Hnaaluene Tus i Aqane Lapa Itre Joxu

17 Nge hna acili joxu Iehosafata nekö i nyidrë, troa nyihna i nyidrë. Iehosafata a acatrene jë la musi nyidrë hui Isaraela. 2 Nyidrëti a acile jë la itre sooc ngöne la nöjei traon hna eköhagen ne Iudra, me itre sooc ngöne la nöje Iudra, me itre traon ne Eferaima. Itre traone lai hna thapa hnei Asa keme i nyidrë. 3 Ce Iehova me Iehosafata, ke nyidrë a nyitipu* Dravita qaaqaa i nyidrë, nge tha thele kö nyidrëti la itre Baala. 4 Eje hi, nyidrëti a thele la Akötresi ne la keme i nyidrë, me metrötrëne* la itre hna amekötin. Nge tha hnei nyidrëti kö nyitipune la aqane ujë ne la angetre Isaraela. 5 Matre hnei Iehova hna acatrene catrëne la hnanyijoxu fene la musi Iehosafata. Nge angetre Iudra asë a tro fë ahnahna koi Iehosafata. Matre trenamo catr nyidrë, nge atraqatre la lolo i nyidrë. 6 Hnei nyidrëti pala hi hna catr* troa trongëne la hna qaja hnei Iehova. Nge goi apatrene fe nyidrë qa Iudra la itre hnë hmi gaa hmitrötr, me itre ipoto ka hmitrötr.

7 Ngöne la kola köni macatre ne mus i nyidrë, hnei nyidrë hna iup troa thenge la itre he ne nöj i nyidrë, ene Benaila, me Obadaia, me Zakaria, me Nathaniela, me Mikaia. Nyidrëti a upi angatre jë troa hamë ini ngöne la itre traon ne Iudra. 8 Thei angatre fe la itre xa angetre Levi, ene Semaia, me Nethania, me Zebadia, me Asael, me Semiramoth, me Ionathana, me Adonia, me Tobia, me Tobadonia. Memine fe la lue atre huuj: Elisama me Iorama. 9 Hnei angatre hna xome trongëne la itusi Wathebo i Iehova, matre hamë ini e Iudra. Nge angatr a trongëne jë la nöjei traon ne Iudra troa hamë ini kowe la nöj.

10 Nge ame la nöjei baselaia xötreithi Iudra, angatr a xoue Iehova, matre tha hnei angatre kö hna isi me Iehosafata. 11 Nge hnene la angetre Filisiti hna traqa fë koi Iehosafata la itre ahnahna, me sileva hna athip. Nge ame angetre Arab, hnei angatr hna traqa fë la 7 700 lao kau, me 7 700 lao nani hna xome qa ngöne la itre öni i angatr.

12 Kolo pala hi a catrecatr hnei Iehosafata, nge nyidrëti pala hi a xup e Iudra la itre traon hna eköhagen, me itre traon ne ami ewekë. 13 Nyimutre la itre huliwa hna eköth hnei Iehosafata ngöne la nöje Iudra. Nge thei nyidrëti fe la itre sooc, me itre atre ka catre isi e Ierusalema. 14 Hna eköthe la itre lapa i angatr, thenge la itre fami angatr. Qa ngöne la tribu ne Iudra, hane hi la itre tane la ala 1 000: Adena la tan, me 300 000 lao sooc ka catr. 15 Nge fene la musi angeic: Iohanana la tan, me 280 000 lao trahmany. 16 Nge fene la mus i Adena: Amasia nekö i Zikeri, lo ka saen troa nyihlue i Iehova. Ce angeic me 200 000 lao sooc ka catr. 17 Nge qa ngöne la tribu i Beniamina: Eliada, ketre atre ka atreine isi, nge ce angeic me 200 000 lao trahmanyi ka cile fë tane pehna me ipetr. 18 Nge fene la musi angeic: Iehozabada, me 180 000 lao trahmanyi ka hnëkë troa isi. 19 Itre sooce lai ka huliwa koi joxu. Angatr a nyixane lo itre xa sooc hnei joxu hna acil ngöne la itre traon hna eköhagen, itre traon ne la nöje Iudra asë.