Iobu
5 “Pane hë jë! Hapeu, tro kö a sa koi ö?
Drei la itre angela ka hmitrötr hnei ö hna troa thithi kow?
2 Ke tro ha humuth la atr ka hmo hnene la hna lapa fë trengehni,
Nge tro la meciun a humuth la atr ka kapa asë la hna qaja koi angeic.
3 Nge hnenge hna öhne la atr ka hmo kola saathe aqean la itre iwaane i angeic,
Ngo canga saqe hi ejin la hnalapa i angeic.
4 Nge tha lapa tingetinge kö la itre nekö i angeic,
Nge hna wajaficanyi angatr ngöne la qëhnelö ne la traon, nge pëkö ka amele angatr.
5 Nge ame la ka mecijiin, angeic a xeni la hna menuën hnene la hmo,
Nge angeice fe a xen qa ngöne la itre sinöe ka ithiny,
Nge ame la itre ewekë ne la atre ka hmo me itre nekö i angeic, ke hna thapa.
6 Ke tha ka cia kö la itre akötr e kuhu hnadro,
Nge tha ka xulu kö la hleuhleu qa ngöne la dro.
7 Ke hna hnahone la atr kowe la akötr,
Tune la malepene eë ka sesë e caha.
8 Ngo maine eni ju lae eö, tro ni a hë Akötresie,
Nge tro hë ni a nue la jolenge koi nyidrë,
9 Lo atre kuca la itre ewekë atraqatr nge hna thatreine trotrohnin,
Itre ewekë nyine hain nge hna thatreine e.
10 Nyidrëti a hamëne la mani kowe la fen
Me upe la itre tim kowe la itre hlapa.
11 Nge nyidrëti a adraiëne la itre ka co,
Me amejëne la itre ka akötr kowe la hnë mano.
12 Nge nyidrëti a ajeane la itre nyinyithiina ne la itre ka iaö,
Matre gufa la huliwa ne la lue ime i angatr.
13 Nge nyidrëti a ea la itre ka iaö ngöne la sipu nyinyithiina i angatr,
Matre atriane la itre mekuna ne la itre ka inamacan.
14 E lai, angatr a ixelë memine la melöhlem,
Nge ame e hnaipajö, angatr a ethenyi kösë jidri hë.
15 Nge nyidrëti a amelene qa ngöne la taua ka tro pi qa ngöne la që i angatr,
Nge nyidrëti a amelene la itre ka pë ewekë qa ngöne la imene la itre ka catr,
16 Celë hi matre, hetre mejiun kowe la itre ka co,
Ngo hna thinge pe la që ne la itre ka tha meköti kö.
17 Matre drenge hnyawane ju la;
Manathithi la atr hnei Akötresie hna hajin, haawe, the nuetrije kö la ihaji ne la Ka Tru Trenge Men!
18 Ke nyidrëti a akötrën, ngo nyidrëti fe a atuth la eatr;
Nyidrëti a eatrën, ngo nyidrëti fe a ameun hnene la lue ime i nyidrë.
19 Tro kö nyidrëti a amele nyipë qa ngöne la 6 lao akötr,
Nge tha tro kö a akötrë nyipë hnene la hna 7 ne akötr.
20 Nge maine troa traqa la jiin, tro kö nyidrëti a itö nyipë qa ngöne la mec,
Nge maine troa isi, tro ha amele nyipë qa ngöne la emenene la taua.
21 Nge tro ha thupë nyipë qa ngöne la ithaucë ne la ukeineqë,
Nge e traqa ju la iapatreny tha tro kö nyipëti a xou.
22 Nge tro hë nyipëti a hnyima fë la kola iapatreny me jiin,
Nge tha tro kö nyipëti a xouen la itre öni ne hnitr e celë fen.
23 Ke tha tro kö a akötrë nyipë hnene la itre etë ne la itre hlapa,*
Nge tro nyipëti a mele tingeting memine la itre öni ne hnitr ngöne la itre hlapa.
24 Nge tro hë nyipëti a atre laka, tingetinge hë la itate i nyipë,
Nge ame hë la nyipëti a wange hmaca la hna axö öni, ke tha patre kö la ala cas.
25 Nge tro ha tiqa hnei nekö i nyipë,
Nge tro ha mana la itre matra i nyipë tune la itre hnitr e celë fen.
26 Nge tro hë nyipëti a uti koi hua, ngo hetre trengecatre i nyipëti pala kö,
Tune la itre uke qitr hna menuën ngöne la nyipi ijin.
27 Goeën! Ase hë hun waipengön ej, nge eje kö lai.
Haawe, drenge ju nge kapa ju.”