Pane Tus i Aqane Lapa Itre Joxu

12 Hane hi la itre ka traqa troa wai Dravita e Zikelag, lo Dravita a lapa aconyi pi Saulo nekö i Kiso. Nge angatre hi la itre soc ka catr, nge ka xatua Dravita ngöne la ijine isi. 2 Angatr a ajö tane pehna, nge ka maca hnyawa la ime maca me ime mi angatr troa tha trehle, me huji pehna. Itre trejine* me Saulo lai, qa ngöne la tribu ne Beniamina. 3 Ahiezer la tan, me Ioasa, lue nekö i Sema qa Gibea; me Ieziela me Pelet, lue nekö i Azemaveth; me Beraka, me Iehu qa Anathoth, 4 me Isemaia qa Gibeona, ketre atre ka catre isi, hna e angeic thene la ala 30, nge sisitria kö angeic hune la ala 30; me Ieremia, me Iaziela, me Iohanana, me Iozabada qa Gedera, 5 me Eluzai, me Ieremoth, me Bealia, me Semaria, me Sefatia qa Harufi, 6 me Elekana, me Iesia, me Azareela, me Ioezer, me Iasobeam, angetre Kora, 7 me Ioela me Zebadia, lue nekö i Ierohama qa Gedor.

8 Nge hnene la itre xa atre Gada hna ce xöle me Dravita, me tro kowe la hnë zae i Dravita ngöne la hnapapa. Itre atre lai ka isi catr, nge itre soc hna hnëkën kowe la isi. Ka maca angatr troa huliwane la petr ka tru memine la jo. Ame la itre he i angatr, ka ceitu me itre he ne liona, nge nyimenyime catr angatr, kösë drube* hune la wetr. 9 Ezera la hnaapan, nge Obadia la hnaaluen, nge Eliaba la hnaakönin, 10 Misemana la hna 4, nge Ieremia la hna 5, 11 Atai la hna 6, nge Eliela la hna 7, 12 Iohanana la hna 8, nge Elezabad la hna 9, 13 Ieremia la hna 10, nge Makebanai la hna 11. 14 Angetre Gada angatr, nge angatr la itre tane soc. Nge ame la ka kucakuca thei angatr, ijiji angeic troa cil kowe la 100 lao soc, nge ame la ka catrecatr, ijiji angeic troa cil kowe la ala 1000. 15 Angatre hi lo itre ka sasaithe la Ioridrano ngöne lo pane treu ne la macatre, hmekune la kola neni gala* la Ioridrano. Hnei angatr hna helëne la itre ka lapane la itre götrane ga paapaa e koië me kuë.

16 Nge hnene la itre xa trahmany qa ngöne la lue tribu ne Beniamina me Iudra, hna tro koi Dravita ngöne la hnë zae i nyidrë. 17 Matre Dravita a tro ju troa ixelë me angatr, nge öni nyidrë: “Maine epuni a traqa e celë troa xatua ni qa kuhu hni ka pexej, tro hë sa cas.* Ngo maine epuni a traqa troa nue ni kowe la itre ithupëjiang, nge pëkö ngazong, tro kö la Akötresi ne la itre qaaqaa së a öhn me amekötin.” 18 Ame hnene la ua hna huliwa* thei Amasai, tane la ala 30, nge öni angeic:

“Dravita fe, nyipëti la atre elemeken, nge ce eahuni me nyipë nekö i Iese!

Ame hnei Dravita hna kepe angatr, me acili angatr troa tane lapa.

19 Nge hnene la itre xa soc ne la tribu i Manase hna trotrije la trongene isi i Saulo, me xötrethenge Dravita ka ce tro me angetre Filisiti troa isi me Saulo. Ngo tha hnei Dravita kö hna isigöline la angetre Filisiti, ke thupene la hna pane ithanata, hnene la itre joxu ne Filisiti hna upi Dravita hmaca. Öni angatr: “Tro hë angeice lai a trotriji së, me kötre fë la itre he së koi Saulo joxu i angeic.” 20 Hane hi la ëjene la itre atrene la tribu i Manase ka trotriji Saulo koi Dravita, lo nyidrëti a tro Zikelag: Adena, me Iozabada, me Iediaela, me Mikaela, me Iozabada, me Elihu, me Zilethai, itre tane la ala 1000 ne la tribu i Manase. 21 Angatr lo itre ka xatua Dravita troa huzune la itre atrekënö, ke itre atr ka tru trengecatr, nge ka catr. Hna acili angatre pë hë troa itre tane soc. 22 E nöjei drai, kolo pala hi a traqa la itre atr troa xatua Dravita, matre ala nyimu hë la lapa i Dravita, tune la lapa i Akötresie.

