Hnaaluene Tusi Itre Joxu

16 Ngöne la kola 17 lao macatre ne mus i Peka nekö i Remalia, hna acili joxu Ahaza nekö i Iotham, troa joxu ne Iudra. 2 Nge 20 lao macatre i nyidrë lo kola acili joxu nyidrë. Hnei nyidrë hna mus koi 16 lao macatre e Ierusalema. Hnei Ahaza hna kuca la ngazo koi Iehova Akötresi nyidrë, tha tui Dravita kö qaaqaa i nyidrë. 3 Hnei nyidrë hna nyitipune* la tulu ka ngazo ne la itre joxu ne Isaraela. Hnei nyidrëti fe hna dreuthe la nekö i nyidrë trahmany, me xome la itre thiina ka sis ne la itre xa nöj. Itre nöje lai hnei Iehova hna helën qëmekei angetre Isaraela. 4 Hune la itre hnë hmi gaa hmitrötr, me hune la itre sasala, me fene la itre sinöe ka cia lolo, hnei Ahaza hna tro fë huuj, me huhajine la itre huuje i nyidrë.

5 Nge hnei Rezina joxu ne Suria, me Peka joxu ne Isaraela nekö i Remalia, hna elë troa isi me Ierusalema, nge Ahaza fe e cili. Angatr a lapa ju xötreithe la traon, ngo thatreine ju kö angatre xome la traon. 6 Ngöne la ijine cili, hnei Rezina joxu ne Suria hna hamëne hmaca koi angetre Edoma, la traon ne Elath. Thupene lai, nyidrëti a helëne pi la angetre Iudra ka mel e cili. Matre hnei angetre Edoma hmaca hna bëeke troa lapa e Elath, nge angatre pala hi a lapane la götrane cili. 7 Ame hnei Ahaza hna iupi fë maca koi Tigelathe-pilesera, joxu ne Asuria, me hape: “Eni hi la hlue i nyipë, me nekö i nyipë.* Matre, pane trohemi troa amele ni qa ngöne la ime ne la joxu ne Suria me Isaraela, ke nyidroti a ce ut troa isi me eni.” 8 Nge hnei Ahaza hna xome la sileva me gool hnine la uma ne hmi i Iehova, me hnine la itre trengamo ne la hnalapa i joxu. Nyidrëti a iupi fë asë pi nyine itöne la joxu ne Asuria. 9 Matre hnene la joxu ne Asuria hna kapa, nge nyidrëti a tro ju troa thapa la nöje Damaseko. Nyidrëti a oth asë jë la itre atren, me xomi* angatr a tro Kira, me humuthi Rezina.

10 Thupene la itre ewekë cili, hnei Ahaza joxu hna tro Damaseko, troa wai Tigelathe-pilesera, joxu ne Asuria. Nge hnei nyidrëti hna öhn e cili la ita ne huuj e Damaseko, matre nyidrëti a iupi fë pi koi Uria lo atre huuj, la hna desë me tulu ne lai ita ne huuj. 11 Matre hnei Uria hna acile la ketre ita ne huuj, thenge lo itre ithuemacany hnei Ahaza joxu hna iupi fë koi angeic qa Damaseko. Nge qëmekene tro Ahaza joxu a bëek qa Damaseko, ase fe hë Uria acile la ita ne huuj. 12 Matre ame hë la Ahaza joxu a bëeke qa Damaseko, me öhne la ita ne huuj, nyidrëti a easenyine ju, me tro fë huuj e cili. 13 Nge hune la ita ne huuj, hnei nyidrëti hna huhajine la itre huuj ne dreuth asë i nyidrë, me itre huuj ne wene feja. Nge nyidrëti a nenge pi hun ej la waina nyine fii huuj, me thathane hnene la madra ne la itre huuj ne tingeting.* 14 Nge ame pena la ita ne huuj kopa ka cil qëmeke i Iehova, me qëmekene la uma ne hmi Iehova, nyipine la ita ne huuje i Ahaza memine la uma ne hmi, hnei Ahaza hna xome qa lai, me amë ngöne la götrane kolopi ne la ita ne huuje i nyidrë. 15 Thupene lai, öni Ahaza koi Uria atre huuj ka hape: “Hune la ita ne huuj ka tru, tro eö a huhajine la huuj ne dreuth asë ne hmakany, me tro fë la huuj ne wene feja e hej, memine la huuj ne dreuth asë ne la joxu, memine la huuj ne wene feja i nyidrë, me itre xa huuj ne dreuth asë, me itre huuj ne wene feja, memine la waina nyine fii huuj ne la nöj. Tro fe eö a thathane la ita ne huuj hnene la madra ne la nöjei huuj ne dreuth asë, me itre xa huuje kö. Nge ame pë hë la ita ne huuj kopa, tro pë hë ni a wange la nyine troa kuca memin.” 16 Ame hnei Uria atre huuj, hna kuca asë la hna qaja hnei Ahaza joxu.

17 Nge hnei Ahaza joxu, hna thupathupa la itre pano hna amë xötreithe la itre ikatr, me feje la itre trepene tim hune la itre ikatr. Ketre, nyidrëti a xome pi la Hnagejë ka të hune la itre kau kopa, me atë hune la trepen etë. 18 Nge nyidrëti a xometrije pi la götrane hna thing ezine la uma ne hmi i Iehova, lo hna huliwan e Sabath, me thinge la hnë lö ne la joxu kowe la uma ne hmi i Iehova. Nyidrëti a saze la itre ewekë cili pine la joxu ne Asuria.

19 Nge ame la mele i Ahaza me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 20 Ame hnei Ahaza hna meköl me itre qaaqaa i nyidrë ngöne la mec, nge hna kelemi nyidrë me angatr ngöne la Traone i Dravita. Nge hna acili joxu Hezekia* nekö i nyidrë, troa nyihna i nyidrë.