Hnaaluene Tus i Aqane Lapa Itre Joxu
12 Thupene la Reoboama a ase acatrene la mus i nyidrë, nge joxu ka tru hë nyidrë, hnei nyidrëti hna nuetrije la Wathebo i Iehova, nge Isaraela asë a nyitipu nyidrë. 2 Nge ngöne la kola 5 lao macatre ne mus i Reoboama, hnei Sisaka joxu ne Aigupito hna tro troa isi me Ierusalema, pine laka, tha hnei Isaraela kö hna mele nyipici koi Iehova. 3 Ce Sisaka me 1 200 lao ikatr, me 60 000 lao ka ti hos, me itre sooc ka ala nyimu ka ce traqa me angeic qa Aigupito: angetre Lubi, me Suki, me Aithiope. 4 Hnei angeic hna thapa la itre traon hna eköhagen e Iudra, me traqa e Ierusalema.
5 Hnei Semaia perofeta, hna traqa troa wai Reoboama, me itre he ne nöj e Iudra, itre ka icasikeu e Ierusalema pi Sisaka. Öni angeic: “Hane hi la hna qaja hnei Iehova, ‘Hnei epuni hna triji ni, hane hi lai kepin, matre hnenge hna nue epun kowe la lue ime i Sisaka.’” 6 Ame hë la angatr a drenge lai, hnene la itre he ne nöj ne Isaraela, memine la joxu hna ipië me hape: “Meköti Iehova.” 7 Nge öhne hi Iehova laka, hnei angatr hna ipië, matre öni Iehova koi Semaia: “Hnei angatre hna ipië, tha tro kö ni a apatrenyi angatr. Eje hi, easenyi hë matre tro hmaca ni a amele angatr. Tha tro kö ni a nue la elëhning koi Ierusalema jëne Sisaka. 8 Ngo tro pe angatr a nyihlue i Sisaka, matre öhne jë kö angatre laka, isapengöne kö la troa nyihlueng, me nyihluene la itre joxu* trenyiwa.”
9 Ame hnei Sisaka joxu ne Aigupito hna isi me Ierusalema, matre angeic a thapa pi la itre trengamo ne la uma ne hmi Iehova, me itre trengamo ne la hnalapa i joxu. Angeic a eöth asë jë, uti fe hë la itre petre gool hna kuca hnei Solomona. 10 Matre hnei Reoboama hna nyihnane la itre petre cili hnei itre petre kopa, nge nyidrëti a hamëne pi kowe la tane la itre ka thup,* itre ka thupëne la qëhnelö ne la hnalapa i joxu. 11 E nöjei ijine traqa la joxu ngöne la uma ne hmi i Iehova, itre ka thup a lö me cile fë la itre petr. Thupene lai, angatr a amë hmaca pi hnine la hnahag ne thup. 12 Nge pine laka, hna ipië hnene la joxu, upu ju hi la elëhni Iehova koi angeic. Matre tha hnei nyidrëti kö hna lep apatren asë la traon. Ketre, hetre ewekë ka loi pala kö hna öhn e Iudra.
13 Hnei Reoboama joxu hna sil acatrene la mus i nyidrë e Ierusalema, nge hnei nyidrëti pala hi hna mus. Traqa koi 41 lao macatre i Reoboama lo kola acili joxu nyidrë. Hnei nyidrëti hna mus koi 17 lao macatre e Ierusalema, lo traon hnei Iehova hna iën nyipine la itre tribu ne Isaraela, matre amë la ëje i nyidrë. Naama qa Amona la thine i joxu. 14 Ngo hnei Reoboama hna kuca la ngazo, ke tha xecie hnyawa kö* koi nyidrë troa thele Iehova.
15 Ame la mele i Reoboama, hna fejan asë, qane la qan uti hë la pun, hnine la itre itus i Semaia perofeta, me Ido atre qeje pu, me hnine la itre itusi ne la itre xötr atr. Hnei Reoboama me Ieroboama hna isi lapaa. 16 Thupene lai, Reoboama a meköle ju me itre qaaqaa i nyidrë ngöne la mec, nge hna kelemi nyidrë ngöne la Traone i Dravita, me acili joxu Abiama nekö i nyidrë, troa nyihna i nyidrë.