Ezekiela

7 Hnei Iehova hmaca hna ithanata koi ni me hape: 2 “Nekö i atr, hane hi la hna qaja hnei Iehova Joxu Ka Sisitria kowe la nöje Isaraela: ‘Traqa ha la pun! Traqa ha la pun ngöne la 4 lao cane la nöj. 3 Traqa ha enehila la pune koi ö, nge tro ni a nenge la elëhning koi ö. Eje hi, tro ni a ameköti ö thenge la aqane ujë i ö, me ameköti ö pine la nöjei huliwa i ö hna methinën. 4 Tha tro kö la alamekeng a utipi ö; nge ketre tha tro kö ni a meku eö. Eje hi, tro ni a axulune koi ö la itre thangane la aqane ujë i ö. Eje hi, tro eö a xeni pune la itre huliwa i ö hna methinën. Nge tro hë eö a atre laka, Iehova ni.’

5 “Hane hi la hna qaja hnei Iehova Joxu Ka Sisitria: ‘Hane petre hi la ketre akötr laka, tha hna hane kö traqa. 6 Kola traqa la pun; tro kö ej a traqa. Tro ej a mejë* me kei tranyi ö. Eje hi, maine hë lai! 7 Atrene la nöj, ijine* i ö pena ha. Easenyi hë la ijin, nge calemi hë la drai. Hune la itre wetr, kola imenumenu ngo tha kolo kö a sue madrin.

8 “‘Easenyi hë tro ni a nue la trengehning koi ö, me neng asë la elëhning. Eje hi, tro ni a ameköti ö thenge la aqane ujë i ö, me ameköti ö pine la nöjei huliwa i ö hna methinën. 9 Tha tro kö la alamekeng a utipi ö; nge ketre tha tro kö ni a meku eö. Eje hi, tro ni a axulune koi ö la itre thangane la aqane ujë i ö. Eje hi, tro eö a xeni pune la itre sipu huliwa i ö hna methinën. Nge tro hë eö a atre laka, eni Iehova la ka lepi ö.

10 “‘Hane hi la drai! Eje hi, ej a traqa! Traqa ha la ijine* i ö. Enge hë la sine tö, nge xöle hë la pi tru. 11 Hna saze la isi koi jia ne iakötrë. Tha tro kö a amele angatr, me itre mo i angatr, me itre atrene la nöje i angatr, me edraië i angatr. 12 Tro ha traqa la ijin memine la drai. Epi tha tro kö a madrine la itre ka itö, nge epi tha tro kö a hleuhleu la itre ka salem, ke tru la elëhni i Akötresie kowe la nöjei atre ce.* 13 Eje hi, tha tro kö la ka salem a bëek kowe la götrane hnei angeic hna salemën, ngacama mele pala kö angeic, ke thatraqane la nöjei atre ce la hna meköle goeën. Pëkö ala casi thei angatre ka troa bëek, nge pëkö ala casi ka troa mel* pine la ngazo i angeic.

14 “‘Ase hë ufi trutru, nge ka hnëkë hë la nöjei atr, ngo pëkö ala casi ka tro troa isi, ke tru la elëhning kowe la nöjei atre ce. 15 Ame la isi,* ke ej e kuhu trön, nge itre meci ka ixötrekeu pë hë me jiin e koho hnin. Matre ame la itre ka lapa ngöne la itre hlapa, ke tro angatr a mec hnei isi. Nge ame pena la itre ka mel ngöne la traon, ke tro angatr a meci hnei jiin me itre meci ka ixötrekeu. 16 Tro hë la itre ka mele pe a kötr kowe la itre wetr, nge tune la itre piny ngöne la hnathup, tro angatr a isa awe pine la itre tria i angatr. 17 Tro ha thipe la lue ime i angatr asë, nge tro ha neni la tim hune la itre iwatingöneca i angatr.* 18 Hnei angatr hna heetrë ibëek ka tru thenyin, ame hna cila ngongo* la itre ngönetrei i angatr. Tro angatr asë a hmahma, me cin apane la itre he i angatr asë.*

19 “‘Tro angatr a hnatrije la sileva i angatr e cahu gojeny, me sisine la gool i angatr. Thatreine kö troa amele angatr hnene la sileva me gool i angatr, ngöne la drai ne elëhni i Iehova. Tha tro kö angatr a mej, me nyialien la trengenan i angatr, ke celë hi* ewekë ka akeinyi* angatr kowe la ngazo. 20 Hnei angatr hna pi mama fë la emingömingöne la itre nyine thaip i angatr, me xome lai* nyine kuca la itre hnasaatr hna methinën, me itre idrola hna sisin. Qa ngöne lai, tro ni a kuca matre sisine jë angatr la ewekë cili.* 21 Nge tro ni a nue lai kowe la itre trenyiwa me itre atr ka ngazo ne la fen, matre tro angatr a thapa me adron ej.

22 “‘Tro hë ni a xele ma goeë angatr, nge tro ha adrone la hnë zaeng,* nge tro la itre atrekënö a lö hnin me adron ej.

23 “‘Kuca jë la ketre cein,* ke tiqa ha la nöj hnei madra qa ngöne la aqane iameköti i angatr, nge tiqa ha la traone hnei isi. 24 Tro ni a hëne la itre trahmanyi ka iaxösisi qa ngöne la itre nöj, nge tro la itre atre cili a thapa la itre uma i angatr. Tro ni a apëne la aqane pi tru ne la itre atr ka catr, nge tro ha angazone la itre hnë hmi i angatr. 25 Nge ame hë la angatr a hnehengazo, tro angatr a thele tingeting, ngo tha tro kö angatr a öhn. 26 Tro ha traqa itrai la itre akötr, me dreng la ketre nuvel thupene la ketre. Tro la itre atr a thele la itre hna meköle goeëne thene la perofeta, ngo ka gufa pe. Tro ha patre la wathebo* thene la atre huuj, memine la eamo thene la itre qatr. 27 Tro la joxu a hnëmec, nge tro la tan a heetrëne la hleuhleu, nge tro la ime ne la nöjei atrene la nöj a hmengöhmengöne hnei xou. Tro ni a kuca koi angatr thenge la aqane ujë i angatr, nge tro ni a ameköti angatr, thenge la aqane amekötin angatre la itre xan. Nge tro hë angatre lai a atre laka, Iehova ni.’”