Pane Tus i Aqane Lapa Itre Joxu
23 Qatre hë Dravita, nge easenyi hë tro nyidrëti a mec, matre nyidrëti a acili Solomona jë nekö i nyidrë, troa joxu ne Isaraela. 2 Thupene lai, nyidrëti a acasine jë la nöjei he ne nöj e Isaraela, me itre atre huuj, me angetre Levi. 3 Ame hna e la angetre Levi ka 30 lao macatre a tro draië, hna e angatr isa ala cas, nge traqa koi 38000. 4 Ame thei angatr, ke ala 24000 la itre ka thupëne la itre huliwa ne la uma i Iehova. Nge ala 6000 lao tan me itretre iameköti. 5 Nge hetrenyi fe la 4000 lao atre ka thupë qëhnelö, me 4000 lao atre ka atrunyi Iehova hnene la itre nyine elo miuzik, lo hnei Dravita hna qaja ka hape: “Hnenge hna kuca lai nyine atrunyi Akötresie.”
6 Nge Dravita a thewe angatre jë kösë nyimu gurup, thenge la itre nekö i Levi hnei angatr hna xulu qa ngön, ene Geresoma, me Kohatha, me Merari. 7 Lue nekö i Geresoma: Laadan me Simei. 8 Itre nekö i Laadan: Iehiela la tixen, me Zetham, me Ioela; ala köni angatr. 9 Itre nekö i Simei: Selomith, me Haziela, me Harana; ala köni angatr, nge angatre la itre tixe ne la lapa i Laadan. 10 Itre nekö i Simei: Iahath, me Zina,* me Ieuso, me Beria; angatre hi la 4 lao nekö i Simei. 11 Iahath la tixen, nge Ziza la hnaaluen. Ngo pine laka, tha hna hnaho nekö trahmany atrunyi kö hnei Ieuso me Beria, hna ce e nyidro kösë casi hi la lapa, troa kuca la ca hnëqa.
12 Itre nekö i Kohatha: Amerama, me Izara, me Heberona, me Uziela; ala 4 angatr. 13 Lue nekö i Amerama: Arona me Mose. Hna iëne palua Arona troa ahmitrötrëne la Gaa Nyipi Hmitrötr, angeic me itre nekö i angeic, matre troa huuj qëmeke i Iehova, me nyihlue i nyidrë, me amanathithine paluane la nöj ngöne la ëje i nyidrë. 14 Nge ame la itre nekö i Mose, lo atre ne la nyipi Akötresie, hna ce e angatr memine la tribu i angetre Levi. 15 Lue nekö i Mose: Geresoma me Eliezera. 16 Sebuela la tixe ne la itre nekö i Geresoma. 17 Rehabia la tixe ne la itre nekö i Eliezera. Pëkö ca nekö i Eliezera trahmany, ngo ala nyimu catre pe la itre nekö i Rehabia trahmany. 18 Selomith la tixe ne la itre nekö i Izara. 19 Itre nekö i Heberona: Ieria la tixen, nge Amaria la hnaaluen, me Iaziela la hnaakönin, me Iekameama la hna 4. 20 Lue nekö i Uziela: Mika la ka tru, nge Iesia la hnaaluen.
21 Lue nekö i Merari: Maheli me Musi. Lue nekö i Maheli: Eleazara me Kiso. 22 Meci ju kö Eleazara nge pëkö nekö i angeic trahmany, ngo itre nekö jajinyi pe. Matre hnene la itre nekö i Kiso, lo itre xa atrene la lapa i angatr,* hna faipoipo me angatr. 23 Itre nekö i Musi: Maheli, me Edera, me Ieremoth; ala köni angatr.
24 Celë hi la itre nekö i Levi hna e thenge la itre lapa i angatr,* me thenge la itre tixe ne lapa i angatr. Hna e la angetre Levi ka 20 lao macatre a tro draië, nge hna sija la ëje i angatr ngöne la itre list.* Angatre hi la hna upe troa kuca la itre huliwa ka nyipiewekë hnine la uma i Iehova. 25 Ke eje hi, öni Dravita lo: “Hnei Iehova Akötresi Isaraela hna hamë tingetinge kowe la nöje i nyidrë. Nge tro nyidrëti a lapa palua e Ierusalema. 26 Haawe, tha tro hmaca kö la angetre Levi a kapa trongëne la uma maano, me itre ewekë nyine huliwan göi hmi.” 27 Celë hi matre, thenge la itre hna amekötin tixenuë hnei Dravita, hna e la angetre Levi qaane la ka 20 lao macatre a tro draië. 28 Hna upi angatr troa xatuane la itre nekö i Arona, göne la itre huliwa ne la uma i Iehova. Qa i angatr la itre götrane gaa pë ihakun, me hnë xen, nge angatr la ka ahmitrötrëne la itre ewekë ka hmitrötr, me itre xa huliwa ka nyipiewekë hnine la uma ne la nyipi Akötresie. 29 Angatre fe a ixatua göne la itre falawa hna iatëkeun, memine la farin thatraqane la huuj ne la itre wene feja, me itre falawa ka pë levenen, me itre gato hna san hnine falaipen, me farin hna ce lomën me oel, me göi troa tuluthe la ehacen me etrun la itre ewekë. 30 Qa i angatre fe troa traqa e nöjei hmakanyi me hej, troa olen me atrunyi Iehova. 31 Angatr a ixatua e nöjei sabath la kola traqa fë huuj ne dreuth asë koi Iehova, me ngöne la treu ka hnyipixe, me itre ijine feet. Hna sa la etru i angatr, thenge la hna amekötin göi angatr, nge angatr a kuca lapaane la huliwa cili qëmeke i Iehova. 32 Nge hetre huliwa i angatr fe thatraqane la itat ne icasikeu, memine la götrane gaa hmitrötr. Nge angatre fe a xatuane la itre trejin me angatr, lo itre nekö i Arona, troa kuca la huliwa hnine la uma i Iehova.