Hnaaluene Tusi Itre Joxu

18 Ngöne la hnaakönine macatre ne mus i Hosea nekö i Ela joxu ne Isaraela, hna acili joxu Hezekia nekö i Ahaza troa joxu ne Iudra. 2 Nge 25 lao macatre i nyidrë lo kola acili joxu nyidrë. Hnei nyidrëti hna mus koi 29 lao macatre e Ierusalema. Abi* la ëjene la thine i nyidrë, nge nekö i Zakaria eahlo. 3 Nyidrëti a kuca la loi koi Iehova, tune lo aqane kuca i Dravita qaaqaa i nyidrë. 4 Nyidrëti hi lo ka apatrene la itre hnë hmi gaa hmitrötr ne la nöj, me thë la itre poto etë ka hmitrötr, me sa lo sine feni ka hmitrötr. Nge hnei nyidrëti fe hna lep anyilanyilane lo une kopa hna kuca hnei Mose, ke uti hë la ijine cili, hnene la itre nekö i Isaraela hna huhajine la itre huje i angatr qëmekene la une kopa.* Hna majemin hën ej ka hape, iune idrola kopa. 5 Hezekia a mejiune koi Iehova Akötresi Isaraela. Nge qëmekei nyidrë, me thupei nyidrë, pëkö xa joxu ne Iudra ka tui nyidrë. 6 Hnei nyidrëti hna fedre catre koi Iehova, nge tha hnei nyidrëti kö hna nuetriji Akötresie. Hnei Hezekia hna catre drengethenge la itre wathebo hnei Iehova hna hamëne koi Mose. 7 Nge ce Iehova me Hezekia. Ka inamacane la aqane ujë i Hezekia ngöne la nöjei huliwa i nyidrë. Hnei Hezekia hna icilekeu memine la joxu ne Asuria, ke xele kö nyidrë ma nyihluene la joxu ne Asuria. 8 Hnei nyidrëti fe hna ngaa angetre Filisiti uti hë e Gaza, me itre götran ezin, qane la itre ita ne thup,* uti hë la itre traon hna eköhagen.

9 Ngöne la kola 4 lao macatre ne mus i Hezekia joxu ne Iudra, hmekune la kola 7 lao macatre ne mus i Hosea, nekö i Ela joxu ne Isaraela, hnei Salemanesa, joxu ne Asuria hna cile xötreithe Samaria. 10 Hnei angetre Asuria hna thapa la traone cili thupene la köni macatre. Nge hna traqa hmekune la kola 6 lao macatre ne mus i Hezekia, ene la kola 9 lao macatre ne mus i Hosea joxu ne Isaraela. 11 Thupene lai, hnene la joxu ne Asuria hna kötre fë la itre ka lapa e Isaraela a tro Asuria. Nge nyidrëti a alapa angatre jë e Hala, me Habora ezine la hneopegejë Gozana, me ngöne la itre traone i angetre Madai. 12 Hna traqa tun, ke hnei angetre Isaraela hna tha drengethenge Iehova Akötresi angatr. Hnei angatre pala hi hna tha metrötrëne lo isisinyikeu i nyidrë, ene lo hnei Mose hlue i Iehova hna amekötin. Tha drenge kö angatr, nge tha trongëne kö angatr.

13 Ame ngöne la kola 14 lao macatre ne mus i Hezekia, hnei Saneribi joxu ne Asuria, hna isi me thapa la nöjei traon hna eköhagen e Iudra. 14 Ame hnei Hezekia joxu ne Iudra, hna iupi fë maca kowe la joxu ne Asuria e Lakisa. Öni nyidrë: “Ka tria la aqane ujëng, ngo maine tro nyipë a mejë qa ngöne la nöjeng, tro hë ni a hamë nyipëti la nöjei ewekë hnei nyipëti hna ajan.” Qa ngöne lai, hnene la joxu ne Asuria hna amekötin koi Hezekia joxu ne Iudra, troa kuiëne la 300 lao talane* sileva, me 30 lao talane gool. 15 Ame hnei Hezekia hna hamëne la nöjei sileva hnine la uma ne hmi Iehova, me hnine la trengamo ne la hnalapa i joxu. 16 Ngöne la ijine cili, hnei Hezekia hna feje* la itre qëhnelö ne la uma ne hmi Iehova, me itre hune qëhnelö hnei nyidrëti hna heetrën hnei gool, me hamën kowe la joxu ne Asuria.

17 Ame hnene la joxu ne Asuria hna upe qa Lakisa la Taretana,* memine la Rabesarisa,* memine la Rabesake* troa tro Ierusalema, memine la trongene isi atraqatr troa ixelë me Hezekia joxu. Angatr a elë jë a tro Ierusalema, me cil ezine la jë i tim ne la kesao* e koho, ezine la gojenyi ka tru ne la hlapa ne la atre wasi mano. 18 Ame hnei angatr hna sipon tro la joxu a lö pi qa ngöne la traon. Ngo hnei Eliakima nekö i Hilekia, me Sebena, me Ioa nekö i Asafa hna tro koi angatr. Nge Eliakima la atre thupëne la hnalapa i joxu, nge Sebena la sekreter, nge Ioa la atre feja tus.*

