Zakaria

14 “Dreng! Tro ha traqa la drai, la drai i Iehova, drai ne troa thawa nyipi ö la itre mo hna xome qaathei ö.* 2 Tro ni a acasine la nöjei nöj matre tro angatr a isi me Ierusalema. Tro ha thapa la traon, me atrekënö la itre uma, me angazone la itre föe. Tro ha kötre fë la sin ne la itre atrene la traon, ngo tro pë hë a lapa* e cili hnene la munën.

3 “Tro Iehova a tro me isi memine la itre nöje cili, kösë nyidrëti ngöne la hna isi. 4 Ngöne la drai cili, tro la lue waca i nyidrë a cile hune la wetrë Oliv,* qëmeken e Ierusalema ngöne la götrane koië. Tro ha thawaluëne la wetrë Oliv* qa koië uti hë kuë, nge tro ha mama la ketre hnathup ka tru. Tro la ketre sin la wetr a tro kolopi, nge tro la ketre a tro kolojë. 5 Tro epuni a kötre kowe la hnathup nyipine la lue wetreng, ke ame la hnathup nyipine la itre wetr, ej a tro uti hë Azale. Loi e tro epuni a kötr, tune lo kola traqa la sa ngöne lo ijine i Uzia joxu ne Iudra. Nge tro Iehova Akötresing a traqa, nge tro asë hi la itre atr ka hmitrötr a ceme nyidrë.

6 “Ngöne la drai cili, tha tro kö a mama la lai ka sisitria; tha tro hmaca kö a enij* la itre ewekë. 7 Nge tha tro kö la drai cili a tune la itre xaa drai, ene la drai i Iehova. Pë hmaca kö lai me jidr; tro ha lai e jidr. 8 Ngöne la drai cili, tro ha cua la itre tim qa Ierusalema. Tro ha neni la ketre sin kowe la hnagejë e koië,* me ketre sin kowe la hnagejë e kuë.* Tro ha traqa lai ngöne la ijine hedredrei me ijine hnötr. 9 Nge tro hë Iehova a joxu ngöne la fene hnengödrai asë. Ngöne la drai cili, tro Iehova a cas, nge casi hi la ëje i nyidrë.

10 “Tro la nöj asë a tun e Araba, qa Geba uti hë Rimona ngöne la götrane kolojë ne Ierusalema. Tro ha acili Ierusalema ngöne la göhne i angeic ekö, nge troa lapane hmaca, qa ngöne la qëhnelö i Beniamina uti hë la Qëhnelö Hnapan, uti hë la Qëhnelö Ne Kona, nge qa ngöne la ita ne thup i Hananel uti hë la hnë weje wene vine i joxu. 11 Eje hi, tro ha lapan ej. Tha tro hmaca kö a apatren e Ierusalema, nge tro ha mele tingeting e cili.

12 “Nge hane hi la akötr hnei Iehova hna troa axulune kowe la itre nöj ka isi me Ierusalema: tro ha pi la ijöne i angatr, nge angatr pala kö a cil, tro ha pi e hnine la luemeke i angatr, nge tro ha pi la thineme i angatr hnine la që i angatr.

13 “Ngöne la drai cili, tro angatr asë a meci hnei xou pi Iehova. Tro angatr a isa ea la sinatronge i angatr, nge tro la ketre a isi me ketre.* 14 Tro fe Iudra a hane sine la isi e Ierusalema. Nge tro ha xawane la itre mo ne la itre nöje xötreith: ene la gool, me sileva, me itre iheetr ka nyimutre.

15 “Nge tro fe a hane traqa la akötre cili kowe la itre hos, me itre miul,* me itre kamela, me itre boliko, me nöjei öni asë ngöne la itre lapa ne la itre ithupëjia.

16 “E nöjei macatre, tro asë hi la itre ka mele pe qa ngöne la itre nöj ka lepi Ierusalema, a elë troa thili qëmekene la Joxu, Iehova joxu ne la itre trongene isi e hnengödrai, me atrune la Feet Ne Ihmelekap. 17 Ngo e tha elë kö la ketre atr thene la itre nöje ne la fen a tro Ierusalema troa thili* qëmekene la Joxu, Iehova joxu ne la itre trongene isi e hnengödrai, tha tro kö a trotro la manie hui angeic. 18 Nge e tha elë kö la nöje* Aigupito me lö hnine la traon, ke tha tro kö a manie hui angatr. Ngo tro pe a lepi angatr hnene la akötr, lo hnei Iehova hna lep la itre nöj ka tha hane kö elë troa atrune la Feet Ne Ihmelekap.* 19 Celë hi la pun kowe la ngazo i Aigupito, me kowe la ngazo ne la nöjei nöj ka tha hane kö elë troa atrune la Feet Ne Ihmelekap.

20 “Ngöne la drai cili, tro ha sija hune la itre neköi paate ne la itre hos la trengewekë celë, ‘thatraqai Iehova la ehmitrötren!’ Tro la itre öl* e hnine la uma ne hmi i Iehova a tune la itre kap qëmeken la ita ne huuj. 21 Tro ha hmitrötr asë la itre öl* e Ierusalema me Iudra, nge tro itre ej a ewekë i Iehova joxu ne la itre trongene isi e hnengödrai. Nge ame asë hi la itre ka troa tro fë huuj, ke tro angatr a lö me huliwan itre ej. Ngöne la drai cili, pë hmaca kö atre Kanana* e hnine la uma ne hmi i Iehova joxu ne la itre trongene isi e hnengödrai.”