Deuteronomi

17 “Tha tro kö eö a huujëne koi Iehova Akötresi ö la kau maine mamoe ka hetre ethan, maine ketre engazone pena, ke celë hi ewekë ka sis koi Iehova Akötresi ö.

2 “Pane mekune jë laka, hetrenyi thei epun ngöne la ketre traon hnei Iehova Akötresi ö hna hamë eö, la ketre trahmanyi maine föe ka kuca la ngazo qëmekei Iehova Akötresi ö, nge ka ena la isisinyikeu i nyidrë. 3 Angeic a kuca la itre ewekë tha hnenge kö hna amekötin, ene la troa nyihluen me thil kowe la itre xaa haze, maine thili koi jö maine treu, me nöjei ewekë e koho hnengödrai. 4 Maine ase hë thuemacanyi lai koi ö nge drei mejene hë eö, qa i ö troa ithele hnyawa. Nge maine nyipici hi laka, hna kuca la ewekë ka sisi cili e Isaraela, 5 qa i ö troa tro fë la trahmany maine föe ka kuca la ewekë ka sisi cili ngöne la itre qëhnelö ne la traon, nge tro ha tranyi angeic hnei etë. 6 Ame la atr hna troa humuth, ke troa humuthi angeic thenge la hna anyipicin* hnene la ala lu maine ala kön. Ngo tha tro kö a humuthi angeic e casi hi la ka anyipicin. 7 Troa pane humuthi angeic hnene la iwanakoim ne la itretre anyipicin, nge pine pë hë la iwanakoime ne la nöj. Nge tro eö a apatrene la ngazo qaathei ö.

8 “Maine ame ngöne la ketre traone i ö, hetre ketre jol ka tha hmaloi kö troa amekötin, kola qaja la troa aneni madra, maine isigöline la ketre ewekë, maine hna eatrëne la ketre atr, maine ketre jole pena, tro eö a cil me tro kowe la götrane hnei Iehova Akötresi ö hna troa iën. 9 Tro hë eö a tro kowe la itre atre huuj i angetre Levi, memine la atre amekötin ka huliwa ngöne la ijine cili, matre qaja la jol, nge tro pë hë angatr a thuemacanyi ö la hna axeciën. 10 Thupene lai, tro hë eö a kuca thenge la hna axeciën, lo hnei angatr hna thuemacanyi ö ngöne la götrane hnei Iehova hna iën. Qa i ö troa kuca thenge la hnei angatr hna amekötin. 11 Tro eö a kuca thenge la wathebo hnei angatr hna troa qaja koi ö, me thenge la hnei angatr hna axeciën, nge tha tro pi kö eö a jea kowe la götrane maca me mi. 12 Ngo ame la atr ka pi tru nge ka xele ma dreng la atre huuj ka huliwa koi Iehova Akötresi ö, maine la atre iameköti, ke tro ha humuthi angeic. Qa i ö troa apatrene la ngazo qa Isaraela. 13 Nge tro hë la nöj asë a dreng me xou, matre tha tro hmaca kö a pi tru hnene la ketre atr.

14 “Ame hë la eö a troa traqa, me kapa, me lapane la nöj hnei Iehova Akötresi ö hna troa hamë eö, nge tro eö a hape: ‘Pi tro ni a acili joxung, tune la itre nöj xötreithi ni,’ 15 haawe, qa i ö troa acile la ketre joxu hna troa iën hnei Iehova Akötresi ö. Tro eö a ië angeic qaathene la itre trejin me eö, ngo tha tro kö a acil la ketre trenyiwa, ke tha trejine kö me eö. 16 Tha tro kö la joxu a thele troa tru hnei hos, me abëekëne la nöj a tro Aigupito matre hetre itre xaa hos, ke öni Iehova lo koi epun: ‘Tha tro hmaca kö epuni a xome la gojenyi cili.’ 17 Tha tro kö angeic a nyimu föe, wanga amenune pi la hni i angeic; tha tro kö angeic a thel atrune la sileva me gool. 18 Ame hë la angeic a të hune la theron ne la baselaia i angeic, tro angeic a cinyianyin thatraqai angeic la Wathebo celë ngöne la ketre itus,* ene lo wathebo hna thupën hnene la itre atre huuj thene la angetre Levi.

19 “E nöjei drai ne mele angeic, tro angeic a thupën ej me e, matre tro angeic a inin troa xoue Iehova Akötresi angeic, me metrötrën, me trongëne la nöjei trengewekë ne la Wathebo celë, me itre hna amekötin, 20 matre tha tro kö la hni i angeic a pi tru kowe la itre trejin me angeic, nge matre tha tro kö angeic a jea qa ngöne la wathebo ngöne la götrane maca maine mi. Qa ngöne lai, tro hë angeic me itre nekö i angeic a mus aqeany e Isaraela.