Hnaaluene Tus i Aqane Lapa Itre Joxu

36 Ame hnene la itre atrene la nöj hna acili joxu Iehoaza e Ierusalema, troa nyihnai Ioasa keme i nyidrë. 2 Traqa koi 23 lao macatre i Iehoaza lo kola acili joxu nyidrë. Hnei nyidrëti hna musi koi köni treu e Ierusalema. 3 Ngo hnei Neko joxu ne Aigupito hna pane ami Iehoaza qa ngöne la hnëqa i nyidrë e Ierusalema. Nge hnei Neko hna amekötin kowe la nöj troa kuiëne la 100 lao talane* sileva, me ca talane gool. 4 Ketre, hnene la joxu ne Aigupito hna acili Eliakima trejin me Iehoaza, troa joxu ne Iudra me Ierusalema. Nge hnei Neko hna saze la ëje i Eliakima, koi Iehoiakima. Nge ame pena Iehoaza, hnei Neko hna xomi nyidrë a tro Aigupito.

5 Traqa koi 25 lao macatre i Iehoiakima lo kola acili joxu nyidrë. Hnei nyidrëti hna musi koi 11 lao macatre e Ierusalema. Hnei nyidrë hna kuca la ngazo qëmeke i Iehova Akötresi nyidrë. 6 Nge hnei Nebukaneza joxu ne Babulona, hna tro troa isi me nyidrë, matre hna othi nyidrë hnei lue ceine kopa, me xomi nyidrë a tro Babulona. 7 Ame hnei Nebukaneza hna xom a tro Babulona la itre xa ewekë qa hnine la uma ne hmi Iehova, me amë hnine la uma i angeic e Babulona. 8 Nge ame la mele i Iehoiakima, me itre ewekë ka sis hnei nyidrëti hna kuca, me itre xa gele i nyidrë, hna fejan asë hnine la itre Itusi ne la mele ne la itre joxu ne Isaraela me Iudra. Nge hna acili joxu Iehoiakin nekö i nyidrë, troa nyihna i nyidrë.

9 Traqa koi 18 lao macatre i Iehoiakin lo kola acili joxu nyidrë. Hnei nyidrëti hna musi koi köni treu nge 10 lao drai e Ierusalema. Nyidrëti a kuca la ngazo qëmeke i Iehova. 10 Ame la kola xejë la macatre,* hnei Nebukaneza joxu hna upe la itre atre i angeic troa thei Iehoiakin, me xomi nyidrë a tro Babulona, me eöth la itre xa ewekë hnine la uma ne hmi Iehova. Ame hnei Nebukaneza hna acili joxu Zedekia, ketre keme i Iehoiakin, troa joxu ne Iudra me Ierusalema.

11 Traqa koi 21 lao macatre i Zedekia lo kola acili joxu nyidrë. Hnei nyidrëti hna musi koi 11 lao macatre e Ierusalema. 12 Hnei Zedekia hna kuca la ngazo qëmeke i Iehova Akötresi nyidrë. Tha ipië kö nyidrë koi Ieremia perofeta, lo atre hnei Iehova hna up troa qeneqaja i nyidrë. 13 Nge hnei nyidrëti fe hna icilekeu me Nebukaneza joxu, ngacama hna musinë nyidrë troa sisiny qëmeke i Akötresie troa idrei. Ngo nyidrëti pala hi a catre që,* me thinge la hni nyidrë, nge goi xele fe nyidrë ma drei Iehova Akötresi Isaraela. 14 Hnene la itre tane i angetre huuj, memine la nöj, hna tha mele nyipici, me kuca catrëne la itre huliwa ka sis ne la itre xa nöj. Nge angatr a angazone la uma ne hmi Iehova, lo hnei nyidrëti hna ahmitrötrën e Ierusalema.

15 Ame hnei Iehova Akötresi ne la itre qaaqaa i angatr, hna hmekë angatre jëne la itre ka tro fë maca i nyidrë. Nge nyidrëti pala hi a hmekë angatr, ke nyidrëti a hnime* la nöje i nyidrë, me uma ne hmi i nyidrë.* 16 Ngazo pe, angatre pala hi a qenahmone la itre ka tro fë maca ne la nyipi Akötresie, me methinëne la itre trengewekë i nyidrë, me hnyima fë la itre perofeta i nyidrë. Uti hë la kola elë catre la trenge hni Iehova kowe la nöj i nyidrë, uti hë la pë hë jëne mele ka ijije koi angatr.

17 Ame hnei Iehova hna upe la joxu ne Kaledaia troa lepi angatr. Hnene la joxu hna humuthe hnei taua la itre thöth hnine la uma ne hmi, nge goi tha hnime* fe angeic la itre nekö trahmanyi me nekö jajiny,* me itre qatr me itre ka adikape. Hnei Akötresie hna nu asë kowe la lue ime i angeic. 18 Ame la nöjei ewekë hnine la uma ne hmi ne la nyipi Akötresie, ka tru me ka co, me itre trengamo ne la uma ne hmi Iehova, me itre trengamo ne la joxu me itre he ne nöj, hna eöth asë a tro Babulona. 19 Hnei nyidrëti hna manithe la uma ne hmi ne la nyipi Akötresie, me thëtrije la ihag ne Ierusalema, me manithe la itre ita ne thup hna eköhagen, me apatrene la nöjei ewekë ka tru thupen. 20 Nge nyidrëti a othe ju la itre ka mele pe, itre hna tha humuth hnei taua, me xomi angatr a tro Babulona. Nge e cili, hnei angatr hna nyihluene la joxu me itre nekö i nyidrë, uti hë la kola nyiqaane mus hnei angetre Peresi. 21 Celë hi matre eatre jë lo hna qaja hnei Iehova jëne Ieremia. Hnene la nöj hna lapa hleuhleu, uti hë pexeje la itre macatre ne sabath. Ngöne la ijine kola lapa hleuhleu la nöj, ej a pane mano* ju uti hë pexeje la 70 lao macatre.

22 Ngöne la pane macatre ne mus i Koreso joxu ne Peresi, hnei Iehova hna uku* Koreso joxu ne Peresi, troa tro fë trongëne la ketre maca ngöne la baselaia i nyidrëti asë, matre eatre jë la hna qaja hnei Iehova jëne Ieremia. Nge ame la maca cili, hnei nyidrëti fe hna fejan, kola hape: 23 “Hane hi la maca i Koreso joxu ne Peresi: ‘Hnei Iehova Akötresie ne hnengödrai hna hamë ni la nöjei baselaia ne fen. Nge hnei nyidrëti hna upi ni troa xupe la uma i nyidrë e Ierusalema e Iudra. Drei thei epuni la itre atrene la nöj i nyidrë? Epi tro Iehova Akötresi angatr a ce me angatr, nge epi tro angatr a elë a tro Ierusalema.’”