Hnaaluene Tus i Aqane Lapa Itre Joxu

14 Thupene lai, hnei Abia hna meköl me itre qaaqaa i nyidrë ngöne la mec. Nge hna kelemi nyidrë ngöne la Traone i Dravita. Nge hnei Asa nekö i nyidrë hna nyihna i nyidrë troa joxu. Ngöne la ijine mus i Asa, hnene la nöj hna mele tingeting koi 10 lao macatre.

2 Hnei Asa hna kuca la loi me meköt qëmeke i Iehova Akötresi nyidrë. 3 Hnei nyidrë hna apatrene qa ngöne la nöj la itre ita ne huuj trenyiwa, memine la itre hnë hmi gaa hmitrötr, me thëtrije la itre ipoto ka hmitrötr, me itre ipoto etë ka hmitrötr. 4 Ketre, hnei nyidrë hna amekötin koi angetre Iudra, troa thele Iehova Akötresi ne la itre qaaqaa i angatr, me metrötrëne la itre Wathebo me itre hna amekötin. 5 Nyidrëti a apatrene jë qa hnine la nöjei traon ne Iudra, la itre hnë hmi gaa hmitrötr, me itre ita ne dreu ka pui loi. Matre ngöne la ijine musi nyidrë, hnene la nöj hna mele tingeting. 6 Hnei nyidrëti hna xupe la itre traon hna eköhagen e Iudra, ke kola mele tingetinge la nöj. Nge pëkö ka thele isi me nyidrë ngöne la itre macatre cili, ke Iehova a hamë tingetinge koi Asa. 7 Nyidrëti a qaja jë kowe la itre atrene la nöje Iudra ka hape: “Jë fe matre xupe jë së la itre traone cili, nge tro sa eköhagen, me acili ita ne thup, me qëhnelö, me agö nyine acatrei qëhnelö. Nöje së pala kö la, ke hne së hna thele Iehova Akötresi së. Hne së hna thele nyidrë, nge hnei nyidrëti hna hamë tingeting xötreithi së.” Haawe, angatr a afenesine jë la itre hnei angatre hna xup.

8 Ngöne la trongene isi i Asa, ala 300 000 lao trahmanyi qa ngöne la tribu ne Iudra, ka cile fë ipetr ka tru me jo. Nge qa ngöne la tribu ne Beniamina, ala 280 000 lao sooc ka catr, itre ka cile fë neköi ipetr,* me tane pehna.

9 E thupen, hnei Zera qa Aithiope hna tro troa isi me Iudra, memine la 1 000 000 lao sooc, me 300 lao ikatr. Matre ame ju hi la angeic a traqa e Maresa, 10 Asa a tro ju troa isi me angeic. Matre hnei nyidro hna acile xötrëne la itre sooc i nyidro troa isi, ngöne la hnathup ne Zefata, ezine Maresa. 11 Nge hnei Asa hna sipon kowe la Akötresi nyidrë ka hape: “Iehova fe, tha nyipiewekë kö e tro la hnei nyipëti hna amelen a catr* maine kucakuca. Matre epi amele huni jë Iehova Akötresi hun, ke eahuni a mejiune* koi nyipë. Nge eahun a traqa troa isi memine la ka ala nyimu celë, ngöne la ëje i nyipë. Haawe Iehova fe, epi tha tro kö a ngaa nyipë hnene la itre atr ka troa mec.”

12 Qa ngöne lai, hnei Iehova hna kuca matre tro Asa me Iudra a ngaane la angetre Aithiope. Nge hnene la angetre Aithiope hna kötr. 13 nge hnei Asa memine la trongene isi nyidrë hna huzu angetre Aithiope uti hë Gerara. Nge angatr a humuthi angetre Aithiope jë, nge pëkö ca ka mel, ke hna lep anyilanyilane la angetre Aithiope hnei Iehova me trongene isi i nyidrë. Thupene lai, hnene la itre sooc ne Iudra hna thapa la itre mo ka nyimutre catr. 14 Nge angatr a lepe ju fe la nöjei traon xötreithi Gerara, ke itre atren a meci hnei xou pi Iehova. Hnene la itre sooc hna thepe mo ngöne la nöjei traon, ke nyimu ewekë nyine thapa. 15 Hnei angatre fe hna angazone la itre itat ne la itre ka thupë öni, me thapa la itro mamoe me kamela. Thupene lai, hnei angatr hna bëeke hmaca a tro Ierusalema.