Ezekiela
12 Hnei Iehova hmaca hna ewekë koi ni me hape: 2 “Nekö i atr, eö a mel nyipine la nöje ka icilekeu. Hetre luemeke i angatr ngo tha öhne kö angatr, hetre hnangenyë i angatr ngo tha drenge pe angatr, ke ketre nöje lai ka icilekeu. 3 Ngo ame kö eö nekö i atr, hnëkë trengetrenge jë matre tro kowe la nöje trenyiwa. Nge e lai hë, tro eö a tro qëmekei angatr tune la atre hna kötre fë. Tro eö a trotrije la hnalapa i ö qëmekei angatr, matre tro kowe la ketre götran tune la atr hna kötre fë. Ma tro jë angatre lai a hane saze, ngacama ketre nöj ka icilekeu angatr. 4 Nge e lai pala kö, tro eö a trotrije la hnalapa i ö qëmekei angatr memine la trengetrenge hnei ö hna hnëkën, matre tro kowe la nöje trenyiwa. Nge e heji hë, tro eö a tro qëmekei angatr tune la atre hna kötre fë.
5 “Tro eö a kuje la ngöne uma qëmekei angatr, me alöne qa lai la trengetrenge i ö. 6 Nge qëmekei angatr, tro eö a ajöne la trengetrenge i ö, me lö fë e jidr. Heetrëne ju la iqëmeke i ö, matre tha tro kö eö a öhne la ihnadro, ke eni a kuca matre tro eö a ketre hatren kowe la nöje Isaraela.”
7 Ame hnenge hna kuca tune lo hnei nyidrë hna upi ni. E lai, hnenge hna lö fë la trengetrengeng qa ngöne la umang, kösë trengetreng ne la atre hna kötre fë. Nge e jidri hë, hnenge hna kuje la ngöne uma hnene la lue iwanakoimeng. Nge ame hë la kola mit, hnenge hna alöne la trengetrengeng, me ajöne trongën qëmekei angatr.
8 Nge ame e hmakany thupene lai, hnei Iehova hmaca hna ewekë koi ni me hape: 9 “Nekö i atr, tha hnene kö la nöje Isaraela, lo nöje ka icilekeu, hna hane hnyingë eö la hnei ö hna kuca? 10 Hape jë koi angatr: ‘Hane hi la hna qaja hnei Iehova Joxu Ka Sisitria: “Hane hi la itre trengewekë thatraqane la joxu e Ierusalema, memine la nöje Isaraela asë ngöne la traon.”’
11 “Qaja jë koi angatr ka hape, eö la ketre hatren. Nge ame la hnei ö hna elon, ke celë hi hna troa kuca koi angatr. Tro ha kötre sai angatr kowe la nöje trenyiwa. 12 Ame la joxu e nyipi angatr, ke tro angeic a ajöne la trengetrenge i angeic me tro e jidr. Tro angeic a kuje la ngöne uma, me alön qa cili la trengetrenge i angeic. Tro angeic a heetrëne la iqëmeke i angeic, matre tha tro kö angeic a öhne la ihnadro. 13 Tro ni a kuiëne koi angeic la ifileng, nge tro hë angeic a jötre ngön. Thupene lai, tro ni a xomi angeic a tro Babulona ngöne la nöje i angetre Kaledaia, ngo tha tro kö angeic a öhn la nöj. Nge tro angeic a meci e cili. 14 Nge ame la itre ka cile xötreithi angeic, lo itre ka xatua angeic me itre soc i angeic, ke tro ni a aisaije angatr ngöne la nöjei götran; tro ni a uthe la taua me weje huzu angatr. 15 Nge tro hë angatr a atre laka, Iehova ni, e tro ni a aisaije angatr e cailo fen, me aije angatr nyipine la itre nöj. 16 Ngo tro ni a amelene la itre xan qa ngöne la isi,* me jiin, me itre meci ka ixötrekeu, matre tro angatr a qaja kowe la itre nöj hnei angatr hna tro kow, la itre huliwa hna methinën hnei angatr hna kuca; nge tro hë angatr a atre e cili laka, Iehova ni.”
17 Hnei Iehova hmaca hna ithanata koi ni, me hape: 18 “Nekö i atr, tro eö a hmengöhmengön la eö a xeni falawa, me iji tim ngöne la xou me hnehengazo. 19 Hape jë kowe la itre atrene la nöj: ‘Hane hi la hna qaja hnei Iehova Joxu Ka Sisitria göne la itre atrene Ierusalema ka mel ngöne la nöje Isaraela: “Tro angatr a hnehengazo la angatr a xeni falawa, me iji tim ngöne la xou, ke tro ha nuetrij la nöje i angatr pine la aqane iakötrë ne la itre atren. 20 Tro ha lep apatrene la itre traon hna lapan, nge tro ha hnapapa la nöj asë. Nge tro hë epuni a atre laka, Iehova ni.”’”
21 Hnei Iehova hmaca hna ithanata koi ni, me hape: 22 “Nekö i atr, tha hna majemine kö qaja e Isaraela ka hape: ‘Kola tro la itre drai, ngo tha eatre pe la hna meköle goeën’? 23 Ngo enehila, hape jë koi angatr: ‘Hane hi la hna qaja hnei Iehova Joxu Ka Sisitria: “Tro ni a apatrene la trengewekë cili, nge tha tro hmaca kö a qaja lai e Isaraela.”’ Ngo qaja jë pe koi angatr: ‘Easenyi hë la ijine troa eatr asë la itre hna meköle goeën.’ 24 Ke tha tro hmaca kö a hetre hna meköle goeën ka thoi, me itre hna perofetan ka iaö ngöne la nöje Isaraela. 25 ‘“Ke tro ni Iehova a ithanata. Ame asë hi la hnenge hna troa qaja, ke tro itre ej a canga eatr. Nöje ka icilekeu, tro ni a qaja la trengewekëng me eatrën e mele pala kö epun,” öni Iehova Joxu Ka Sisitria.’”
26 Hnei Iehova hmaca hna ithanata koi ni, me hape: 27 “Nekö i atr, hane hi la hna qaja hnene la nöje Isaraela: ‘Hmitre pala kö troa eatrëne la hnei angeic hna meköle goeën, nge thatraqane la itre drai elany la hnei angeic hna perofetan.’ 28 Celë hi matre, hape jë koi angatr: ‘Hane hi la hna qaja hnei Iehova Joxu Ka Sisitria: “‘Tha tro kö a hmitr eatre la ketre trengewekëng; ame asë hi la hnenge hna qaja, ke tro ha eatr,’ öni Iehova Joxu Ka Sisitria.”’”