Iobu
33 “Ngo Iobu, pane drenge ju enehila la itre trengewekëng;
Drenge ju la hnenge hna qaja.
2 Hnangenyëne ju! Ke tro hë ni a fe la qëng;
Ke nyipiewekë tro la thinemeng* a ithanata.
3 Itre trengewekëng a qajaqaja la emekötine la hning,
Nge ukeineqëng a qaja la nyipici hnenge hna atre.
4 Hna xupi ni hnene la ua i Akötresie,
Nge hna amele ni hnene la hnamano ne la Ka Tru Trenge Men.
5 Haawe, maine atreine hi nyipë, sa jë koi ni;
Hnëkëne jë la itre mekuna i nyipë, matre sa koi ni.
6 Goeën! ceitui nyiso hi qëmekene la nyipi Akötresie;
Hna xupi ni fe hnei dro ka fedr.
7 Haawe, the nue kö la xoue ni troa heti nyipë,
Nge the hace kö pine la hnenge hna troa qaja.
8 Ngo eje hi laka, hnei nyipëti hna ithanata qëmekeng,
Nge anyimua drenge hë ni la itre trengewekë celë,
9 ‘Ka wië ni, nge pëkö engazong;
Pëkö triang, nge tha hnenge kö hna kuca la ngazo.
10 Ngo Akötresieti pe a thele kepin troa icilekeu me eni;
Nyidrëti a goeë ni ceitu me ketre ithupëjia.
11 Nyidrëti a alöne la lue cang ngöne la inehe ne iaxösisi;*
Nge nyidrëti a waipengöne la itre jëng asë.’
12 Ngo tha ka meköti kö la hnei nyipëti hna qaja, matre tro hë ni a sa koi nyipë:
Sisitria kö Akötresie hune la atr ka troa mec.
13 Hnauëne laka, nyipëti a eetr pi nyidrë?
Hapeu, tha hnene kö laka, tha hnei nyidrëti kö hna sa koi nyipë?
14 Ke Akötresieti a aca ithanata, me alu,
(Ngo pëkö ka semesinen)
15 Ngöne la ketre pu, me ngöne la hna meköle goeën e jidr,
Me ngöne la kola hmulizië la itre atr
Me meköle ngöne la itre göhne i angatr.
16 Nyidrëti a fe la lue hnangenyë i angatr
Me nehene* la itre hna amekötin,
17 Matre ajeane la atr qa ngöne la ngazo
Me thupëne la atr qa ngöne la pi tru.
19 Nge hna hajine fe la atr ngöne la angeic a akötr hune la ili angeic
Me ngöne la kola kucakuca lapaa la itre june i angeic,
20 Uti hë la tro angeic a sisine la falawa,
Me thipëne la itre nyipi xen.
21 Ae trootro hë la itre ijöne i angeic,
Nge mama pë hë la itre june i angeic.
22 Easenyi hë angeic kowe la hnaop;*
Me mele i angeic kowe la hnamecin.
23 Nge maine hetre angela ka tro fë maca koi angeic,
Maine ketre atr ka cilëgöli angeic nyipine la ala 1 000,
Matre qaja la ka meköti koi angeic,
24 Tro hë Akötresie a xatua angeic, me hape,
‘Sewe angeice jë troa uti koi Hua!
Ke öhne hë ni la thupene mel!
25 Nge epi tro la ngönetrei* i angeic a pepeija tune lo angeic a thupëtresij;
Nge tro angeic a bëeke hmaca kowe lo ijin angeic a egöcatr tune la nekö trahmany.’
26 Nge tro hë angeic a xëwe koi Akötresie, nge tro hë nyidrëti a hnimi angeic,
Tro angeic a öhne la qëmeke i Akötresie me sue madrin,
Nge tro hë Akötresieti a jelemekötine la atr.
27 Tro hë la atre cili a qaja* kowe la itre xan ka hape,
‘Hnenge hna tria, me aqaline la meköt,
Ngo tha hna ahnëjinë ni kö thenge la itre huliwang.*
28 Ke hnei nyidrëti hna itöne la meleng, matre tha tro kö ej a uti koi Hua,
Nge tro hë la meleng a öhne la lai.’
29 Celë hi aqane kuca i Akötresie kowe la atr
Hna alua kuca, me akön kowe la atr,
30 Matre bëeke sai angeic qa ngöne la Hua,
Me thina angeic hnene la lai ne la mel.
31 Haawe Iobu, drenge hnyawane ju la hnenge hna troa qaja koi nyipë!
Pane lapa thaupu ju, ke tro pala kö ni a ithanata.
32 Ngo maine hetre hnei nyipëti hna pi qaja, sa jë koi ni.
Nge ithanata jë, ke eni a pi jelenyipicine la hnei nyipëti hna qaja.
33 Ngo maine pëkö, nga drei ni ju, nge lapa thaupu ju;
Nge tro hë ni a ini nyipë la inamacan.”