Angetre Amekötin

4 Thupene la mec i Ehuda, hnene hmaca la angetre Isaraela hna kuca la ngazo qëmekei Iehova. 2 Ame hnei Iehova hna nue* angatr koi Iabin joxu ne Kanana ka mus e Hazora. Sisera la tane isi i nyidrë; angeic a lapa e Haroseth Ne La Itre Nöj.* 3 Ame hnene la angetre Isaraela hna treije koi Iehova. Ke eje hi, traqa koi 900 lao ikatre i Iabin,* nge ngöne la itre wiil, hna acatrene la itre fao ka ixöj.* Nge hnei angeic hna axösisin la angetre Isaraela koi 20 lao macatre.

4 Ngöne la ijine cili, hetre perofeta föe ka ameköti Isaraela, ene Debora föi Lapidoth. 5 Hnei eahlo hna majemine lapa fen la ipama i Debora, nyipin e Rama me Bethela, ngöne la itre wetr e Eferaima. Hnene la angetre Isaraela hna majemine tro koi eahlo, matre troa atre la itre hna axeciën hnei Akötresie. 6 Ame hnei eahlo hna upe la ketre atr troa thei Baraka nekö i Abinoam, qa Kadesi-Nafatali. Nge öni eahlo jë hi koi angeic: “Hane hi la hnei Iehova Akötresi Isaraela hna amekötin: ‘Tro jë* kowe la wetre Tabora. Ce tro jë memine la 10 000 lao trahmanyi qa ngöne la lue tribu ne Nafatali me Zebulona. 7 Nge tro pë hë ni a upi Sisera koi ö, lo tane isi i Iabin, memine la itre ikatre me itre soce i angeic ngöne la hneopegejë e Kisona. E cili, tro ni a nue angeic koi ö.’”

8 Ngo sa jë hi Baraka ka hape: “Maine tro eapo a ce tro me eni, ke tro hë ni a tro. Ngo maine xele kö eapo, ke tha tro kö ni a tro.” 9 Öni eahlo e sa: “Ka loi, tro ni a ce tro me eö. Ngo ame pe, tha tro kö a atrunyi ö hnene la isi celë, ke eje hi, tro Iehova a nue Sisera kowe la ketre föe.” Ame hnei Debora hna mejë, me ce tro me Baraka a tro Kadesi. 10 Matre hnei Baraka hna hëne la itre tribu ne Zebulona, me Nafatali e Kadesi; traqa koi 10 000 lao trahmanyi ka xötrethenge angeic. Nge hnei Debora fe hna ce elë me angeic.

11 Hetre atre Keni ka trotrije la angetre Keni, Heberu la ëjen. Angeic la ketre matra i Hobaba, hmihmi* i Mose. Nge hna acil la itate i angeic ezin la sinöe ka tru e Zananim, ezi Kadesi.

12 Hna thuemacanyi Sisera ka hape, elë hë Baraka nekö i Abinoam ngöne la wetre Tabora. 13 Ame hnei Sisera hna acasin asë la 900 lao ikatre i angeic, lo ka hetre fao ka ixöj ngöne la itre wil. Ce angeic memine lo itre soc ka xötrethenge angeic qa Haroseth Ne La Itre Nöj, kowe la hneopegejë e Kisona. 14 Matre öni Debora jë hi koi Baraka: “Mejë jë, ke ijine hë tro Iehova a nue Sisera koi nyipë. Eje hi, Iehova a tro pa qëmekei nyipë.” Ame hnei Baraka hna uti qa hune la wetre Tabora, nge hna xötrethenge angeic hnene la 10 000 lao trahmany. 15 Ngo qëmeken tro Baraka a isi me angatr, hnei Iehova hna amenumenu Sisera, me itre ikatr me trongene isi i angeic asë. Thupene lai, hnei Sisera hna uti qa hun la ikatre i angeic, me kötr. 16 Nge hnei Baraka hna wej la itre ikatre me trongene isi i angatr uti hë e Haroseth Ne La Itre Nöj. E cili, hna humuth asë la trongene isi i Sisera hnei taua; pëkö ca ka mel.

17 Ngo ame kö Sisera, hnei angeic hna kötr kowe la itate i Iaela, föi Heberu atre Keni. Ke ka mele tingetinge Iabin joxu ne Hazora, memine la fami i Heberu. 18 Matre hnei Iaela hna tro troa ixelë me Sisera, me hape: “Joxu, lö jë! Trohemi, nge the xou kö.” Ame hnei Sisera hna lö kowe la itate i angeic, nge hnei angeic hna sitrë nyidrë. 19 Öni Sisera jë hi: “Pane thue imenge tim, ke eni a pi ij.” Ame hnei Iaela hna fe la ketre trengene* melek, me thue ime i nyidrë, me sitrë nyidrëti hmaca. 20 Nge öni nyidrëti hmaca jë hi: “Cile ju ngöne la hnë lö, nge e traqa ju hnyingë nyipo ka hape: ‘Hetre atre kö e ce?’ Tro nyipoti a sa ka hape: ‘Pëkö!’”

21 Ngo hnei Iaela pe föi Heberu, hna xom la ketre fao qa ngöne la itat, memine la ketre hama. Nge ame hë la Sisera a meköle thatre, hnei Iaela hna easenyi nyidrë, me tro thaup, matre jei faon la hnaqathë i nyidrë e kuhu hnadro. Celë hi la aqane mec i nyidrë.

22 Ame hna traqa pi hnei Baraka, lo ka weji Sisera. Matre hnei Iaela hna tro troa ixelë me angeic, me hape: “Jë fe, matre tro ni a amamai nyipë la atr hnei nyipëti hna thel.” Ame la angeic a lö kowe la itate i eahlo, ke öhnyi Sisera ju hi angeic memine la fao ka catr ngöne la hnaqathë i nyidrë.

23 Celë hi lai aqane kuca i Akötresie, matre tro la angetre Isaraela a ngaa Iabin joxu ne Kanana. 24 Hnene la angetre Isaraela hna isi me Iabin joxu ne Kanana, nge catrehnine catr la isi i angatr, uti hë la angatr a humuthi nyidrë.