Hnaaluene Tusi Itre Joxu
20 Ame ngöne la ijine cili, hna wezipo hnei Hezekia nge nyidrëti a troa mec. Ame hnei Isaïa perofeta nekö i Amoza hna tro troa wai nyidrë. Nge öni angeic: “Hane hi la hna qaja hnei Iehova: ‘Ahnithe jë kowe la fami ö la itre mekuna i ö tixenuë, ke tro hë eö a mec. Nge tha tro kö a loi la meci ö.’” 2 Ame la Hezekia a drenge la hna qaja, hnei angeic hna ujë kowe la ngöne uma, me thithi koi Iehova me hape: 3 “Iehova fe, eni a sipo nyipë, the thëthëhmi ni kö, ke hnenge lo hna mele nyipici koi nyipë hnene la hning ka pexej, nge hnenge hna kuca la loi qëmeke i nyipë.” Ame hnei Hezekia hna treije latresi.
4 Nge qëmekene tro Isaia a traqa kowe la götrane gaa pë ihakun e hnine la hnalapa i joxu, öni Iehova koi angeic: 5 “Bëeke hmaca jë koi Hezekia, hene la nöjeng, nge hape jë, ‘Hane hi la hna qaja hnei Iehova, Akötresi Dravita qaaqaa i ö, “Drenge hë ni la thithi ö, nge öhne hi ni la itre trenge timidra i ö. Ame enehila, tro ni a aloine la meci ö, nge thupene la köni drai, tro eö a elë kowe la hnalapa i Iehova. 6 Tro ni a nyixane la mele* i eö koi 15 lao macatre, nge tro fe ni a amele eö memine la traone celë qa ngöne la imene la joxu ne Asuria, nge tro ni a cilëgöline la traone celë pine la ëjeng, me pi Dravita hlueng.”’”
7 Thupene lai, öni Isaia ka hape: “Xome jë la gato wacua ka qaqacil.” Ame hnei angatr hna traqa fë la ca gato wacua, me atë hune la ithewek ne la joxu, ene pe, mele jë hi nyidrë.
8 Nge hnei Hezekia fe hna hnyinge koi Isaia, me hape: “Nemene la hatren ka anyipicine laka, tro Iehova a aloine la mecing, nge tro hmaca ni a elë kowe la uma i Iehova thupene köni drai?” 9 Matre öni Isaia: “Hane hi la hatrene qaathei Iehova. Ame la nyipëti a troa öhne la hatrene cili, tro hë nyipëti a atre laka, tro Iehova a eatrëne la hnei nyidrëti hna qaja. Hapeu, aja i nyipëti kö tro la iahnu hune la eskalie* a uti kowe la 10 lao hna tro waja, maine tro pena a elëne koi 10?” 10 Matre öni Hezekia: “Tha ka jole kö tro la iahnu a uti koi 10 lao hna tro waja, ngo ame göi troa elëne la 10...” 11 Ame hnei Isaia hna thithi koi Iehova, nge hnei nyidrëti hna aelëne hmaca la iahnu, hune la eskalie i Ahaza koi 10 lao hna tro waja.
12 Ngöne la ijine cili, hnei Berodaka-baladana, nekö i Baladana, joxu ne Babulona hna iupi fë tus, me ahnahna koi Hezekia, ke drenge hë angeic laka, hna pane wezipo hnei Hezekia. 13 Matre hnei Hezekia hna kapa* la itre atre ka tro fë maca, me amamai angatre la hnë ami mo i nyidrë, ene la sileva me gool, memine la oelë göti, me ketre oel ka tru thupen, me itre jia ne isi i nyidrë, me nöjei ewekë hnine la itre hnahag ne trengamo. Hnei Hezekia hna amaman asë koi angatr la aliene la uma i nyidrë, me itre ewekë ngöne la baselaia i nyidrë.
14 Thupene lai, hnei Isaia perofeta hna tro troa wai Hezekia me qaja koi nyidrë ka hape: “Nemene la hna qaja hnene la itre trahmany? Nge angatr a traqa qa kaa?” Ame hnei Hezekia hna sa ka hape: “Angatr a traqa qa ngöne la ketre nöje gaa nany ne Babulona.” 15 Matre öni Isaia ka hape: “Nemene la hnei angatr hna goeën ngöne la uma i nyipë?” Ame hna sa hnei Hezekia ka hape: “Hnei angatre hna goeën asë ngöne la umang. Nge hnenge fe hna amaman asë koi angatr la aliene la itre hnahag ne trengamo.” 16 Ame hnei Isaia hna qaja koi Hezekia ka hape: “Drenge ju la hnei Iehova joxu ne la itre trongene isi hna qaja koi nyipë: 17 ‘Troa traqa la ketre drai tro ha xom asë a tro Babulona la nöjei ewekë ngöne la uma i ö, memine la itre ewekë hna xawan hnene la itre qaaqaa i ö uti hë la drai ce. Nge pëkö ca ewekë ka troa lapa,’ öni Iehova. 18 ‘Nge tro ha xolouth me kötre fë la itre matra i ö. Tro angatr a huliwa hnine la hnalapa ne la joxu ne Babulona.’”
19 Ame hnei Hezekia hna sa koi Isaia ka hape: “Ka loi la hnei Iehova hna qaja koi ö.” Thupene lai, öni nyidrë: “Maca ka loi, ke ame ngöne la itre drai ne la meleng, tro la nöjeng a mele tingeting, me mele ka loi.”*
20 Nge ame la mele i Hezekia, me ecatre i nyidrë, me aqane xupi kesao i nyidrë, me aqane kuci jë i tim kowe la traon, hna fejan asë hnine la itre itusi ne la mele ne la itre joxu ne Iudra. 21 Ame hnei Hezekia hna meköl me itre qaaqaa i nyidrë ngöne la mec. Nge hna acili joxu Manase nekö i nyidrë, troa nyihna i nyidrë.