Hnaaluene Tus i Aqane Lapa Itre Joxu

34 Traqa koi 8 lao macatre i Iosea la kola acili joxu nyidrë. Hnei nyidrëti hna mus koi 31 lao macatre e Ierusalema. 2 Hnei Iosea hna kuca la loi qëmeke i Iehova. Hnei nyidrëti hna nyitipu* Dravita qaaqaa i nyidrë, nge tha jea kö nyidrë kowe la götrane maca maine götrane mi.

3 Ngöne la kola 8 lao macatre ne mus i nyidrë, ngacama nekönatre pala kö Iosea, hnei nyidrëti hna nyiqaane thele la Akötresi Dravita qaaqaa i nyidrë. Nge ngöne la kola 12 lao macatre ne mus i nyidrë, hnei Iosea hna nyiqaane ahmitrötrë Iudra me Ierusalema, me apatrene la itre hnë hmi gaa hmitrötr, me itre ipoto ka hmitrötr, me itre idrola sinöe hna tratraun, me itre idrola hna kuca hnei fao hna ahmun. 4 Ketre, hna thëtrij qëmeke i nyidrë la itre ita ne huuj ne la itre Baala, me itre ita ne dreu ka pui loi hune la itre ita ne huuj. Nyidrëti a thëtrije pi la itre ipoto ka hmitrötr, me itre idrola hna tratraun, nge nyidrëti a anyilanyilane pi, me kuiëne la xaxau hune la itre hua ne la itre ka tro fë huuj e cili. 5 Nge nyidrëti a dreuthe pi la itre jun ne la itre atre huuj hune la itre ita ne huuj. Celë hi aqane kuca i Iosea troa ahmitrötrë Iudra me Ierusalema.

6 Nge ngöne la itre traon ne Manase, me Eferaima, me Simeona, uti hë Nafatali, me ngöne la itre traon hna thëtrij ezin, 7 hnei nyidrëti hna apatrene la itre ita ne huuj, me tranetrane la itre ipoto ka hmitrötr, me itre idrola sinöe hna tratraun, nge nyidrëti a sa ahmodrohmudrone pi. Ame hnei nyidrëti hna thëtrij la nöjei ita ne dreu ka pui loi e Isaraela, me bëeke hmaca a tro Ierusalema.

8 Ngöne la kola 18 lao macatre ne mus i Iosea, thupene la nyidrëti a ase ahmitrötrëne la nöj, memine la Uma Ne Hmi, hnei nyidrëti hna upi Safana nekö i Azalia, me Maseia lo tane la traon, me Ioa nekö i Iehoaza atre feja tus,* troa nyidrawane hmaca la uma ne hmi Iehova Akötresi nyidrë. 9 Angatr a tro ju koi Hilekia atre huuj ka sisitria, me hamë nyidrë la mani hna kuiën hnine la uma ne hmi Akötresie, lo mani hnei angetre Levi ka thupë qëhnelö, hna kapa qaathene la angetre Manase, me Eferaima, me qaathei Isaraela asë, me Iudra, me Beniamina, me Ierusalema. 10 Thupene lai, hna hamëne hmaca la mani kowe itre tane huliwa ngöne la uma ne hmi Iehova. Nge hnene la itre ka huliwa hna xome la mani cili nyine nyihnyawan, me nyidrawane la uma ne hmi Iehova. 11 Nge hna hamëne hmaca la mani kowe la itre ka kuca la nöjei huliwa, me itre ka huliwa batima, matre tro angatr a itö etë hna thupathupa, me itre sinöe nyine sajuëne la carpat, me saze la itre agö ne la itre batima hna nu troa hnyiqetr hnene itre joxu ne Iudra.

12 Nge hnene la itre atre cili hna isa akötrehni huliwan, nge hna acil hui angatr la angetre Levi troa itre atre thup: Thene la angetre Merari, Iahath me Obadia; thei angetre Kohatha, Zakaria me Mesulama. Nge ame pena la itre xa atre Levi, lo itre ka atreine elo miuzik, 13 qa i angatr troa thupëne la itre ka huliwa,* angatre la itre ka thupëne la itre ka kuci nöjei pengöne huliwa. Nge ame la itre xa atre Levi, hna acili angatr troa sekreter, maine troa thupë qëhnelö.

14 Ngo ame la itre xan a tro troa xome la mani hna kuiën hnine la uma ne hmi Iehova, hnei Hilekia, atre huuj ka sisitria, hna öhne la Tusi Wathebo i Iehova, lo hna hamën jëne* Mose. 15 Ame hnei Hilekia hna qaja koi Safana lo sekreter ka hape: “Hnenge hna öhne la tusi Wathebo hnine la uma i Iehova.” Matre angeic a hamëne pi koi Safana. 16 Ame hnei Safana hna tro koi joxu me hape: “Itre hlue i nyipë a kuca asë la hna upi angatr. 17 Qa i angatr hna xome la mani qa hnine la uma i Iehova, me hamën kowe la itre tane huliwa me itre ka kuci huliwa.” 18 Nge öni Safana hmaca jë: “Hnei Hilekia atre huuj hna hamë ni la tusi celë.” Nge Safana a e jë qëmekei joxu.

