hnei angatre fe hna humuthi Balama hnei taua, lo nekö i Beora. 9 Ngo hnei angatr pe hna xome la itre föe me itre nekönatr qa Midiana, memine la itre hna thapa, ene la itre öni asë ka mem, memin asë la itre kau, me itre mo i angetre Midiana. 10 Ame asë hi la itre traon hnei angatr hna lapan, me itre lapa* i angatr, ke hnei angatr hna dreuthetrij asë. 11 Thupene lai, angatr a xometrongëne jë la itre ewekë hna thapa, ene la itre atr me itre öni. 12 Nge hnei angatr hna traqa fë la itre atr hna kötre fë, me itre ewekë hna thapa, me hamën koi Mose me Eleazara atre huuj, me kowe la icasikeu ne Isaraela, nyipine la hnapapa ne Moaba, ezine Ioridrano, hmekun e Ieriko.

13 Ame hnei Mose me Eleazara atre huuj, memin asë la itre tane la nöj, hna tro troa ixelë me angatr tröne la lapa. 14 Ngo hnei Mose hna wesitr kowe la itre ka elemekene la itre trongene isi, ene la itre tane lo ala 1 000,* me itre tane lo ala 100, ene lo itre ka bëek qa hna isi. 15 Öni Mose jë hi koi angatr: “Hnauëne laka, hnei epuni hna nuamelene la itre föe? 16 Atre hi epuni laka, angatre hi lo itre hna upe hnei Balaama troa ananyine la angetre Isaraela qaathei Iehova göne la haze Peora, nge qa ngöne lai, hna humuthe la nöje i Iehova. 17 Ame enehila, humuthe pi la itre nekö trahmany, me itre föe ka iatre hë me trahmany. 18 Ngo tro pë hë epuni a nuamelene la itre jajinyi ka tha iatre pala kö me trahmany. 19 Nge tro hë epuni a lapa tröne la lapa koi 7 lao drai. Maine hnei epun me itre föe hnei epun hna kötre fë hna humu atr, maine ketre pena la ngönetrei ka mec, ke tro hë epun a apuiloinyi epun ngöne la hnaakönine drai, me hna 7 ne drai. 20 Nge tro epun a ahmitrötrëne la itre iheetre i epun, memin asë la itre ewekë hna kuca hnei kupeine öni, memin asë la nöjei ewekë hna kuca hnei pene nani, me nöjei ewekë hna kuca hnei sinöe.”

21 Öni Eleazara jë hi kowe lo itre atr ka qa hna isi ka hape: “Hane hi la wathebo hnei Iehova hna anithe koi Mose: 22 ‘Ame la gool, me sileva, me kopa, me fao, me kapa, me plo, 23 memin asë la itre ewekë nyine troa apuiloin hnei eë, ke qa i epuni troa dreuth itre ej matre troa pui loi. Ngo qa i epuni fe troa apuiloin hnene la tim nyine apuiloin. Ame la itre ewekë nyine apuiloin hnei eë, ke tro epuni fe a apuiloin hnei tim. 24 Nge qa i epun troa wasine la itre iheetre i epun ngöne la hna 7 ne drai, nge tro hë epuni a pui loi. Thupene lai, ijiji epuni hë troa lö kowe la lapa.’”

25 Matre öni Iehova jë hi koi Mose: 26 “E jë la etrune la itre atr me itre öni hna thapa; ce kuca jë lai me Eleazara atre huuj, memine la itre tixe ne lapa ne la nöj. 27 Thawaluëne pi la itre ewekë hna thapa, ca sin kowe la itre soc ka traqa qa hna isi, nge ame la ketre sin, ke kowe la nöj. 28 Nge qa i ö troa xome qaathene la itre soc ka qa hna isi, la hotr koi Iehova, cas qa ngöne la 500 lao atr, me qa ngöne la itre öni ka tru, me qa ngöne la itre boliko föe, me qa ngöne la itre öni ka co. 29 Nge tro eö a xome la hotr qa ngöne la sin hna hamëne koi angatr, matre hamëne pena koi Eleazara atre huuj, nyine ahnahna thatraqai Iehova. 30 Nge qa ngöne la sine la itre ewekë hna hamëne kowe la angetre Isaraela, tro eö a xome la cas qa ngöne la 50 lao atr, me qa ngöne la itre öni ka tru, me qa ngöne la itre boliko föe, me qa ngöne la itre öni ka co, me qa ngöne la nöjei pengöne öni ka mem, nge tro eö a hamëne kowe la angetre Levi, itre ka huliwa ngöne la uma maano i Iehova.”

