Numera
20 Ame ngöne la pane treu, hnene la nöje Isaraela hna traqa kowe la hnapapa Zin, nge hnene la nöj hna lapa e Kadesi. E cili hi la hna mec me kelemi Miriama.
2 Ngazo pe, pëkö tim kowe la nöj; matre hnene la angetre Isaraela hna ce uti koi Mose me Arona. 3 Ame hnei angatr hna elëhni* koi Mose me hape: “Ka loi ju kö la tro huni a ce mec memine lo itre trejin me eahun qëmekei Iehova! 4 Hnauëne laka, hnei epon hna tro fë la ekalesia i Iehova kowe la hnapapa celë matre tro huni a ce mec me itre öni hun? 5 Nge hnauëne laka, lö sai huni pi qa Aigupito hnei epon matre tro sai hun kowe la götrane celë ka ngazo? Nge thatreine pe së tra feja, me tra wacua, me vin, me grenad. Nge goi pë fe tim troa ij. 6 Ame hnei Mose me Arona hna tro qaathene la nöj kowe la hnë lö ne la itat ne icasikeu, me kei qe ipië. Ame hna mama pi la lolo i Iehova koi nyidro.
7 Nge öni Iehova jë hi koi Mose ka hape: 8 “Xome jë la sine tö, nge icasinekeune jë la nöj, eö me Arona trejin me eö. Nge tro epon a ithanata kowe la git qëmekei angatr, matre tro ej a hamëne la timin ej. Nge tro eö a axulune la tim qa ngöne la git thatraqai angatr, me thue imene la nöj me itre öni i angatr.”
9 Ame hnei Mose hna xome la sine tö qëmekei Iehova, thenge la hnei nyidrëti hna ahnith. 10 Nge Mose me Arona a icasinekeune jë la nöj* qëmekene la git, nge öni Mose jë hi: “Drenge ju epun, itre ka tha idrei! Hapeu, tro jë kö nyio a axulune la tim koi epun qa ngöne la giti celë?” 11 Mose a li ime draië jë, me alua lep la git hnene la sine tö i angeic. Ame hna cua pi la tim, nge hnene la nöj me itre si i angatr hna ij.
12 Matre öni Iehova jë hi koi Mose me Arona: “Pine epon tha lapaune koi ni, me ahmitrötrë ni qëmekene la nöje Isaraela, haawe, tha tro jë kö epon a lö fë la nöje ce, kowe la nöj hnenge hna troa hamëne koi angatr.” 13 Celë hi tim ne Meriba,* lo hna thele iwesitrë hnene la angetre Isaraela me Iehova, matre nyidrëti a ahmitrötrë nyidrëti jë nyipi angatr.
14 Thupene lai, hnei Mose hna upe la itre ka tro fë maca qa Kadesi, troa qaja kowe la joxu ne Edroma ka hape: “Hane hi la hna qaja hnei Isaraela, trejin me nyipë: ‘Atre hnyawa hi nyipë la nöjei akötr ka traqa koi hun. 15 Hnene la itre keme hun hna tro Aigupito, nge hne huni hna lapa e Aigupito koi nyimu macatre,* ngo hnene la angetre Aigupito hna qanangazo hun me itre keme hun. 16 Matre hne huni hna xëwe koi Iehova, nge hnei nyidrëti hna drei hun; Ame hnei nyidrëti hna upe la angela, me lö sai hun qa Aigupito; eahuni hë la e Kadesi, ngöne la traon ka nyi ifegon la zi i nyipë. 17 Matre eni a sipo nyipë, epi tro nyipëti a nue hun troa tro nyipine la nöje i nyipë. Tha tro kö huni a trongëne la itre hlapa, me itre hlapa vin, me iji tim qa ngöne la itre hnë tha tim i epun. Tro kö huni a trongëne la gojenyine la joxu, nge tha tro kö huni a jea ngöne la götrane maca me mi, uti hë la eahuni a sasaithe la nöje i nyipë.’”
18 Ngo sa jë hi la joxu ne Edroma ka hape: “The tro pi kö eö a thupa la nöjeng, wanga tro ni a uti fë taua koi ö.” 19 Önine jë hi la angetre Isaraela koi angeic ka hape: “Eahuni hi a troa trongëne la gojenyi ka tru, nge maine tro hun me itre si hun a iji la tim i nyipë, ke tro huni a nyithupen. Casi hi la sipo hun, ene la troa thupa la nöje i nyipë.” 20 Ngo öni nyidrëti jë hi: “Tha tro kö eö a celë thenge.” Ame hnei Edroma hna uti koi angeic memine la trongene isi ka tru nge ka catr.* 21 Tha hnei Edroma kö hna nue Isaraela troa tro nyipine la nöje i nyidrë; Ame hnei Isaraela hna mejë qaathei nyidrë.
22 Nge hnene la angetre Isaraela, ene la nöj asë, hna tro qa Kadesi kowe la wetre Hora. 23 Matre öni Iehova jë hi koi Mose me Arona, hune la Wetre Hora, ngöne la ifegone la nöje Edroma ka hape: 24 “Tro ha acasi Arona memine la nöje i angeic.* Tha tro kö angeic a lö kowe la nöj hnenge hna troa hamëne kowe la angetre Isaraela, ke hnei epon hna tha trongëne la hnenge hna amekötin göne la tim ne Meriba. 25 Ce tro jë me Arona me Eleazara nekö i angeic, nge ce elë jë kowe la Wetre Hora. 26 E cili, tro eö a una la itre iheetr i Arona ne atre huuj, me heetrë Eleazara nekö i angeic. Nge tro hë Arona a meci e cili.”
27 Ame hnei Mose hna kuca asë tune lo hnei Iehova hna amekötin koi angeic. Hnei angatr hna ce elë hune la Wetre Hora qëmekene la nöj asë. 28 Nge hnei Mose hna una la itre iheetr i Arona ne atre huuj, me heetrë Eleazara nekö i angeic. Thupene lai, hnei Arona hna mec hune la wetr, nge hnei Mose me Eleazara pë hë hna ce ut. 29 Matre ame hë la kola öhn hnene la angetre Isaraela asë laka, meci hë Arona, hnei angatr hna treije pi angeic koi 30 lao drai.