Salamo

 2 Kola isa cil la itre joxu ne fen

Nge kola icasikeu la itre atr ka tru kösë casi hi angatr

 3 Öni angatr: “Tro sa axecien la itre cein

Me auken la itre eno i nyidro qaathe së!”

 4 Tro la atre lapa hune la theron e hnengödrai a hnyima;

Tro Iehova a hnyimasai angatr.

 5 Ngöne la ijine cili, tro nyidrëti a ewekë koi angatr cememine la elëhni

Me axounyi angatr hnene la elëhni atraqatr i nyidrë,

 6 Me hape: “Ase hë ni acil la joxung

Hui Ziona, lo wetreng ka hmitrötr.”

 7 Tro hë ni a qaja amaman la hna amekötin hnei Iehova;

Öni nyidrëti koi ni: “Eö la neköng;

Enehila, eni hë la keme i ö.

 8 Sipo ni jë, nge tro hë ni a hamë eö la itre nöj nyine edrö i ö

Me itre cane la fene hnengödrai nyine zi ö.

 9 Tro eö a anyilanyilanyi angatr hnene la sine tö fao,

Me thë akaqanyi angatr tune la ketre trengene tim hna kuca hnei dro ka fedr.”

10 Ame enehila itre joxu fe, inamacane pi;

Epun itretre amekötin, kapa ju la ihaji.*

11 Nyihlue i Iehova jë cememine la xou,

Nge madrine jë cememine la hmengöhmengön.

12 Atrune* jë la nekön, wanga elëhni jë Akötresie*

Nge wanga meci* pi epun,

Ke saqe hi Nyidrëti elëhni.