Hnaaluene Tus i Aqane Lapa Itre Joxu

5 Celë hi aqane afenesine Solomona la nöjei huliwa thatraqane la uma ne hmi* i Iehova. Thupene lai, hnei Solomona hna xome la itre ewekë hnei Dravita keme i nyidrë hna amë acon thatraqane la hmi. Solomona a amë ju la sileva, me gool, me nöjei ewekë ka lolo, hnine la itre hnahag ne ami mo ne la uma ne la nyipi Akötresie. 2 Ngöne la ijine cili, hnei Solomona a hën asë la itre qatr ne Isaraela, ene la nöjei tane tribu, me nöjei tixe ne lapa e Isaraela. Angatr a traqa ju e Ierusalema, matre xome la pua ne isisinyikeu i Iehova qa ngöne la Traone i Dravita e Ziona. 3 Ame hnene la itre trahmanyi ne Isaraela hna itronyi thei joxu, hmekune la ijine feet* ne la hna 7 ne treu ne la macatre.

4 Nge hnene la itre qatr ne Isaraela asë hna traqa, nge hnei angetre Levi hna ajöne la Pua. 5 Angatr a ajöne trongëne jë la Pua, memine la itat ne icasikeu, me nöjei ewekë ka hmitrötr hna amë hnine lai itat. Itretre huuj me angetre Levi* la itre ka ajöne lai. 6 Nge hnei Solomona joxu, memine nöjei atre Isaraela hna hën koi nyidrë, hna traqa itronyi qëmekene la Pua. Tru catr hnei mamoe me kau hna huujën, matre thatreine kö e la etrun. 7 Thupene lai, hnene la itre atre huuj hna amë la pua ne isisinyikeu i Iehova, ngöne la göhnë hna hnëkën fene la itre iape ne la lue kerubi, hnine la Gaa Nyipi Hmitrötr, lo hnahag e koië pune la uma ne hmi. 8 Itre kerubi a seluthe la lue iape i nyidro hune la göhnen ne la Pua, matre kösë itre kerubi a nyi titaxapo ne lai Pua, me itre tan ej. 9 Nge qeadridri catre la itre tan, matre kola mama la itre pun qa ngöne la Gaa Hmitrötr, qëmekene la Gaa Nyipi Hmitrötr.* Ngo tha mama kö qa kuhu trön. Nge uti hë enehila, itre ej pala hi la. 10 Pëkö aliene la Pua, ngo kolo hmekuje hi lo lue sine etë hna amë hnei Mose e Horeba, thupen lo Iehova a isisinyikeu me angetre Isaraela, lo angatr a tro qa Aigupito.

11 Matre ame ju hi la itre atre huuj a tro qa hnine la gaa hmitrötr, (ke hnene la itre atre huuj asë, qa ngöne la nöjei lapa, hna ahmitrötrë angatr) 12 hnene la angetre Levi asë, lo itre ka nyima nge hna elemeken hnei Asafa, me Heman, me Ieduthun, me itre nekö i angatr, me itre trejin me angatr, hna heetrë ihetr ka hmelele. Angatr a isa cile fë sëbal, me itre nyine elo miuzik ka hetre filen, me itre arp. Angatr a cil hmekune la ita ne huuj götrane koië. Ce angatr me 120 lao atre huuj ka ufi trutru. 13 Matre ame ju hi la itre ka ufi trutru, me itre ka nyima a ce atrunyi Iehova me olene koi nyidrë, nge kola elë la mejene la itre trutru, me itre sëbal, me itre xa nyine elo miuzik, nge kola atrunyi Iehova, ke “ka loi hni nyidrë, nge ka cile hut la ihnimi nyipici i nyidrë,” tiqa pi hi la uma ne hmi i Iehova, hnene la ketre iaw. 14 Matre, thatreine hë la itre atre huuj troa huliwa hnene la iaw, ke kola tiqa la uma ne la nyipi Akötresie hnene la lolo i Iehova.