Hnaaluene Tusi Itre Joxu
8 Öni Elisaia kowe la thinene lai nekönatr hna amelene hmaca ka hape: “Mejë jë nyipo me fami i nyipo qa la, nge tro ja lapa ngöne la ketre nöj hnei nyipoti hna öhn, ke tro Iehova a axulune la jiin koi 7 lao macatre ngöne la nöje celë.” 2 Matre hnene la föe hna drenge la hna qaja hnene la atre ne la nyipi Akötresie. Eahlo a mejë jë me fami i eahlo kowe la nöje i angetre Filisiti, nge angatr a lapa ju e cili koi 7 lao macatre.
3 Thupene la 7 lao macatre, eahlo a bëeke hmaca jë qa ngöne la nöje i angetre Filisiti. Eahlo a tro ju kowe la joxu troa sipone la hnalapa me götrane i eahlo. 4 Ngöne la ijine cili, hnene la joxu hna ithanata me Gehazi, lo hlue ne la nyipi Akötresie. Hnene la joxu hna sipo angeic ka hape: “Pane qaja jë koi ni la nöjei huliwa ka tru hnei Elisaia hna kuca.” 5 Matre ame ju hi la Gehazi a ase qaja kowe joxu la aqane amelen lo nekönatr hnei Elisaia, traqa pi la thinene lai nekönatr, troa sipone hmaca kowe la joxu la hnalapa me götrane i eahlo. Matre canga öni Gehazi ka hape: “Joxunge fe, hane hi lai föe, me nekönatr hnei Elisaia hna amelene hmaca.” 6 Nge hnene la joxu hna hnyinge koi eahlo, nge eahlo a qejepengön asë jë koi nyidrë. Matre hnene la joxu hna upe la ketre ka huliwa koi nyidrë, troa wai eahlo, nge öni nyidrë: “Hamëne hmaca pi la nöjei ewekë i eahlo. Nge hamë eahlo pi la thupen ka ihmeku memine la mani nyine tro eahlo a kapa, e hnei eahlo ju hna salemëne la itre wene ne la hlapa i eahlo, qaane lo eahlo a trotrije la nöj, uti hë enehila.”
7 Ame hnei Elisaia hna tro Damaseko. Nge ngöne la ijine cili, kola wezipo hnei Benadada joxu ne Suria. Matre hnene la ketre atr hna thuemacanyine la joxu ka hape, e Damaseko la atre ne la nyipi Akötresie. 8 Matre hnene la joxu hna upi Hazaela ka hape: “Tro fë jë la ahnahna kowe la atre ne la nyipi Akötresie, nge hnyinge jë koi Iehova jëne angeic ka hape, ‘Tro kö a loi la mecing?’” 9 Matre hnei Hazaela hna tro koi Elisaia memine la itre ahnahna, ene la nöjei ewekë ka lolo qa Damaseko, hna thu hnei 40 lao kamela. Angeic a lö jë koi Elisaia me hape: “Hnene la nekö* i nyipë Benadada, joxu ne Suria, hna upi ni troa hnyingë nyipë ka hape, ‘Tro kö a loi la mecing?’” 10 Matre öni Elisaia: “Tro ja qaja koi angeic ka hape, ‘Tro ha loi la meci nyipë.’ Ngo tha eje kö, ke ase hë Iehova amamane koi ni ka hape, tro angeic a mec.” 11 Ame hnei Elisaia hna goeë tili Hazaela, uti hë la Hazaela a hmahma. Thupene lai, hnene la atre ne la nyipi Akötresie hna treij. 12 Matre öni Hazaela koi Elisaia ka hape: “Hnauëne la nyipëti a treij joxung?” Nge sa jë hi Elisaia ka hape: “Pine laka, atre hi ni la nöjei akötr hnei eö hna troa axulun kowe la nöje Isaraela. Tro eö a manithe la itre traone hna eköhagen e Isaraela, nge ame la itre sooc ka atreine isi e Isaraela, tro eö a humuthi angatr hnei taua. Nge tro eö a sa la itre nekönatr e Isaraela, nge tro eö a thë la upune ne la itre föe.” 13 Ngo öni Hazaela jë hi ka hape: “Joxung, tro ni a kuca tune kaa la itre ewekë cili nge ka pë pengöne ni?” Matre öni Elisaia: “Ase hë Iehova qaja koi ni ka hape, tro eö a joxu ne Suria.”