31 Ame hnei Mose me Eleazara atre huuj, hna kuca tune lo hnei Iehova hna amekötine koi Mose. 32 Nge ame pë hë la munëne ne la itre ewekë hna thapa ne la itre trahmany ka qa hna isi, ke traqa koi 675 000 lao neköi öni ka co, 33 me 72 000 lao öni ka tru, 34 nge 61 000 lao boliko föe. 35 Nge ame asë hi la itre föe ka tha iatre kö me trahmany, ke traqa koi 32 000. 36 Nge ame la sine hna hamëne kowe la itre ka qa hna isi, ke traqa koi 337 500 lao neköi öni ka co. 37 Matre ame la hotr koi Iehova qa ngöne la itre neköi öni ka co, ke traqa koi 675. 38 Nge traqa koi 36 000 lao öni ka tru. Nge qa ngöne itre ej, hna xome la 72 nyine hotr koi Iehova. 39 Nge traqa koi 30 500 lao boliko föe. Nge qa ngöne itre ej, hna xome la 61 nyine hotr koi Iehova. 40 Nge traqa koi 16 000 lao atr. Nge qaathei angatr, hna xome la 32 nyine hotr koi Iehova. 41 Ame hnei Mose hna hamëne la hotr koi Eleazara atre huuj nyine ahnahna koi Iehova, thenge la hnei Iehova hna ahnithe koi angeic.

42 Nge ame la sin thatraqane la angetre Isaraela, lo hnei Mose hna xome qaathene la itre trahamany ka qa hna isi, 43 ke traqa koi 337 500 lao neköi öni ka co, 44 me 36 000 lao öni ka tru, 45 me 30 500 lao boliko föe, 46 nge 16 000 lao atr. 47 Nge tune lo hnei Iehova hna amekötine koi Mose, hnei angeic hna xome qa ngöne la sin thatraqane la angetre Isaraela, la cas qa ngöne la 50 lao atr, me qa ngöne la itre öni, nge hnei angeic hna hamën itre ej kowe la angetre Levi, itre ka cilëne la huliwa ngöne la uma maano i Iehova.

48 Nge ame lo itre ka elemekene la trongene isi, lo itre tane la ala 1 000, me itre tane la ala 100, hnei angatr hna tro troa wai Mose. 49 Nge öni angatr ka hape: “Hne hun itre hlue i nyipë, hna e la etrune la itre atr ka qa hna isi, lo itre soc hun, nge pëkö ala casi thei angatr ka patr. 50 Haawe, nue huni pi troa huujëne koi Iehova* la itre ewekë hne huni hna öhn, lo itre ewekë gool, me itre otrene waca, me itre otrene wanakoim, me itre ane hnangenyië, me itre xaa ewekë ju kö, matre troa kuca qëmekei Iehova, la huuj ne aloinekeun thatraqai hun.”

51 Ame hnei Mose me Eleazara atre huuj hna xome la gool qaathei angatr, ene la nöjei ewekë nyine amingömingön. 52 Matre ame asë hi la gool hnei angatr hna hamëne nyine ahnahna koi Iehova, ke traqa koi 16 750 lao sekel,* qaathene la itre tane la ala 1 000 me itre tane la ala 100. 53 Nge hnene la itre soc hna isa xom la itre ewekë hna thapa. 54 Nge hnei Mose me Eleazara atre huuj hna xome la gool qaathene la itre tane la ala 1 000, me itre tane la ala 100, me tro fë itre ej qëmekei Iehova, ngöne la itat ne icasikeu nyine amekunën kowe la angetre Isaraela.