Ezekiela
8 Ame ngöne la hna 6 ne macatre, ngöne la drai 5 ne la hna 6 ne treu, lo eni a lapa ngöne la umang, nge itre qatre ne Iudra a lapa qëmekeng, ke hna ee ni hnene la iwanakoime i Iehova Joxu Ka Sisitria. 2 Eni pala kö a goeën, nge mama pi hi la iahnue ne atr ka tune la eë; hetre eë fene la ketre ewekë kösë gö i nyidrë, nge qane ju hi la gö i nyidrë a tro draië, hnenge hna öhn la ketre ewekë ka melemel tune la gool ka wië.* 3 Ame hnei nyidrë hna line la ketre ewekë kösë iwanakoim, me ea la peneheng. Nge hnene la ketre ua hna xepi ni nyipine la ihnadro me hnengödrai, me tro sai ni a tro Ierusalema, jëne la ketre hna meköle goeëne qaathei Akötresie, uti hë la qene qëhnelö e koho hnin, lo ka qëmek kowe la götrane kolopi. E cili hi lo hna acile la idrola* ka amejën la zalu.* 4 Nge e cili fe la elolo ne la Akötresi Isaraela, tune lo hnenge hna meköle goeën ngöne la gaa papa.
5 Matre öni nyidrëti jë hi: “Nekö i atr fe, pane goeëne jë e kolopi.” Ame hnenge hna goeën e kolopi, me öhn ngöne la götrane kolopi ne la qëhnelö ne la ita ne huuj, lo idrola* ka nyihatrene la zalu. 6 Thupene lai, öni nyidrë: “Nekö i atr, öhne hi ö la itre ewekë ka ngazo me ka sis hna kuca hnene la nöje Isaraela, nge ka ananyi ni qa ngöne la hnë hmi koi ni? Ngo ka co hi lai, ke tro hmaca kö eö a öhne la itre ewekë ka sisi catre kö.”
7 Thupene lai, hnei nyidrëti hna tro sai ni kowe la hnë lö ne la kur, nge ame la eni a goeën, hnenge hna öhne la ketre gaa xulu ngöne la ngöne uma. 8 Öni nyidrë koi ni: “Nekö i atr, kuje pi la ngöne uma.” Ame hnenge hna kuj, me öhne la ketre hnë lö. 9 Nge öni nyidrë: “Lö jë nge goeëne jë la itre ewekë ka ngazo nge ka sis hnei angatr hna kuca.” 10 Ame hnenge hna lö, me öhne la itre ewekë ka nyihatrene la itre öni ka wewë, me itre öni hna sisin, me itre idrola asë ka sis* ne la nöje Isaraela; hna xuje la itre ewekë cili hune la ngöne uma. 11 Nge kola cile qëmekene la idrola hnene la 70 lao qatre ne Isaraela; Iazania nekö i Safana fe thei angatr. Angatr a isa cile fë nyine dreu ka pui loi, nge kola so draië la punepunen. 12 Öni nyidrëti jë hi: “Nekö i atr, öhne fe kö eö la hna kuca mitin hnene la itre qatre ne Isaraela, ngöne la itre hnahag hna amë* la itre idrola cili? Ke öni angatr: ‘Tha öhnyi së kö hnei Iehova. Ase hë Iehova trotrije la nöj.’”
13 Thupene lai, öni nyidrë: “Ngo ka co hi lai, ke tro hmaca kö eö a öhne la itre ewekë ka sisi catre kö.” 14 Nge hnei nyidrëti hna tro sai ni kowe la qëhnelö e kolopi ne la uma i Iehova. Nge hnenge hna öhn e cili la itre föe ka lapa, me treije pine la haze Tamuza.
15 Nge öni nyidrëti hmaca jë hi: “Nekö i atr, öhne hi ö lai? Ngo ka co hi lai, ke tro hmaca kö eö a öhne la itre ewekë ka sisi catre kö.” 16 Ame hnei nyidrë hna tro sai ni kowe la kur e kuhu hnine la uma i Iehova. Nge e cili, ngöne la hnë lö ne la uma ne hmi i Iehova, nyipine la poretiko memine la ita ne huuj, kola hutrö kowe la uma ne hmi i Iehova hnene la 25 lao trahmany, me qëmek e koië; angatr a thili koië kowe la jö.
17 Matre öni nyidrë: “Nekö i atr, öhne hi ö lai? Hapeu, pëkö engazon kowe la angetre Iudra troa kuca la itre ewekë ka sisi cili, me atiqane la nöje hnei isi, me jele pala hi la trengehning? Goeën, angatr ha use la hnafijing hnene la picine sinöe i angatr!* 18 Haawe, tro hë ni a elëhni koi angatr. Tha tro kö la alamekeng a utipi angatr, nge ketre tha tro kö ni a meku angatr. Ngacama tro ju hë angatr a trutrune la hnangenyëng, ngo tha tro kö ni a drei angatr.”