Salamo
Thatraqane la atre jumi traem. Salamo i Dravita. Nyima.
68 Epi tro Akötresieti a mejë, nge loi e isa ije pi la itre ithupëjia me nyidrë,
Nge epi tro la itre ka methinë nyidrë a kötr qëmekei nyidrë.
2 Tune la so ne eë hna ufetrij, epi tro nyipëti a helë angatr;
Tune la sir hna ahmun hnei eë,
Loi e troa patre la itre atr ka ngazo qëmekei Akötresie.
3 Ngo loi e troa madrine la itre ka meköt;
Epi tro angatr a sesë hnei madrin qëmekei Akötresie;
Epi tro angatr a sue madrin.
4 Nyima* jë koi Akötresie; atrune jë la ëje i nyidrë jëne la itre nyima.
Nyima jë kowe la Atre nyinyapëne la itre hnapapa.*
Ia* la ëje i nyidrë! Madrine jë qëmekei nyidrë!
5 Ame Akötresie ngöne la uma ka hmitrötr i nyidrë
Ke nyidrëti la keme ne la itre nekön hna mecitrij hnei kem, me atre thupëne* la itre sine föe.
6 Akötresieti a hamë hnalapa ne la itre ka lapa cas;
Nyidrëti a nue la itre hna akalabusin me atrenamo angatr.
Ngo tro pe la itre ka pi tru* a lapane la gaa qaqacil.
7 Akötresieti fe, ame lo nyipëti a xomiujine* la nöje i nyipë,
Me tro nyipine la hnapapa, (Sela)
8 Hna hmengöhmengöne la ihnadro;
Hna trotro la mani qa hnengödrai hnei Akötresie;
Hna enienije la Sinai hnei Akötresie, lo Akötresi Isaraela.
9 Akötresieti fe, hnei nyipëti hna upe la mani atraqatr;
Hnei nyipëti hna aegöcatrene la nöje* i nyipë ka kucakuca.
10 Hnei angatr hna lapa ngöne la itre itate i nyipë;
Akötresieti fe, ngöne la ihnim* i nyipë, hnei nyipëti hna hamëne la ka ijij kowe la itre ka pë ewekë.
11 Iehova a amekötin la ketre ewekë kowe la nöje i nyidrë;
Ame la itre föe ka tro fë trongëne la maca ka loi, ke trongene isi ka tru.
12 Kola ikötrenyi la itre joxu ne la itre trongene isi, angatr a ikötreny!
Ame la föe ka lapa hnalapa, hetre edrö i angeice fe qa ngöne la hna thapa.
13 Hnei epuni hna meköl xötreithe la itre eë ne la lapa,*
Ngo e cili, tro epuni a xöl la ketre piny ka hetre iapen hna heetrën hnei sileva,
Me itre pune iap hna peleth hnei nyipi gool.*
14 Ame lo kola isa ijene la itre joxu ne la nöje* ce hnene la Ka Tru Trenge Men,
Hna trotro la kiona e Zalemona.
15 Wetre* i Akötresieti la wetre Basana;
Wetre ka nyimu hene la wetre Basana.
16 Hnauëne laka, epun itre wetr ka nyimu hen,
A goeën me piin la wetr hnei Akötresieti hna iën* troa mele ngön?
Eje hi, tro Iehova a lapan ej epine palua.
17 Itre milio lao ikatre i Akötresie, nyimutre catr itre ej matre thatreine kö troa e la etrun.
Traqa ha Iehova qa Sinai ngöne la hnë ka hmitrötr.
18 Elë hë nyipëti ngöne la itre gaa draië;
Ia fe Akötresie, hnei nyipëti hna traqa fë la itre hna kötre fë;
Hnei nyipëti hna xome la itre atr ceitu me itre ahnahna,
Nge uti fe hë la itre ka pi hun, matre lapa nyipi angatr.
19 Atrunyi Iehova jë, ke nyidrëti a thue la itre ehnefe së o drai,
Ene lo nyipi Akötresie atre amele së.* (Sela)
20 Ame la nyipi Akötresie, ke Akötresieti ne iamele;
Nge ame Iehova Joxu Ka Sisitria, nyidrëti la atre thepe së qa ngöne la mec.
21 Eje hi, tro Akötresie a thë la he ne la itre ithupëjia me nyidrë,
22 Öni Iehova: “Tro ni a bëeke sai angatr qa Basana;
Tro ni a traqa sai angatr qa ngöne la itre gaa jui ne la hnagejë,
23 Matre troa hnea la waca i ö ngöne la madra ne la itre ithupëjia me eö
Nge tro la thinem ne la itre kuli ö a hadrum la madra i angatr.”
24 Akötresieti fe, angatr a goeëne la itre tronge i nyipë,
Kola tro kowe la hnë ka hmitrötr hnene la itre trongene la Akötresing, me Joxung.
25 Kola tro pa la itre ka nyima, nge kola ixötrethenge hnene la itre ka elone la itre nyine elo miuzik ka hetre filen;
Itre nekö jajiny a lepelepe la itre itrapë nyipi angatr.
26 Atrunyi Akötresieti jë ngöne la icasikeu ne la nöjei atr;
Atrunyi Iehova jë epun, itre ka fetra qaathene la Keme i Isaraela.
27 Beniamina la ka co, ngo angeic a musinë angatr,
Itre nekö i joxu ne Iudra memine la ka ala nyimu ka tru mejen,
Me itre nekö i joxu ne Zebulona me itre nekö i joxu ne Nafatali.
28 Hnene la Akötresi ö hna amekötine laka, tro hë eö a catr.
Amamane pi la trengecatre i nyipë Akötresieti fe, tune lo aqane kuca i nyipëti koi hun.
29 Tro hë la itre joxu a traqa fë la itre ahnahna,
Kowe la uma ne hmi i nyipë e Ierusalema.
30 Hajine ju la itre öni wael ngöne la itre rozo,
Memine la itro kau trahmany me itre nekön,
Uti hë la tro la itre nöj a thil me traqa fë* sileva.
Aisa ijene pi la itre nöj ka pi isi.
31 Tro ha traqa fë* qa Aigupito la itre ewekë kopa;
Tro Kuza a canga tro fë ahnahna koi Akötresie.
32 Itre baselaia ne la fene hnengödrai fe, nyima* jë koi Akötresie,
Nyima atrunyi Iehova jë, (Sela)
33 Lo Atre nyinyapëne la itre hnengödrai qaane lo itre drai ekö.
Goeën! Kola ulil la nine i nyidrë, la nine i nyidrëti ka catr.
34 Atrune jë la trengecatre i Akötresie.
Ke eje hui Isaraela la esisitria i nyidrë,
Nge mene i nyidrë ngöne la itre iaw.
35 Akötresieti la hna xouen ngöne la uma ne hmi ka hmitrötre i nyidrë.*
Akötresi Isaraela,
La ka hamë men me trengecatr kowe la nöj.
Atrunyi Akötresieti jë.