Iona
1 Hane hi la trengewekë i Iehova koi Iona,* nekö i Amitai: 2 “Cile jë, tro jë e Nineve lo traone ka tru, nge tro fë jë la maca ne iameköti, ke traqa ha kowe la lue hnangenyënge la aqane iakötrë i angeic.”
3 Ngo hnei Iona hna mejë me kötre Iehova a tro Tasesa. Hnei angeic hna uti e Iopa, me öhn e cili la ketre he ka tro Tasesa. Thupene la hna nyithupene la pases i angeic, hnei angeic hna ce tro me angatr a tro Tasesa, matre tro ananyi Iehova.
4 Ame hnei Iehova hna amejëne la ketre enyi ka catr kowe la hnagejë, matre xulu pi hi la wene ka catrehnin, nge kola ha troa lö la he. 5 Tru catre pi hë la hna xou hnene la itre ka huliwa hun la he, matre hnei angatr hna isa hëne la itre haze i angatr, me kuiënetrij la itre ewekë matre ahmaloeëne la he. Ngo ame Iona, hnei angeic hna uti troa saaju me hmulizië e kuhu hnine la he. 6 Nge hnene la kapiten hna easenyi angeic me hape: “Hnauëne la eö a meköl? Mejë jë, nge thithi ielene jë la Akötresi ö! Maine jë, tro la nyipi Akötresie a meku së, nge tha tro kö sa mec.”
7 Thupene lai, hnene la itre ka huliwa hune la he hna iqajakeun ka hape: “Tro sa uthidrönegöti matre atre jë së la atrekë zön la ewekë ka traqa.” Ame hnei angatr hna uthidrönegöti, nge hna köja Iona. 8 Matre öni angatre jë hi: “Pane qaja jë koi hun ka hape, hnei drei matre traqa pi la jole celë. Nemene la huliwa i ö, nge qai ö kaa? Atre kaa eö, nge nemene la nöje i ö?”
9 Sa jë hi angeic ka hape: “Atre Heberu ni, nge eni a xoue* Iehova, Akötresie ne hnengödrai, Atre xupe la hnagejë me ihnadro.”
10 Ame hnei angatr hna meci hnei xou me hape: “Nemene la hnei ö hna kuca?” (Atre hë angatr laka, Iona a kötre Iehova, ke ase hë angeic qaja koi angatr.) 11 Nge öni angatre hmaca jë hi: “Tro huni a uë eö matre upu ju la hnagejë?” Ke kola ha ijumi catr la hnagejë. 12 Matre öni angeic: “Kepe ni jë, nge kuië ni pi e kuhu hnagejë, matre hao drai pi. Ke atre hi ni laka, zö i eni la kola lepi epun hnei wene.” 13 Ngo hnei angatre kö hna isin troa galu* uti hë la hnangöni. Ngazo pe, thatreine kö angatr, ke catrehnine pala ha la gejë.
14 Ame hnei angatr hna sipon iele Iehova ka hape: “Iehova fe, epi tha tro kö huni a mec pine la atre ce! The nyizö huni kö pine la meci ne la atr ka pë ngazon,* ke Iehova fe, hnei nyipëti kö hna kuca thenge la aja i nyipë.” 15 Thupene lai, hnei angatr hna kepe Iona me kuië angeic e kuhu hnagejë, nge haodrai pi hi la hnagejë. 16 Qa ngöne lai, hnene la itre trahmanyi hna xoue Iehova, me tro fë huuj me sisiny koi Iehova.
17 Ame hnei Iehova hna upe la ketre ii atraqatr troa ulumi Iona. Nge hnei angeic hna lapa koi köni drai, me köni jidr e kuhu hni ne la ii.