Salamo
Salamo i Dravita.
29 Hamëne pi koi Iehova la nyine iatruny, epun nekön ne la itre ka catr,
Hamëne pi koi Iehova la nyine iatruny, ke lolo nyidrë me catr.
2 Atrunyi Iehova jë, ke nyine atrune la ëje i nyidrë.
Thili ju qëmekei Iehova* memine la itre iheetr ka hmitrötr.*
3 Kola mexem la nine i Iehova hune la itre tim;
Kola ulili la Akötresie ka lolo tune la hedreng.
Iehova e koho hune la itre tim ka nyimutre.
4 Ka men la nine i Iehova;
Ka mingöming la nine i Iehova.
5 Kola hutra la itre sinöe arasi hnene la nine i Iehova;
Eje hi, Iehova a axeciëne la itre arasi ne Lebanona.
6 Nyidrëti a asesësesën la Lebanona* tune la neköi kau,
Memine la wetr Siriona tune la neköi kau wael.
7 Iehova a ithanata jëne la itre ukahlokine eë;
8 Kola enienijëne la hnapapa hnene la nine i Iehova;
Iehova a enienijëne la hnapapa ne Kadesi.
9 Itre drube föe a hmengöhmengöne me hnaho hnene la nine i Iehova
Nge kola patre trootro la itre hnaxulu.
Ame ngöne la uma ne hmi i nyidrë, angatr a isa qaja ka hape: “Atrunyi Akötresieti jë!”
10 Iehova a mus hune la itre tim ka kaca;
Iehova la Joxu ka mus epine palua.
11 Tro kö Iehova a aegöcatrene la nöje i nyidrë.
Tro Iehova a amanathithine la nöje i nyidrë hnei tingeting.