Numera

10 Nge öni Iehova jë hi koi Mose: 2 “Kuca jë koi ö la lue trutru; kuca jë hnei sileva hna lepelep hnei hama, matre icasinekeune la nöj, me amejëne la itre lapa troa tro. 3 Nge troa ufe la lue trutru troa icasinekeune la nöj qëmekei ö, ngöne la hnë lö ne la itat ne icasikeu. 4 Tro hi a ufe la ca trutru troa icasinekeune qëmekei ö la itre tixe, ene la itre tixe ne la itre milie* qa Isaraela.

5 “Ame la epuni a troa ufe sasa la trutru, tro la itre lapa ngöne la götrane koië a tro. 6 Nge ame la epuni a troa alua ufe sasa, tro la itre lapa ne la götrane kolojë a tro. Celë hi aqane troa ufe la trutru, matre troa mejë la ketre lapa.

7 “E tro epuni a icasinekeune la nöj,* tro epuni a ufe la itre trutru, ngo tha tro kö a ufe sasa. 8 Qa ne la itre nekö i Arona, itre atre huuj troa uf itre ej. Nge ame göne la aqane troa ufi trutru, ke ketre hna amekötin lai ka cile hut koi epun, me nöjei xötr asë.

9 “E tro epun a isi ngöne la nöje i epun memine la ketre ithupëjia ka angazo epun, tro epuni a ufe la trutru ne isi, nge tro Iehova a meku epun, me amele epun qaathene la itre ithupëjia.

10 “Ngöne la itre drai ne epuni a madrin, ngöne la itre feete i epun, me itre mekene treu, tro epuni a ufi trutru ngöne la epuni a troa huujëne* la itre huuj ne dreuth asë, me itre huuj ne tingeting; tro la aqane ufi trutru cili a amekunëne laka, hna kepe epun qëmekene la Akötresi epun. Iehova ni, Akötresi epun.”

11 Ngo ame ngöne la hnaaluene macatre, ngöne la drai 20 ne la hnaaluene treu, hnene la iaw hna elë draië qa hune la uma maano ne Anyipicin. 12 Ame hnene la angetre Isaraela hna tro qa ngöne la hnapapa ne Sinai, thenge la hna amekötin göne la aqane tronge i angatr. Nge hnene la iaw hna cil ngöne la hnapapa ne Parana. 13 Celë hi lo pane ijine Iehova a upe la angetre Isaraela troa tro, jëne Mose.

14 Hna tro pa hnene la köni tribu hna acasin ne Iudra, thenge la itre lapa* i angatr. Nasona nekö i Aminadaba, la atre elemekene la lapa i Iudra. 15 Nathaniela nekö i Zuara, la atre elemekene la tribu ne la itre nekö i Isakara. 16 Nge Eliaba nekö i Helona, la atre elemekene la tribu ne la itre nekö i Zebulona.

17 Thupene la kola ase sa la uma maano, hnene la itre nekö i Geresoma me itre nekö i Merari ka ajöne la uma maano hna tro.

18 Ame hna tro hnene la köni tribu hna acasin ne Reubena, thenge la itre lapa i angatr. Nge Elizura nekö i Sedeura, la atre elemekene la lapa i Reubena. 19 Selumiela nekö i Zurisadai, la atre elemekene la tribu ne la itre nekö i Simeona. 20 Nge Eliasafa nekö i Deuela, la atre elemekene la tribu ne la itre nekö i Gada.

21 Thupene lai, hna hane fe tro hnene la angetre Kohatha, lo itre ka ajöne la itre ewekë hna huliwan ngöne la götrane gaa hmitrötr. Nyipiewekë troa acile hmaca la uma maano qëmekene tro angatr a traqa.

22 Ame hna tro hnene la köni tribu hna acasin ne Ia itre nekö i Eferaima, thenge la itre lapa i angatr. Nge Elisama nekö i Amihuda, la atre elemekene la lapa i Eferaima. 23 Gamaliela nekö i Pedazura, la atre elemekene la tribu ne la itre nekö i Manase. 24 Nge Abidana nekö i Gideona, la atre elemekene la tribu ne la itre nekö i Beniamina.

25 Nge hnene pë hë la köni tribu hna acasin ne Ia itre nekö i Dana, hna tro thenge la itre lapa i angatr. Angatre hi la ka thingi tro ne la itre lapa asë. Ahiezera nekö i Amisadai, la atre elemekene la lapa i Dana. 26 Pagiela nekö i Okerana, la atre elemekene la tribu ne la itre nekö i Asera. 27 Nge Ahira nekö i Enan, la atre elemekene la tribu ne la itre nekö i Nafatali. 28 Celë hi aqane trongene la angetre Isaraela me itre lapa i angatr.

29 Matre öni Mose jë hi koi Hobaba nekö i Reuela,* atre Midiana, lo hmihmi* i angeic: “Eahuni a tro kowe la nöj hnei Iehova hna qaja ka hape: ‘Tro ni a hamë epun.’ Trohemi me eahun, nge tro huni a nyipi nyipë, ke hnei Iehova hna thingehnaeane la itre ewekë ka lolo koi Isaraela.” 30 Ngo sa jë hi Hobaba ka hape: “Tha tro kö ni a ce tro me epun, ngo tro pe ni a bëeke kowe la nöjeng me lapang.” 31 Nge öni Mose hmaca jë hi ka hape: “Eni a sipo nyipë, the nue huni kö, ke atre hi nyipë la götran hnë tro huni a acili itat ngöne la hnapapa, nge ijiji nyipëti hi troa köja gojenyi* hun. 32 Nge maine nyipëti a ce tro me eahun, tro huni a nyipi nyipë tune la aqane nyipi hun hnei Iehova.”

33 Köni drai ne tro angatr qa ngöne la wetre i Iehova, nge ngöne la köni drai cili, hna tro qëmekei angatr la Pua Ne Isisinyikeu i Iehova, matre thele hnë mano thatraqai angatr. 34 Nge eje kö hui angatr la iawe i Iehova e lai, ngöne la angatr a tro qa ngöne la hnei angatr hna lapa.

35 E nöjei ijine kola mejë fë la pua, Mose a qaja ka hape: “Iehova fe, mejë jë, matre tro la itre ithupëjia me nyipëti a kötr, nge matre troa isa ije la itre ka methinë nyipë.” 36 Ngo ame la kola cile la Pua, angeic a hape: “Iehova fe, epi tro nyipëti a lapa memine la itre milie* qa Isaraela.”