Hnaaluene Tusi Itre Joxu

23 Nge hnene la joxu hna hën asë la itre qatr ne Iudra me Ierusalema. 2 Nge nyidrëti a ce elë jë kowe la uma ne hmi Iehova me itre trahmanyi ne Iudra, me itre atrene Ierusalema, me itre atre huuj, me itre perofeta, memine la nöj asë, qane la ka co uti hë la ka tru. Nge nyidrëti a e asë jë koi angatr la tusi Wathebo hna öhn hnine la uma ne hmi Iehova. 3 Hnene la joxu hna cil ezine la ipoto, me kuca la ketre isisinyikeu qëmeke i Iehova. Hnei nyidrëti hna sisinyi* troa drengethenge Iehova hnene la hni me mele i nyidrë ka pexej, me trongën asë la itre wathebo, me itre hna amekötin, me itre hna amekunën hnei Akötresie, thenge la hna cinyianyin hnine la tus. Ame hnene la nöj asë hna kapa la isisinyikeu.

4 Thupene lai, hnene la joxu hna upi Hilekia atre huuj ka sisitria, me itre atre huuj ka ixatua, me itre ka thupë qëhnelö, troa xometrije qa ngöne la uma ne hmi Iehova, la nöjei ewekë hna kuca koi Baala, me kowe la sine feni ka hmitrötr, me kowe la itre ewekë ne hnengödrai.* Nge nyidrëti a dreuth asë jë e tröne Ierusalema, ngöne la itre hlapa ne la Hnathup e Kederon, me tro fë la hnatresij a tro Bethela. 5 Nge nyidrëti a helëne pi la itre atre huuj ne la itre haze trenyiwa, lo itre hna acil hnene la itre joxu ne Iudra ekö. Hna acili angatr troa huhajine la itre huuj, hune la itre hnë hmi gaa hmitrötr ne la itre traon ne Iudra, me xötreith e Ierusalema. Hnei nyidrëti fe hna helëne la itre hna acil troa huhajine la itre huuj koi Baala, me kowe la jö, memine la treu, me itre fini wëtresij, me nöjei ewekë ne hnengödrai. 6 Nge nyidrëti a xometrije pi la sine feni ka hmitrötr qa hnine la uma ne hmi Iehova, me tro fë tröne Ierusalema, ngöne la Hnathup ne Kederon, me dreuthetrij ej uti hë la kola nyi hnatresij. Nge nyidrëti a kuiëne pi la hnatresij hune la itre hua ne la itre atrene la nöj. 7 Nge hnine la uma ne hmi Iehova, hnei nyidrëti hna thëtrij la itre hnahag ne la itre trahmany ka salemë ngönetrei göi hmi, hmekune la götrane hna ca itat hnene la itre föe. Nge hna huliwane la itre itate cili nyine kuci hnë hmi kowe la sine feni ka hmitrötr.

