Numera
30 Thupene lai, hnei Mose hna ithanata kowe la itre tane la itre tribu ne Isaraela, öni angeic: “Hane hi la hna amekötin hnei Iehova: 2 Maine tro la ketre trahmany a sisinyi koi Iehova, maine sisinyi troa xomehnöthe la itre aja i angeic, tha tro kö angeic a atriane la hnei angeic hna qaja. Tro pe angeic a metrötrën asë la hnei angeic hna sisiny.
3 “Maine tro la nekö jajiny ka mele pala kö thei kem a sisinyi koi Iehova, maine sisinyi troa xomehnöthe la itre aja i angeic, 4 nge kola thuemacanyi kem la hnei angeic hna sisiny, maine sisinyi troa xomehnöth, nge pëkö hnei nyidrëti hna qaja, haawe, tro ha kapa la itre hnei angeic hna sisiny, me itre hnei angeic hna sisiny troa xomehnöth. 5 Ngo maine tro la kem a atre laka, hnei angeic hna sisiny, maine sisinyi pena troa xomehnöth, nge tro nyidrëti a sewe angeic, haawe, tha tro kö a kapa la itre hna sisiny. Tro hë Iehova a nue la ngazo i angeic, ke hna sewe angeic hnene la keme i angeic.
6 “Ngo maine tro angeic a faipoipo, nge tha eatrën pala kö angeic la hna sisiny, maine pena la hna sisinyi ngo tha hna pane mekune kö, 7 nge kola thuemacanyine la föi angeic, nge pëkö hnei nyidrëti hna qaja ngöne la drai cili, haawe, tro ha kapa la itre hnei angeic hna sisiny, me itre hna sisinyi troa xomehnöth. 8 Ngo maine tro la föi angeic a sewe angeic ngöne la drai ne nyidrëti a atre, haawe, ijiji nyidrëti hi troa apëne la hnei angeic hna sisiny, maine pena la hnei angeic hna sisinyi ngo tha hna pane mekune pe. Nge tro hë Iehova a nue la ngazo i angeic.
9 “Maine tro la sine föe, maine föe ka sei hna cil a sisiny, qa i eahlo troa eatrën asë la hna sisiny.
10 “Ngo maine aja ne la ketre föe troa eatrëne la hnei angeic hna sisiny, maine pena la hna sisiny troa xomehnöth, ngacama ka faipoipo hë angeic, 11 nge kola thuemacanyine la föi angeic, ngo pëkö hnei nyidrëti hna qaja, nge tha sewe angeic kö hnei nyidrë, haawe, tro ha kapa la itre hnei angeic hna sisiny, me itre hna sisinyi troa xomehnöth. 12 Ngo maine troa thuemacanyine la föi angeic göne la itre hnei angeic hna sisiny, maine la hna sisinyi troa xomehnöth, nge nyidrëti a apën la itre ej, haawe, tha tro kö a kapa la itre hna sisiny. Pine laka, föi angeic la ka apën itre ej, tro hë Iehova a nue la ngazo ne la föe. 13 Ame asë hi la itre hna sisiny hnene la föe, maine itre hna sisinyi troa xomehnöth,* ke loi e troa kapa maine apën hnene la föi angeic. 14 Ngo maine kola tro la itre drai, nge pëkö hna qaja hnene la föi angeic, haawe, nyidrëti hi lai a kapa asë la itre hnei angeic hna sisiny, me itre hna sisiny troa xomehnöth. Nyidrëti hi lai a kapa, ke tha hnei nyidrëti kö hna sewe angeic ngöne lo drai ne nyidrëti a atre. 15 Ngo maine tro nyidrëti a apën itre ej, nge nyimu drai hë thupen la kola thuemacanyi nyidrë, ke tro nyidrëti a xeni pun la ngazo ne la föi nyidrë.
16 “Celë hi itre wathebo hnei Iehova hna ahnith koi Mose, göne la trahmanyi me föi nyidrë, memine la kem me nekö i nyidrë jajiny ka mele pala kö ngöne la hnalapa i nyidrë.”