23 Hane hi la etrune la itre tane ka hnëkë troa isi, itre ka itronyi me Dravita e Heberona, matre acili joxu Dravita troa nyihna i Saulo, tune lo hna amekötin hnei Iehova. 24 Qa ngöne la tribu i Iudra: Ala 6800 lao trahmany ka ajö ipetr ka tru, me itre jo. Itre atre lai ka hnëkë troa isi. 25 Nge qa ngöne la tribu i Simeona: Ala 7100 lao trahmanyi ka tru trengecatr, nge ka catr.

26 Nge qa ngöne la tribu i Levi: Ala 4600. 27 Nge Iehoiada la tane la itre nekö i Arona. Nge ala 3700 lao trahmanyi ka ce me angeic, 28 me Zadoka, ketre thupëtresij ka tru trengecatr, nge ka catr, memine la 22 lao tane la lapa i angeic.

29 Nge qa ngöne la tribu i Beniamina: Ala 3000 lao trahmany, itre trejin me Saulo, lo itre ka isigöline la fami Saulo. 30 Nge qa ngöne la tribu i Eferaima: Ala 20800 lao trahmany ka tru trengecatr, nge ka catr. Itre atre lai ka hlemu ngöne la itre lapa i angatr.

31 Nge qa ngöne la sine la tribu i Manase: Ala 18000 lao trahmany hna qeje ëjen troa acili joxu Dravita. 32 Nge qa ngöne la tribu i Isakara: Ala 200 lao tan ka atreine troa waipengöne la aqane troa ujë hnei angetre Isaraela, me ijine tro angatr a kuca. Matre itre trejin me angatr asë a isa drei angatr. 33 Nge qa ngöne la tribu i Zebulona: Ala 50000 lao trahmanyi ka ijije troa lö hnine la itre soc, ke hna hnëkë angatr troa cile xötrë troa isi, me cile fë la nöjei pengöne jia ne isi. Hnei angatr asë hna tro koi Dravita, me amamane la ihnimi nyipici* angatr koi nyidrë. 34 Nge qa ngöne la tribu i Nafatali: Ala 1000 lao tan, nge ce angatr me 37000 lao trahmanyi ka cile fë ipetr ka tru me jo. 35 Nge qa ngöne la tribu i Dana: Ala 28600 lao trahmanyi ka hnëkë troa cile xötrë troa isi. 36 Nge qa ngöne la tribu i Asera: 40000 lao trahmanyi ka ijije troa lö hnine la itre soc, ke hna hnëkë angatr troa cile xötrë troa isi.

37 Nge ame la itre ka traqa qa ngöne la ketre pala ne la hneopegejë Ioridrano, qa ngöne la tribu i Reubena, me Gada, me qa ngöne la sine la tribu i Manase: Ala 120000 lao soc ka cile fë nöjei pengöne jia ne isi. 38 Itre atr asë hi lai ka majemine isi, itre ka hnëkë troa isi. Hnei angatr asë hna traqa e Heberona, ke xecie hë koi angatr troa acili joxu Dravita hui Isaraela asë. Nge tui angatr, hnene la itre xa angetre Isaraela hna kapa* troa acili joxu Dravita. 39 Nge angatr a lapa ju e cili me Dravita koi köni drai, angatr a xeni me ij, ke hnene la itre trahmany ne la tribu ne Iudra hna hnëkën asë koi angatr. 40 Nge ame la itre ka lapa ezin, memine la itre ka lapa gaa nany, tun e Isakara, me Zebulona, me Nafatali, hnei angatr asë hna isa traqa fë xen hune la itre boliko, me kamela, me miul, me kau. Hna traqa fë farin, me gato wacua me gato vin* ka qaqacil, me waina, me oel, me nyimu kau me mamoe, ke kola feet e Isaraela.