8 Nge nyidrëti a helëne pi qa Iudra la nöjei atre huuj, me angazone la itre hnë hmi gaa hmitrötr, qaane Geba uti hë Bere-seba, lo hnei angatr hna majemine huhajine la itre huuje i angatr. Nge hnei nyidrëti fe hna thëtrije la itre hnë hmi gaa hmitrötr* ngöne la hnë lö i Iosua, tane la traon. Itre ej ngöne la götrane mi, la kola lö ngöne la qëhnelö ne la traon. 9 Nge ame la itre atre huuj ne la itre hnë hmi gaa hmitrötr, ke tha ijiji angatre kö troa hmi ngöne la ita ne huuje i Iehova e Ierusalema. Ngo ijiji angatre pe troa ce xen me itre trejin me angatr, la falawa ka pë levenen. 10 Nge hnei nyidrëti fe hna angazone la götrane Tofet, hmekune la Hnathup Ne La Itre Nekö i Hinom,* matre tha tro hmaca kö a dreuthe la itre nekönatr koi Moleka, itre trahmanyi me jajiny. 11 Nge ame ekö, hnene la itre joxu ne Iudra hna hamëne la itre hos nyine hmi kowe la jö. Matre hnei Iosea hna wathebone tro la itre hos a lö hnine la uma ne hmi Iehova, qa ngöne* la hnahage* i Nathana-meleka, ketre atr ka huliwa koi joxu. Nge ame la hnahage cili, ke hna kuca ngöne la itre poretiko.* Nge hnei nyidrëti fe hna dreuthetrije la itre ikatr thatraqane la jö. 12 Ame hnene la joxu hna thëtrije la itre ita ne huuj hna kuca hnene la itre joxu ne Iudra ekö, hune la hnahage i Ahaza e koho hune uma. Nge nyidrëti a thëtrije pi la itre ita ne huuj hnei Manase hna acil, ngöne la lue götrane gaa pë ihakun ne la uma ne hmi Iehova, me anyilanyilan, me kuiëne la xaxau ngöne la hnathup ne Kederon. 13 Nge hnene la joxu hna angazone la itre hnë hmi gaa hmitrötr ka qëmeke koi Ierusalema, ngöne la götrane kolojë* ne la Wetr Ne Apatren.* Hna xupe la itre hnë hmi cili, hnei Solomona joxu ne Isaraela koi Aseira, haze föe ka sisi ne la angetre Zidona, me koi Kemosa, haze ka sis i Moaba, me koi Milekoma, haze ka sisi i angetre Amona. 14 Nge hnei nyidrëti hna thëtrije la itre ipoto etë ka hmitrötr, me sa la itre sine feni ka hmitrötr, me heetrëne la göhnen hnei itre jun atr. 15 Nge nyidrëti a thëtrije pi fe la ita ne huuj e Bethela, memine la hnë hmi gaa hmitrötr hna xup hnei Ieroboama nekö i Nebata, lo ka akeinyi Isaraela kowe la ngazo. Thupene la hna thëtrije la ita ne huuj cili, memine lo hnë hmi gaa hmitrötr, hnei nyidrëti hna manithe la hnë hmi cili, uti hë la kola nyi hnatresij. Nge nyidrëti a dreuthetrije pi la sine feni ka hmitrötr.

16 Matre ame hë la Iosea a xei, hnei nyidrëti hna öhne la itre hua hune la wetr. Nge nyidrëti a upe pi troa jele la itre jun atr qa hnine la itre hua, me dreuth hune la ita ne huuj, matre tha tro hmaca kö ej a hmitrötr kowe la hmi. Celë hi matre eatre jë lo hnei Iehova hna qaja jëne lo atre ne la nyipi Akötresie, ka perofetane la itre ewekë cili. 17 Nge öni nyidrë: “Eni a öhne la ketre hua e koilo, drei la hna kelem e cili?” Nge sa jë hi la itre atrene la traone ka hape: “Kolo atre ne la nyipi Akötresie ka traqa qa Iudra, nge ka perofetane la itre ewekë ka troa traqa kowe la ita ne huuj ne Bethela, ene la itre ewekë hnei nyipëti hna kuca.” 18 Matre öni nyidrë: “Tha tro kö a ketr la itre june i angeic. Nue pi kö e cili.” Haawe, tha jele ju kö la itre trahmanyi la itre june ne la perofeta, me itre jun ne la perofeta ka traqa qa Samaria.

19 Nge hnei Iosea hna apatrene fe la itre uma hmitrötr ne la itre hnë hmi gaa hmitrötr, lo hna acil ngöne la itre traon ne Samaria. Hnene lo itre joxu ne Isaraela ekö hna acil itre ej, matre amejëne la trenge hni Akötresie. Nge casi hi la aqane apatrene Iosea la itre hnë hmi cili, memine la hnë hmi gaa hmitrötr ne Bethela. 20 Ame hnei nyidrëti hna huujëne hune la itre ita ne huuj, la itre atre huuj ka huliwa ngöne la itre hnë hmi gaa hmitrötr. Nge nyidrëti a dreuthe ju fe la itre jun atr, me bëeke hmaca a tro Ierusalema.

21 Ame hnene la joxu hna amekötin kowe la nöj asë ka hape: “Feetëne jë la Paseka koi Iehova Akötresi epun, thenge lo hna cinyianyin hnine la itusi ne isisinyikeu.” 22 Matre pëkö paseka hna atrune tune la paseka celë, qaane lo ijine ne la itre atre amekötin e Isaraela,* me ngöne la ijine la itre joxu ne Isaraela me Iudra. 23 Hna atrune la paseka cili koi Iehova e Ierusalema, hmekune la kola 18 lao macatre ne mus i Iosea.

