Levitiko

8 Nge öni Iehova hmaca koi Mose, ka hape: 2 “Xomi Arona jë me itre nekö i angeic, me itre iheetr, memine la oel nyine iën,* me kau nyine huuj ne la ngazo, me lue mamoe trahmany, me ca trenge falawa ka pë levenen, 3 nge icasikeune jë la nöj asë, ngöne la hnë lö ne la itat ne icasikeu.”

4 Ame hnei Mose hna kuca thenge la hnei Iehova hna ahnithe koi angeic. Nge hnene la nöj asë hna icasikeu ngöne la hnë lö ne la itat ne icasikeu. 5 Matre öni Mose jë hi kowe la nöj: “Hane hi la hnei Iehova hna ahnithe koi së.” 6 Ame hnei Mose hna hë Arona me itre nekö i angeic, me sië angatr hnei tim. 7 Thupene lai, hnei Mose hna heetrë Arona hnene lo iheetre ka qea, me hnöthe la otrene* hni ngöne la gö i angeic, me heetrë angeic hnene lo ikotr ka qea nge ka pë imen, me afenane la iefoda,* me acatren ej hnene la otren hna el, matre tha tro kö ej a enienij. 8 Ase jë hi lai, hnei Mose hna afena Arona hnene la nyine he imano ne iameköti,* me amë la Urim me Tumim* e hnine la nyine he imano ne iameköti. 9 Nge hna petrë angeic hnene la nyine atu he, me amë qëmeken ej la sine gool ka melemel, nyine hatrene ka hmitrötr,* tune la hnei Iehova hna ahnith koi Mose.

10 Matre hnei Mose pë hë hna xome la oel nyine iën me siëne la uma maano, me nöjei ewekë asë e kuhu hnin, matre troa ahmitrötrën* itre ej. 11 Nge hnei angeic hna a 7 lao thathane* la ita ne huuj hnene la oele cili, me siën la ita ne huuj, memine la itre ewekën ej, memine la trepene tim me trepen ej, matre troa ahmitrötrën itre ej. 12 Thupene lai, hnei angeic hna nenge la sine la oel nyine iën hune la he i Arona, me sië angeic matre ahmitrötrë angeic.

13 Ame hnei Mose hna hë Arona me itre nekö i angeic, me heetrë angatr hnene la itre iheetr ka qea, me hnöthe la itre otren ngöne la gö i angatr, me petrëne la itre he i angatr, tune la hnei Iehova hna ahnithe koi Mose.

14 Thupene lai, hnei angeic hna tro fë la kau ne la huuj ne ngazo, nge hnei Arona me itre nekö i angeic hna atë la itre wanakoime i angatr hune la he ne la kau, nyine huuj ne ngazo. 15 Ame hnei Mose hna humuthe la kau, me xome la madra ngöne la hene wanakoime i angeic, matre köl hune la itre jian ne la ita ne huuj. Nge hnei angeic hna ahmitrötrëne* la ita ne huuj, me nenge la munëne madra fene la ita ne huuj, matre ahmitrötrën ej me kuca la huuj ne ialoinekeun hune la ita ne huuj. 16 Thupene lai, hnei Mose hna xom asë la igiris ka fedr kowe la trenge xel, memine la igiris ka heetrëne la idre, memine la lue wene thulumat me girisine lue ej, matre huhajin itre ej hune la ita ne huuj. 17 Ngo ame asë hi la itre igötranene la kau ka lapa pe, ene la ikupein, me ijön, me agetrinen, hnei angeic pë hë hna dreuthetrij tröne la lapa, tune lo hnei Iehova hna ahnith koi Mose.

18 Thupene lai, hnei angeic hna tro fë la mamoe trahmany nyine huuj ne dreuth asë, nge hnei Arona me itre nekö i angeic hna atë la itre ime i angatr hune la he ne la mamoe trahmany. 19 Matre hnei Mose hna humuth ej, me thathane la madran ej ngöne la itre götranen la ita ne huuj. 20 Nge hnei Mose hna thë la mamoe trahmanyi thenge la itre hnepe götran ej, me huhajin la hen ej, me itre naean, memine la giris ka heetrëne la lue wene thulumat. 21 Nge hnei Mose hna wasin hnei tim la itre ixelen ej, me itre wacan ej, nge hnei angeic hna huhajin asë la mamoe trahmanyi hune la ita ne huuj. Celë hi huuj ne dreuth asë ka pui loi koi Iehova. Celë hi huuj ne eë koi Iehova, tune la hnei Iehova hna ahnith koi Mose.

