Hnaaluene Tus i Aqane Lapa Itre Joxu
22 Ame hnene la itre atre Ierusalema hna acili joxu Ahazia, nekö i Iorama ka co, troa nyihna i nyidrë. Ke hnene lo itre atrekënö ka traqa me angetre Arab hna humuthe la itre ka tru. Matre hnei Ahazia nekö i Iorama hna nyiqaane mus koi Iudra. 2 Traqa koi 22 lao macatre i Ahazia lo kola acili joxu nyidrë, nge hnei nyidrë hna musi koi ca macatre e Ierusalema. Athalia la ëjene la thine i nyidrë, eahlo la api* Omeri.
3 Casi hi la itre ngazo i Ahazia memine la fami i Ahaba, ke kolo pala hi a uku nyidrë hnei thin troa huliwa menu. 4 Nyidrëti a kuca la ngazo qëmeke i Iehova, tune lo fami i Ahaba, ke angatre hi la itre atresi nyidrë, thupene la meci ne la keme i nyidrë. Zö i angatre hi matre luzi pi nyidrë. 5 Hnei Ahaba hna xötrethenge la itre eamo i angatr, matre nyidrëti a ce tro ju me Iorama nekö i Ahaba joxu ne Isaraela, a tro Ramothe-gileada, me isi me Hazaela joxu ne Suria. Nge e cili hi lo hna pehna Iorama. 6 Hnei Iorama hna bëek a tro Iezerela, matre nyinyine lo eatre i nyidrë e Rama,* lo nyidrëti a isi me Hazaela joxu ne Suria.
Matre hnei Ahazia*, nekö i Iorama joxu ne Iudra, hna ut a tro Iezerela troa wai Iorama nekö i Ahaba, ke ka eatre* nyidrë. 7 Ngöne la ijine Ahazia a wai Iorama, hnei Akötresieti hna kuca matre meci pi Ahazia. Ke ame la Ahazia a traqa, nyidrëti a ce tro ju me Iorama koi Iehu, api* i Nimesi, lo hnei Iehova hna iën troa apatrene* la fami Ahaba. 8 Iehu pala kö a tro fë la iameköti kowe la fami i Ahaba, nge hnei angeic hna ixelë me itre he ne nöj ne Iudra, me itre trejin me Ahazia, itre ka huliwa koi nyidrë. Matre Iehu a humuthi angatre pi. 9 Thupene lai, hnei angeic hna thele Ahazia, ame hna xolouthi nyidrë e Samaria, lo hnë zae i nyidrë. Hna bëeke sai nyidrëti koi Iehu, nge hna humuthi nyidrë. Ame hna kelemi nyidrë, ke öni itre xan, “api Iehosafata lai, lo ka thele Iehova hnene la hni nyidrë ka pexej.” Ngöne la fami Ahazia, pëkö ka atreine musi kowe la nöj.
10 Nge ame hë la Athalia, thine i Ahazia a atre laka, meci hë la nekö i eahlo, hnei eahlo hna amekötin troa humuth asë la nöjei ka troa të hune la theron* ne Iudra. 11 Ngo hnei Ioseba, nekö i joxu jajiny, hna xome juetrë Ioasa nekö i Ahazia, ke ce nyën me itre xa nekö i joxu trahmany hna troa humuth. E cili, hnei Ioseba hna juetrë nyën memine la föe ka thupë nyën hnine la ketre hnahag. Ioseba la nekö i Iorama jajiny, (angeic la föi Iehoiada lo atre huuj, nge xa i Ahazia) hnei angeic hna juetrë nyën, matre tha tro kö Athalia a öhnyi nyën. Celë hi matre, mele ju kö Ioasa. 12 Ioasa a zae ju hnine la uma ne hmi ne la nyipi Akötresie koi 6 lao macatre, ngöne la ijine Athalia a musi kowe la nöj.