Pane Tusi Itre Joxu

6 Hnei Solomona hna nyiqaane xupe la uma ne hmi i Iehova,* thupene la 480 lao macatre ne thepe angetre Isaraela qa Aigupito. Hna traqa lai, ngöne la kola 4 lao macatre ne mus i Solomona e Isaraela, ngöne la treu Zif,* ene lo hnaaluene treu. 2 Ame la uma hna xup hnei Solomona joxu koi Iehova, ke 60 kubit* la eqean, 20 kubit la eisaisan, nge 30 kubit la edraiën. 3 Nge ame la hnahag hnë lö kowe la Gaa Hmitrötr, ke 20 kubit la eqean,* nge tune fe la eisaisane la uma.* Nge qaane la qëmekene uma, kola e la 10 kubit la ejuin.

4 Ngöne la itre ngöne uma, hnei Solomona hna cai wenge mamala ka co* trootro. 5 Nge hnei nyidrë hna acile la ketre uma atraqatr ka fedr kowe la ngöne uma. Ej a kanothe la itre ngöne uma ne la Gaa Hmitrötr, memine la Gaa Nyipi Hmitrötr. Nge hnine la uma cili, hnei Solomona hna thewe hnahag. 6 Nge kola e la 5 kubit la eisaisane la itre xötre hnahag e kuhu fen. Nge ame la pane xötr* e koho hun, ke ka 6 kubit la eisaisan. Nge ame la hnaaluene xötr* e koho hun, ke 7 kubit la eisaisan. Kola tro tun, ke itre ngöne uma xötreith a co trootro ngöne la itre xötr* e koho hun, matre tha tro kö la itre agö a lö hnine la itre ngöne uma.

7 Hna xupe la uma ne hmi cili hnei itre ietë hna thupathupa ha ngöne la hnë thi etë.* Matre, ame ngöne la ijine kola xup ej, pëkö mejene hama hna dreng, me ze, me nöjei pengöne jia ne huliwa fao. 8 Troa lö kowe la xötre hnahag e kuhu fen, jëne la hnë lö hna amë ngöne la götrane kolojë* ne lai uma. Nge hetre ieskalie fe ka tro kano troa elë kowe la pane xötr me kowe la hnaaluene xötr.* 9 Nge hnei Solomona hna catre huliwa troa xupe la uma ne hmi, uti hë la nyidrëti afenesin. Hnei nyidrëti hna heetrën la ngöne uma hnei itre sinöe arasi, me itre xötre inehe arasi. 10 Nge hnei Nyidrëti fe hna acile la itre hnahag xötreithe la uma, nge 5 kubit la edraiën. Hna isilinekeun la itre hnahag memine la uma, hnei itre agö arasi.

11 Ame hna traqa koi Solomona la maca i Iehova, öni nyidrë: 12 “E tro eö a drenge me trongën la itre wathebong, me itre hnenge hna isenyin me amekötin, tro hë ni a kuca koi eö la hnenge hna sisinyi koi Dravita keme i eö, göne la uma ne hmi hnei eö hna xup. 13 Tro hë ni a lapa nyipine la angetre Isaraela, nge tha tro kö ni a nuetriji Isaraela nöjeng.”

14 Hnei Solomona hna sisedrëne la huliwa ne xupe la uma ne hmi, me afenesin ej. 15 Nyidrëti a heetrëne* ju la itre ngöne uma hnei itre inehe arasi. Hna heetrën asë qaane la trepen uti hë la plafo,* nge hnei nyidrëti hna heetrëne la trepene uma hnei itre inehe göti. 16 Hnei nyidrëti hna acile la ketre ngöne uma e hnin, matre troa thewe hnahag. Hna kuca la ngöne uma cili hnei itre inehe arasi, nge qaane la pune uma, nyidrëti a e jë la 20 kubit, me acil e cili la ngöne uma. Ej a tro qa ngöne la trepen, uti hë la plafo.* Celë hi aqane xupe nyidrë la hnahage ne pun,* ene la Gaa Nyipi Hmitrötr. 17 Nge ame pena la Gaa Hmitrötr,* lo hnahag qëmeken, kola e la 40 kubit la eqean. 18 Nge ame la itre sinöe arasi ka heetrën la hnine uma, hna tratraun e hun, la itre fuo me itre iengen ka thithë. Hna heetrën asë hi la itre ngöne uma hnei sinöe arasi, matre pëkö ca etë ka mama.