19 Matre ame hë la joxu a dreng la hna qaja hnene la tusi Wathebo, nyidrëti a kuie zezene pi la itre iheetre i nyidrë. 20 Thupene lai, hnene la joxu hna amekötine koi Hilekia, me koi Ahikama nekö i Safana, me Akebora nekö i Mikaia, me koi Safana lo sekreter, me koi Asaia atre xatua joxu, ka hape: 21 “Hnyinge jë koi Iehova thatraqai ni, memine la munëne la nöje Isaraela me Iudra, göne la aliene la tus hne së hna öhn. Tru catre la elëhni Iehova ka troa traqa koi së, ke tha hnei itre qaaqaa së kö hna trongëne la hna qaja hnei Iehova. Tha trongëne kö angatr la hna cinyihan hnine la itusi celë.”

22 Ame hnei Hilekia me itre hna up hnei joxu, hna tro troa wai Huleda, ketre perofeta föe. Eahlo la föene la atre thupë iheetre i joxu, ene Saluma nekö i Tikeva, nekö i Hasera. Ka lapa eahlo ngöne la götran ka hnyipixe ne Ierusalema. E cili la angatr a ithanata koi eahlo. 23 Eahlo a sa jë koi angatr ka hape: “Hane hi la hna qaja hnei Iehova Akötresi Isaraela, ‘Hape jë kowe la trahmanyi ka upi epun koi ni ka hape: 24 “Hane hi la maca i Iehova, ‘Tro ni a axulune la akötr kowe la götrane celë, me kowe la itre atren, ene la nöjei ieji hna cinyianyin ngöne la tusi hna e qëmekene la joxu ne Iudra. 25 Tro ni a nenge la elëhning kowe la götrane celë, nge tha tro kö ej a pi, ke hnei angatr hna nuetriji ni, me huhajine la itre huuje i angatr kowe la itre xa haze, matre troa jele la trenge hning hnene la itre huliwa i angatr.’” 26 Ngo qaja ju fe kowe la joxu ne Iudra, ka upi epuni troa hnyinge koi Iehova ka hape, ‘Hane hi la hna qaja hnei Iehova Akötresi Isaraela göne la itre ewekë hnei eö hna dreng. 27 Hna ketr la hni ö hnene la itre trengewekë celë, nge hnei ö hna ipië qëmeke i Akötresie, lo eö a drenge la hnenge hna qaja göne la nöje celë me itre atren. Eje hi, hnei eö hna ipië qëmekeng, me kuie zezene la itre iheetre i ö, me treije qëmekeng, matre pine lai, ase hë ni drei ö, öni Iehova. 28 Celë hi matre tro ni a acasi ö me itre qaaqaa i ö,* nge tro eö a tro ngöne la tingeting. Tro ha ami ö hnine la hua i ö, nge tha tro kö la luemeke i ö a öhne la akötr, hnenge hna troa axulun kowe la götrane celë, me itre atren.’”’”

Ame hnene la itre trahmanyi hna bëeke fë la maca cili koi joxu. 29 Matre hnene la joxu hna hën asë la itre qatr ne Iudra me Ierusalema. 30 Nge nyidrëti a elë jë kowe la uma ne hmi Iehova memine la itre trahmanyi ne Iudra, me itre atrene Ierusalema, me itre atre huuj, me angetre Levi, me nöj asë, qane la ka co uti hë la ka tru. Nge nyidrëti a e asë jë koi angatr la tusi Wathebo, hna öhn hnine la uma ne hmi Iehova. 31 Thupene lai, hnene la joxu hna cil ngöne la göhnë i nyidrë, me isisinyikeu* qëmekei Iehova. Nyidrëti a sisiny troa drengethenge Iehova hnene la hni me mele i nyidrë ka pexej, me trongëne la itre hna amekötin, me itre hna amekunën, me itre wathebo i Akötresie, thenge la isisinyikeu hna cinyianyin hnine la tusi celë. 32 Nge hnei Iosea fe hna thuecatrene la angetre Ierusalema me Beniamina, troa sisiny me trongëne la isisinyikeu. Matre hnene la itre atrene Ierusalema hna metrötrëne la isisinyikeu i Akötresie, lo Akötresi ne la itre qaaqaa i angatr. 33 Ame hnei Iosea hna apatren asë la nöjei ewekë ka sis* qa ngöne la nöj,* itre ewekë i angetre Isaraela. Nge hnei nyidrëti hna thuecatrene la angetre Isaraela troa nyihlue i Iehova Akötresi angatr. Matre ngöne la ijine mele* i Iosea, tha jea pi kö angatr qaathei Iehova Akötresi ne la itre qaaqaa i angatr.