22 Thupene lai, hnei angeic hna tro fë la hnaaluene mamoe trahmany, ene la mamoe trahmany nyine acile la itre atre huuj. Nge hnei Arona me itre nekö i angeic hna atë la itre ime i angatr hune la he ne la mamoe trahmany. 23 Matre hnei Mose hna humuth ej, me xome la madran ej nyine köl la cane hnangenyë maca i Arona, memine la pane hene wanakoime maca i angeic, me pane hene wanakoca maca i angeic. 24 Ame hnei Mose hna hëne la itre nekö i Arona, me xome la madra ne la öni matre köl la cane la hnangenyë maca i angatr, memine la pane hene wanakoime maca i angatr, me pane hene wanakoca maca i angatr. Nge hnei Mose hna thathane la madra ka lapa pe ngöne la itre götrane la ita ne huuj.

25 Nge hnei angeic hna xom asë la igiris, ene la igiris ka eje ngöne la pun, memine la igiris ka heetrën la trenge xel, memine la igiris ka heetrën la idre, memine la lue wene thulumat me igirisine lue ej, memine la inaea maca. 26 Nge qa ngöne la trengene falawa ka pë levenen, hnei angeic hna xom qëmekei Iehova la ketre falawa kösë korona nge ka pë levenen, me ca falawa kösë korona hna oelën, me ca areto. Ame hnei angeic hna atë itre ej hune la itre igiris, me hune la inaea maca. 27 Hnei angeic hna amë asë la itre ewekë cili hune la lue iwanakoime i Arona, me iwanakoimene la itre nekö i angeic, me nango jum, nyine huuj ne jumejum qëmekei Iehova. 28 Ame hnei Mose hna xom qa ngöne la itre wanakoime i angatr, me huhajin itre ej ngöne la ita ne huuj, hune la huuj ne dreuth asë. Celë hi huuj ka pui loi nyine acile la itre atre huuj. Celë hi huuj ne eë koi Iehova.

29 Nge hnei Mose hna xome la imano ne la öni me jumejum ej, nyine huuj ne jumejume qëmekei Iehova. Nge ame la igötranene cili ne la mamoe trahmanyi nyine acile la itre atre huuj, ke thatraqai Mose, tune la hnei Iehova hna ahnith koi Mose.

30 Nge hnei Mose hna xome la sine la oel nyine iën, memine la sine la madra qa ngöne la ita ne huuj, me thathan hui Arona me itre iheetre i angeic. Nge thupene lai, kowe la itre nekö i angeic me itre iheetre i angatr. Celë hi aqane ahmitrötrë Arona memine la itre iheetre i angeic, memine la itre nekö i angeic me itre iheetre i angatr.

31 Nge hnei Mose hna qaja koi Arona me itre nekö i angeic ka hape: “Atrone jë la mitr ngöne la hnë lö ne la itat ne icasikeu, nge tro epuni a xeni e cili memine la falawa qa hnine la trengen,* tune la hna ahnithe koi ni ka hape: ‘Qa i Arona me itre nekö i angeic troa xen itre ej.’ 32 Nge ame la munëne mitr me falawa, tro pë hë epun a dreuth. 33 Tha tro kö epuni a tro qa ngöne la hnë lö ne la itat ne icasikeu koi 7 lao drai, uti hë la kola pexeje la itre drai ne acili epun ngöne la hnëqa i epun, ke 7 lao drai ne troa acili epun ngöne la hnëqa ne atre huuj.* 34 Ame la hnei Iehova hna amekötin koi së troa kuca, ke celë hi hne së hna kuca enehila, nyine he la itre ngazo i epun. 35 Tro epuni a lapa koi 7 lao drai e lai me jidr, ngöne la hnë lö ne la itat ne icasikeu. Nge tro epuni a kuca la hnëqa i epun koi Iehova, matre tha tro kö epuni a mec, ke celë hi ewekë hna ahnithe koi ni.”

36 Ame hnei Arona me itre nekö i angeic hna kuca asë la hna ahnith hnei Iehova, jëne Mose.