24 Hnei Iosea hna apatrene qa ngöne la nöj la itre ka ithanata me itre ka mec, me itre ka qajaqaja la drai elany, memine la itre idrola ne la itre haze ne fami, me itre idrola ka sis,* memine la nöjei ewekë ka sis ka mama ngöne la nöje Iudra, me e Ierusalema. Hnei nyidrëti hna ujë tun, matre metrötrëne la itre Wathebo hna cinyianyin hnine la itus hna öhn hnei Hilekia atre huuj, ngöne la uma ne hmi Iehova. 25 Thene lo itre joxu ka pane mus, pëkö ka tui Iosea, ka bëeke koi Iehova hnene la hni ka pexej, me mele i angeic ka pexej, me trengecatre ka pexej, thenge la nöjei Wathebo i Mose. Nge thupei Iosea, pëkö ka tui nyidrë.

26 Ngo tha upu kö la elëhni Iehova koi Iudra, ke hna jele la trenge hni nyidrë hnene la nöjei ngazo hnei Manase hna kuca, matre aelëhni nyidrë. 27 Matre öni Iehova: “Tro fe ni a apatrenyi Iudra qëmekeng, tune lo hnenge hna kuca koi Isaraela. Nge tro ni a triji Ierusalema, lo traon hnenge hna iën, memine lo uma hnenge hna qaja ka hape, ‘E cili hi la ëjeng.’”

28 Nge ame la mele i Iosea memine la nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 29 Ame ngöne la ijine mus i Iosea, hnei Farao Neko, joxu ne Aigupito, hna tro troa itrony memine la joxu ne Asuria ezine Euferate. Nge hnei Iosea hna uti troa isi me Farao, nge ame ju hi la Farao a öhnyi Iosea ezin e Meguido, hnei nyidrëti hna humuthi Iosea. 30 Matre hnene la itre atre i joxu hna bëeke fë hune ikatr, la ngönetrei i Iosea qa Megido a tro Ierusalema. Nge angatr a kelemi nyidrëti ju hnine la hua i nyidrë. Nge hnene la itre atrene la nöj hna acili joxu Iehoaza nekö i Iosea, troa nyihnane la keme i nyidrë.

31 Nge traqa koi 23 lao macatre i Iehoaza lo kola acili joxu nyidrë. Hnei nyidrëti hna musi koi köni treu e Ierusalema. Hamutala la ëjene la thine i nyidrë. Nge eahlo la nekö i Ieremia qa Libena.

32 Hnei nyidrë hna kuca la ngazo koi Iehova, itre ewekë ka ngazo hna kuca hnene lo itre qaaqaa i nyidrë. 33 Nge hnei Farao Neko, hna akalabusi nyidrë e Ribela, ngöne la nöje Hamoth, matre sewe nyidrë troa mus e Ierusalema. Ame hnei Neko hna amekötine kowe la nöj troa kuiëne la 100 lao talane* sileva, me ca talane gool. 34 Ketre, hnei Farao Neko hna acili joxu Eliakima nekö i Iosea, troa nyihnane la keme i nyidrë. Nge hnei Neko hna saze la ëje i Eliakima, koi Iehoiakima. Nge ame pena Iehoaza, hnei Neko hna xomi nyidrë a tro Aigupito, nge hnei nyidrëti hna meci e cili. 35 Hnei Iehoiakima hna hamëne la sileva me gool hna athip hnei Farao, ngo hnei nyidrëti pe hna athipi thupene kowe la nöj, matre atreine jë nyidrëti kuiëne la mani* koi Farao Neko. Hnei Iehoiakima hna isa athip kowe la itre atrene la nöj, la etrun sileva me gool nyine kuiën koi Farao.

36 Traqa koi 25 lao macatre i Iehoiakima lo kola acili joxu nyidrë. Hnei nyidrëti hna musi koi 11 lao macatre e Ierusalema. Zebuda la ëjene la thine i nyidrë. Nge eahlo la nekö i Pedaia qa Ruma. 37 Hnei nyidrë hna kuca la ngazo koi Iehova, tune lo itre ewekë ka ngazo hna kuca hnene lo itre qaaqaa i nyidrë.