19 Ngo önine la Rabesake koi angatre ka hape: “Pane qaja jë koi Hezekia ka hape, ‘Hane hi la hna qaja hnene la joxu ka tru, ene la joxu ne Asuria, “Eö a mejiune koi nemen? 20 Nge ma öni eö, ‘Ka maca ni ngöne la isi, nge ijije hi la trengecatreng.’ Ngo ka tria la mekuna i ö. Ke eö a mejiune koi drei matre icilekeu me eni? 21 Dreng! Eö a mekune troa qale koi Aigupito, ngo ketre rozo lai ka xöcixöci. Nge maine tro la ketre atr a hujan ej, ke tro ha thin axulune la hnatrapaime i angeic. Ke celë hi pengö i Farao joxu ne Aigupito, nge tro fe a traqa tun kowe la nöjei atre ka mejiune koi angeic. 22 Nge the qaja kö koi ni ka hape, ‘Eahuni a mejiune koi Iehova Akötresi hun,’ ngo hnei eö pe Hezekia hna apatren qa ngöne la nöj la itre hnë hmi gaa hmitrötr, me itre ita ne huuj ne la Akötresie cili, me qaja kowe la angetre Iudra me Ierusalema ka hape, ‘Tro epuni a thil e Ierusalema qëmekene la ita ne huuj celë.’”’ 23 Ame enehila, tro sa pane wange ka hape, drei la ka troa huun, eö maine la tixeng, lo joxu ne Asuria: tro ni a hamë eö la 2 000 lao hos, matre mama jë koi huni laka, atreine jë kö eö öhne la itre atr ka troa isa tith itre ej! 24 Matre, tro eö a atreine helëne tune kaa la ca gavena, lo tane ka co ne la tixeng, nge eö pe a mejiune koi Aigupito matre hetre ikatr, me itretre ti hos? 25 Nge eö kö a mekune laka, tha hnei Iehova kö hna upi ni troa apatrene la nöj? Hnei Iehova hna qaja koi ni ka hape: ‘Tro jë kowe la nöje ce, nge apatrene pi.’”

26 Ame hnei Eliakima nekö i Hilekia, me Sebena, me Ioa hna qaja kowe la Rabesake ka hape: “Ithanata jë koi huni qene Arama,* ke trotrohnine hi hun. Ngo the ewekë kö qene Iudra,* wanga drenge jë la itre atr hune la ihag.” 27 Ame hnene la Rabesake hna sa koi angatr ka hape: “Önine la tixeng, tha koi epuni casi kö* memine la joxu i epun la itre trengewekë celë! Ngo kowe la itre atr ka të hune la ihag. Ke tro fe angatr elany a xeni la itre agetrine i angatr, me ce ije me epun la hnei angatre hna zij!”

28 Nge hnene la Rabesake hna sue catr ngöne la qene hlapa i angetre Iudra, ka hape: “Drenge ju la trengewekë ne la joxu ka tru, la joxu ne Asuria. 29 Hane hi la hna qaja hnei joxu, ‘The tro kö a amenu epun hnei Hezekia, ke thatreine kö angeic amele epuni qaatheng. 30 Hezekia a upi epuni troa mejiune koi Iehova, me hape: “Tro kö Iehova a amele së, nge tha nyine lueluëne kö. Tha tro kö la joxu ne Asuria a thapa la traone celë.” 31 Ngo the drei angeice kö, ke hane hi la hnenge hna qaja, eni joxu ne Asuria: ‘Iloi jë me eni, nge trohemi koi ni. Nge tro epuni a isa ije la wene vine i epun, memine la iwacua i epun, me isa ije la tim qa ngöne la itre sima i epun. 32 Thupene lai, tro hë ni a traqa me xomi epun kowe la nöj ka tune la nöje i epun, nöj gaa hetre wene feja me nyipi waina, me falawa, me hnënge vin,* nöje gaa tru elaio,* me miel. Tha tro kö a humuthi epun, ngo tro pe epuni a mel. Haawe, the drei Hezekia kö, ke angeic a amenu epun la angeic a hape, ‘Tro kö Iehova a amele së.’ 33 Hapeu, hnene kö la ketre haze ne la itre xa nöj hna atreine thapa la zi angatr qaatheng? 34 Ekaa la itre haze ne Hamath me Arepada? Nge ekaa la itre haze ne Sefaravaima, me Hena, me Iva? Hapeu, hnei angatre kö hna amele Samaria qa ngöne la imeng? 35 Ala nyimu la itre haze ne la itre nöj, ngo drei la haze ka atreine thapa la zi angeic qaatheng? Nge tro Iehova a amele Ierusalema tune kaa qa ngöne la imeng?”’”

36 Ngo hnene la nöj hna lapa thaup, nge pëkö ca hnei angatr hna qaja, ke ase hë Hezekia joxu qaja koi angatr ka hape, “Tha tro kö epuni a sa koi angeic.” 37 Ame hnei Eliakima nekö i Hilekia, lo atre thupëne la hnalapa i joxu, me Sebena lo sekreter, me Ioa nekö i Asa, lo atre feja tus, hna kuie zezene la itre iheetre i angatr, me thuemacanyi Hezekia la itre trengewekë ne la Rabesake.