Hnaaluene Tusi Itre Joxu
2 Ngöne la ijine Iehova a troa aelë Elia e koho hnengödrai, nyipine la itre enyi ka catr, Elia me Elisaia a tro qa Gilegala. 2 Öni Elia jë hi koi Elisaia ka hape: “Eni a sipo eö, pane lapa ju e celë, ke hnei Iehova hna upi ni a tro Bethela.” Ngo sa jë hi Elisaia ka hape: “Qëmeke i Iehova Akötresie ka mel, me qëmeke i nyipë, tha tro kö ni a nue nyipë.” Matre nyidroti a ce tro ju a tro Bethela. 3 Nge hnene la itre nekö i perofeta ka lapa e Bethela, hna tro koi Elisaia me hape: “Atre hë eö laka, tro Iehova a xom enehila la maseta i ö, nge tha tro hmaca kö nyidrëti a musi koi ö?” Nge sa jë hi Elisaia ka hape: “Atre hi ni, the ithanata hmaca kö.”
4 Thupene lai, öni Elia koi Elisaia: “Eni a sipo eö, pane lapa ju e celë, ke hnei Iehova hna upi ni a tro Ieriko.” Ngo sa jë hi Elisaia ka hape: “Qëmeke i Iehova Akötresie ka mel, me qëmeke i nyipë, tha tro kö ni a nue nyipë.” Matre nyidroti a ce tro ju a tro Ieriko. 5 Ame hnene la itre nekö i perofeta ka lapa e Ieriko, hna tro koi Elisaia me hape: “Atre hë eö laka, tro Iehova a xom enehila la maseta i ö, nge tha tro hmaca kö nyidrëti a musi koi ö?” Nge sa jë hi Elisaia ka hape: “Atre hi ni, the ithanata hmaca kö.”
6 Thupene lai, öni Elia koi Elisaia ka hape: “Eni a sipo eö, pane lapa ju e celë, ke hnei Iehova hna upi ni troa tro ezine la hneopegejë Ioridrano.” Ngo sa jë hi Elisaia ka hape: “Qëmeke i Iehova Akötresie ka mel, me qëmeke i nyipë, tha tro kö ni a nue nyipë.” Matre nyidroti a ce tro ju. 7 Ngo hnene la 50 lao nekö i perofeta hna xötrethenge nyidro. Matre ame ju hi la Elia me Elisaia a cile ezine la hneopegejë Ioridrano, itre nekö i perofeta a goeë nyidro qa gaa nany. 8 Ame hnei Elia hna xome la iheetre* i angeic, me ewath troa hna kowe la tim. E cili, hna thawaluëne la hneopegejë koi götrane mi me maca. Nge nyidroti a tro ju ngöne la gaa weliwel.
9 Ase jë hi nyidroti sasaithe la hneopegejë, öni Elia koi Elisaia ka hape: “Nemene la nyine tro ni a kuca koi ö, qëmekene tro nyiso a isa ije?” Sa jë hi Elisaia ka hape: “Epi tro nyipë a hamë ni la lue tulu ne ua hnei Akötresie hna hamë nyipë.” 10 Öni Elia jë hi: “Ka jole la sipo i ö. Ngo maine tro eö a öhne la kola xomi ni, tro ha kapa la sipo i ö, ngo maine pëkö, tha tro kö eö lai a kapa.”
11 Nge nyidroti pala kö a tro me porotrike trootro, ame hna xulu la ketre ikatr eë, me itre hoos eë troa isa ije nyidro. Nge hna aelë Elia e koho hnengödrai nyipine la itre enyi ka catr. 12 Nge Elisaia a goe me sue ka hape: “Ekölöini kaka, kaka! ikatre i Isaraela, me itre ka ti hoos!” Matre ame hë la Elia a patr, Elisaia a kuie zezene pi la iheetre i angeic. 13 Nge kola meköl e kuhu hnadro la iheetre i Elia, matre Elisaia a hleme ju, me bëek ezine la hneopegejë Ioridrano. 14 Ame hnei Elisaia hna lepe la tim memine la iheetre i Elia, me hape: “Ekaa Iehova la Akötresi Elia?” Nge ame hë la angeic a lepe la tim hnene la iheetr, hna thawaluëne la hneopegejë koi götrane mi me maca. Matre Elisaia a sasaithe pi la hneopegejë.
15 Nge kola cile goeën qa gaa nanyi hnene la itre nekö i perofeta, lo itre ka lapa e Ieriko. Matre öni angatr: “Thei Elisaia ha lo ua ka eje thei Elia.” Nge angatr a tro ju koi angeic, me sa iwatingöneca me thil. 16 Nge öni angatr: “The huni la 50 lao trahmanyi ka catr, matre pane nue angatre pi troa thele la maseta i nyipë. Ke maine jë, hnene la ua* i Iehova hna xepi nyidrë, me tro sai nyidrë hune la ketre wetr, maine ketre hnathup.” Ngo sa jë hi Elisaia ka hape: “The upi ketre kö troa thele nyidrë.” 17 Ngo angatre pala hi a catre fë mekun, uti hë la kola hmahma hnei Elisaia. Matre öni angeic: “Nga öi hö, upi angatre jë.” Matre angatr a upe jë la 50 lao trahmany, nge traqa koi köni drai ne ithel, ngo tha öhnyi Elia kö hnei angatr. 18 Matre ame hë la angatr a bëeke koi Elisaia, angeice pena ha e Ieriko. Öni angeice jë hi: “Ase hë ni lo qaja koi epun ka hape, the iupi ketre kö troa thele nyidrë.”
19 Nge ame hë e thupen, hnene la itre atrene la traon hna qaja koi Elisaia ka hape: “Öhne hi nyipë maseta, lolo catre la göhnene la traone hun. Ngo tha loi kö la tim, matre tha hame* kö la nöj.” 20 Nge sa jë hi angeic ka hape: “Awe jë la ketre neköi kap ka hnyipixe, nge nei sotrene ju.” Matre angatr a traqa fë pi la kap koi Elisaia. 21 Nge angeic a elë jë kowe la qeqe ne tim, me kuië sotr, me hape: “Hane hi la hna qaja hnei Iehova, ‘Hnenge hna aporopëne la timi celë, tha tro hmaca kö ej a axulune la mec, nge tha tro hmaca kö a uthithi la itre upune.’” 22 Nge uti pala hi enehila, lolo pala hi la tim, tune lo hna qaja hnei Elisaia.
23 Thupene lai, hnei Elisaia hna bëeke hmaca e Bethela. Nge ngöne la gojeny, hetre itre nekönatr trahmany ka tro qa ngöne la traon, matre angatr a nyiqane hnyimasai angeice jë, me hape: “Pahe elë jë! Elë jë!” 24 Ame hnei Elisaia hna tha ujë, me goeë angatr, me eji angatr ngöne la ëje i Iehova. Nge xulu pi hi la lue bea qa ngöne la hnaxulu, nge nyidroti a heje thaitrëne ju la 42 lao nekönatr. 25 Nge qa ngöne la götrane cili, Elisaia a tro ju kowe la wetre Karemela, me bëek a tro Samaria.