19 E hnine la uma, Solomona a hnëkëne jë la Gaa Nyipi Hmitrötr* troa amë la pua ne isisinyikeu i Iehova. 20 Ame la eqeane la Gaa Nyipi Hmitrötr,* ke 20 kubit, nge 20 kubit la eisaisan, nge 20 kubit la edraiën. Nge Solomona a peleth asë jë la hnahag hnei nyipi gool, me heetrëne la ita ne huuj* hnei itre sinöe arasi. 21 Solomona a heetrën asë jë la hnine uma hnei nyipi gool, me huli ceine gool qëmekene la Gaa Nyipi Hmitrötr,* lo hna heetrën asë hnei gool. 22 Nyidrëti a heetrën asë jë la hnine uma hnei gool, ene la uma asë. Nyidrëti a heetrën asë ju hnei gool la ita ne huuj ezine la Gaa Nyipi Hmitrötr.*

23 Ame göne la Gaa Nyipi Hmitrötr,* nyidrëti a tratraune jë la lue kerubi hnei göti,* nge 10 kubit la eqeane la lue kerubi. 24 Nge 5 kubit la eqeane la lue iapene la pane kerubi. Qane la pune la ketre iap, uti hë la pune la ketre, traqa koi 10 kubit. 25 Nge 10 kubite fe la hnaaluene kerubi, ceitune hi la eqea i nyidro me iqëmek. 26 Nge traqa koi isa 10 kubit la eqeane la lue kerubi. 27 Ame hnei Solomona hna alöne la lue kerubi hnine la Gaa Nyipi Hmitrötr.* Nyidroti a isa axö iap, matre kola isa ketr hnene la isa ca iap i nyidro la isa ca ngöne uma. Nge ame pena la isa hnaaluene iape i nyidro, lue ej a köjan la nyipine uma, matre kola iketr la lue iape i nyidro. 28 Nge Solomona a heetrëne jë la lue kerubi hnei gool.

29 Ame hnei Solomona hna amingömingöne la itre ngöne uma ne la lue hnahag,* me tratraun e hun la itre kerubi, me itre pama, me itre iengen ka thithë. 30 Nge nyidrëti a heetrëne jë hnei gool, la itre inehe ne la trepene la lue hnahag. 31 Nge ame kowe la hnë lö ne la Gaa Nyipi Hmitrötr,* hnei nyidrëti hna ca iqëhnelö hnei itre göti, me itre poto, me itre hune qëhnelö, celë hi la hna 5 ne götran.* 32 Nge hna kuca hnei göti la lue qëhnelö, nge nyidrëti a amingömingöne jë me tratraune la itre kerubi, me itre pama, me itre iengen ka thithë, nge Solomona a heetrëne jë la lue qëhnelö hnei gool. Nyidrëti a lepelepe jë hnei hama la gool hune la itre kerubi me itre pama. 33 Nge nyidrëti a kuca tune ju fe kowe la itre hune qëhnelö göti ne la Gaa Hmitrötr,* hane hi la hna 4 ne götran.* 34 Nge nyidrëti a kuca ju fe la lue qëhnelö arasi hna acatren kowe la lue ita ne qëhnelö, nge lue ej a emo hune la itre ingele. 35 Nyidrëti a tratraune jë la itre kerubi, me itre pama, me itre iengen ka thithë. Nge nyidrëti a heetrëne jë hnei itre dröne gool.

36 Ame hnei nyidrëti hna xupe la itre ngöne uma ne la götran gaa pë ihakun e koho hnin. Hnei nyidrëti hna xupe lai hnei köni xötre etë, me nyixane hnene la ca xötr agö arasi.

37 Hna ami trepene la uma ne hmi i Iehova, lo kola 4 lao macatre ne mus i Solomona, hmekune la treu Zif.* 38 Hna afenesin asë la uma ne hmi thenge lo hna siji tulun, ngöne la hna 11 ne macatre, hmekune la treu Bul,* lo hna 8 ne treu. Haawe, traqa koi 7 lao macatre ne xupe Solomona la uma ne hmi.