Hnaaluene Tus i Aqane Lapa Itre Joxu

15 Nge hnene la ua i Akötresie hna huliwa hui Azaria nekö i Oded. 2 Angeic a tro ju koi Asa me hape: “Pane drei ni ju Asa, me epuni asë, angetre Iudra me Beniamina. Tro Iehova a ce me epun, e tro epun a ce me nyidrë. Nge e tro epuni a thele nyidrë, tro nyidrëti a aijijë epuni troa öhnyi nyidrë. Ngo e tro epuni a triji nyidrë, tro fe nyidrëti a triji epun. 3 Ekö* hë Isaraela mel ananyine la nyipi Akötresie, nge pëkö atre huuj ka hamë ini koi angatr, nge pëkö wathebo i angatr. 4 Ngo ame ngöne la angatr a jol, hnei angatr hna bëeke koi Iehova Akötresi Isaraela, me thele nyidrë, nge hnei nyidrë hna aijijë angatr troa öhnyi nyidrë. 5 Ngöne la ijine cili, jole catre* troa trongëne la nöj, ke kola gomegome e kuhu hnin. 6 Kola iwajahuj la itre nöj, me itre traon hnei itre xa traon, ke Akötresie la ka azikoziko angatr hnene la nöjei pengöne jol. 7 Ngo ame kö epun, catre pi pe, nge the kucakuca* kö, ke tro ha amanathithine la huliwa i epun.”

8 Matre ame ju hi la Asa a drenge lai, memine la hna perofetan hnei perofeta Oded, kola hetre trengecatre i nyidrë troa thëtrije la itre idrola ka sis qa ngöne la nöje Iudra me Beniamina, me qa ngöne la itre traon hnei nyidrë hna thapa ngöne la itre wetr ne Eferaima. Nge nyidrëti a kuca hnyawane hmaca jë lo ita ne huuje i Iehova, lo ka cil qëmekene la poretiko i Iehova. 9 Thupene lai, nyidrëti a hën asë jë la angetre Iudra me Beniamina, me itre ka mele trenyiwa thei angatr: itre atrene Eferaima, me Manase me Simeona, itre atre ka ala nyim, nge ka trotriji Isaraela troa nyixöle i Asa lo angatr a öhne laka, ce Iehova Akötresie me Asa. 10 Hna acasi angatr asë e Ierusalema lo kola 15 lao macatre ne mus i Asa, hmekune la hnaakönine treu. 11 Ngöne la drai cili, hnei angatr hna huujën koi Iehova la 700 lao kau, me 7 000 lao mamoe, kolo itre öni hnei angatr hna thapa me bëeke fë. 12 Nge hnei angatr hna isisinyikeu troa thele Iehova Akötresi ne la itre qaaqaa i angatr, hnene la hni ka pexej, me mele i angatr ka pexej. 13 Nge ame la ka xele ma thele Iehova Akötresi Isaraela, hna humuthi angeic, ka co ju hë maine qatr,* trahmanyi ju hë maine föe. 14 Ame hnei angatr hna sisinyi draië koi Iehova, me sue madrin, me ufi trutru, me ufi jiane öni. 15 Madrin asë hi angetre Iudra kowe la hnei angatr hna isisinyikeu, ke hnei angatr hna sisinyi qa kuhu hni angatre ka pexej. Matre angatr a thele catrë Akötresieti jë, nge nyidrëti a aijijë angatre troa öhnyi nyidrë. Nge Iehova pala hi a hamë tingeting xötreithi angatr.

16 Nge hnei Asa joxu hna amekötin fe matre, tha tro hmaca kö Maaka qaaqaa i nyidrë a isola, pine eahlo kuci idrola ka sis thatraqane la hmi ne la ipoto ka hmitrötr. Ame hnei Asa hna thëtrije la idrola ka sis, me dreuthetrij hnine la hnathup e Kederon. 17 Ngo tha hna apatrene kö la itre hnë hmi gaa hmitrötr qa Isaraela, ame pe, ka pexeje* la hni i Asa ngön asë la mele* i nyidrë. 18 Hnei Asa hna traqa fë hnine la uma ne hmi ne la nyipi Akötresie, la itre ewekë hnei nyidrë me keme i nyidrë hna amë acon* thatraqane la hmi. Itre sileva, me gool, me itre xa ewekë ju kö. 19 Nge pë pi kö isi ngöne la nöj, uti hë la kola 35 lao macatre ne mus i Asa.