14 Thupene lai, hnei Hazaela hna trotriji Elisaia, me bëeke kowe la joxu i angeic. Nge önine la joxu koi angeic: “Hnei Elisaia hna qeje nemen?” Matre öni Hazaela ka hape: “Öni nyidrë, tro ha loi la meci nyipë.” 15 Ngo ngöne la drai thupen, hnei Hazaela hna xomi balaiketr, me trapin ngöne tim, me hujan* la iqëmeke ne la joxu i angeic, uti hë la nyidrëti a mec. Ame hnei Hazaela hna nyihnai nyidrë troa joxu ne Suria.
16 Nge ame hë la kola 5 lao macatre ne musi Iorama nekö i Ahaba joxu ne Isaraela, hna acili Iorama nekö i Iehosafata troa joxu ne Iudra. 17 Traqa koi 32 lao macatre i nyidrë, lo kola acili joxu nyidrë, nge hnei nyidrë hna musi koi 8 lao macatre e Ierusalema. 18 Ceitune hi la itre ngazo i nyidrë me itre joxu ne Isaraela, ene lo itre ngazo hna kuca hnene la fami i Ahaba, ke hnei nyidrë hna faipoipo memine la nekö i Ahaba jajiny. Ka kuca pala hi nyidrëti la ngazo koi Iehova. 19 Ngo tha ajane kö Iehova troa apatren la baselaia ne Iudra, pi Dravita hlue i nyidrë. Ke hnei nyidrëti lo hna sisinyi koi Dravita laka, tro pala hi angeic me itre nekö i angeic a hetre laame cil.*
20 Nge ngöne la ijine musi Iorama, hnene la nöje Edoma hna icilekeu memine la musi Iudra, nge angatr a acile jë la sipu joxu i angatr. 21 Matre hnei Iorama hna mejë me itre ikatr i nyidrë a tro Zaira. Nge hnene la angetre Edoma me itre tane la itre ka ti ikatr, hna cile xötreithi nyidrë. Ngo hnei nyidrë hna mejë e jidr, me ngaa angatr. Matre hnene la itre sooc hna kötre kowe la hnalapa i angatr. 22 Ngo hnene pala hi la nöje Edoma hna icilekeu memine la musi Iudra, nge uti pala hi enehila. Ngöne la ijine cili, hnene fe la itre atrene Libena hna icilekeu me Iudra.
23 Nge ame la mele i Iorama me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 24 Ame hna meci hnei Iorama, nge hna kelemi nyidrë me itre qaaqaa i nyidrë, ngöne la Traon i Dravita. Thupene lai, hna acili joxu Ahazia nekö i nyidrë, troa nyihna i nyidrë.
25 Nge ame ngöne la kola 12 lao macatre ne mus i Iorama, nekö i Ahaba joxu ne Isaraela, hna acili Ahazia nekö i Iorama troa joxu ne Iudra. 26 Traqa koi 22 lao macatre i Ahazia lo kola acili joxu nyidrë, nge hnei nyidrë hna musi koi ca macatre e Ierusalema. Athalia la ëjene la thine i nyidrë, nge eahlo la api Omeri joxu ne Isaraela. 27 Casi hi la itre ngazo i Ahazia memine la fami i Ahaba. Nyidrëti a kuca la ngazo koi Iehova, tune lo fami i Ahaba, ke hnei nyidrë hna faipoipo memine la ketre atrene la fami i Ahaba. 28 Matre hnei Ahazia hna ce tro me Iorama nekö i Ahaba, troa tro Ramothe-gileada, me isi me Hazaela joxu ne Suria. Ngo eatre ju hi Iorama hnei angetre Suria. 29 Qa ngöne lai, hnei Iorama joxu hna bëek a tro Iezerela, matre nyinyine la hna eatrë nyidrë hnei angetre Suria e Rama,* lo nyidrëti a isi me Hazaela joxu ne Suria. Hnei Ahazia, nekö i Iorama joxu ne Iudra, hna ut a tro Iezerela troa wai Iorama nekö i Ahaba, ke ka eatre* nyidrë.