Hnaaluene Tus i Aqane Lapa Itre Joxu
25 Traqa koi 25 lao macatre i Amazia lo kola acili joxu nyidrë, nge hnei nyidrëti hna mus e Ierusalema koi 29 lao macatre. Iehoadana la ëjene la thine i nyidrë, nge atre Ierusalema eahlo. 2 Hnei Amazia hna kuca la loi qëmeke i Iehova, ngo tha hnene la hni ka pexej. 3 Nge ase jë hi nyidrëti acatrene la mus i nyidrë, hnei nyidrëti hna humuthe la itre hlue i joxu ka humuthe lo keme i nyidrë. 4 Ngo tha humuthe kö nyidrë la itre nekö i angatr, ke nyidrëti a trongëne lo hna amekötin ngöne la Trenge Wathebo i Mose, lo öni Iehova: “Tha tro kö a mec la itre kem, pine la ngazo ne la itre nekön. Nge tha tro kö a mec la itre nekön, pine la ngazo ne la itre kem. Ngo tro pe a meci la atr, pine la sipu ngazo i angeic.”
5 Ame hnei Amazia hna ce hën asë la itre trahmanyi ne Iudra, me thewe angatr thenge la itre lapa i angatr, me thenge la itre tane la ala 1 000, me itre tane la ala 100. Nyidrëti a kuca tune lai koi Iudra asë me Beniamina. Ame hnei nyidrëti hna e la etrune la itre nekö trahmany, qa ngöne la ka 20 lao macatre a tro draië. Matre ala 300 000 lao trahmany hnei nyidrë hna e, itre atr hna inin troa isi, itre ka atreine hna la jo, me cile fë petr ka tru. 6 Nge nyidrëti a kuiëne jë la 100 lao talane* sileva, nyine nyithupen la 100 000 lao sooc qa Isaraela. 7 Ngo hnene la ketre atre ne la nyipi Akötresie hna tro kowe la joxu, me hape: “Joxu fe, tha tro kö la trongene isi Isaraela a ce tro me nyipë, ke tha ce Iehova kö me Isaraela, ketre, tha ce nyidrëti kö memine la ala cas qa Eferaima. 8 The ce tro kö me angatr, ngo tro jë pe nyipë nge catre pi ngöne la isi, wanga tro la nyipi Akötresie a akeinyi nyipë qëmekene la ithupëjia. Ke ka atreine Akötresie xatuan maine akein.” 9 Ame hnei Amazia hna hnyinge kowe la atre ne la nyipi Akötresie ka hape: “Nge tune kaa pë hë lo 100 lao talan hnenge hna hamën kowe la itre sooc qa Isaraela?” Matre önine la atre ne la nyipi Akötresie: “Atreine kö Iehova nyixan atrun hmaca kö koi nyipë.” 10 Ame hnei Amazia hna upe hmaca la itre sooc ne Eferaima ka traqa koi nyidrë. Matre angatr a elëhni koi Iudra, me bëeke fë trengehni koi isa hnalapan.
11 Nge hnei Amazia hna xomi trengecatr, me wejemekene la itre sooce i nyidrë kowe la hnathup Sotr. E cili, nyidrëti a humuthe ju la 10 000 lao atre Seira. 12 Nge hnene la angetre Iudra hna xolouthe la 10 000 lao atr, me elë sai angatr hune la git me ukapië angatr, matre nyilanyila asë pi angatr. 13 Nge ame la itre sooc hnei Amazia hna alapan, lo itre ka tha isi, hnei angatr hna tro troa isi trootro me itre traon ne Iudra, qan e Samaria uti hë Bethe-horona. Hnei angatr hna humuthe la 3000 lao atre Iudra, me thapa la itre trengamo ka tru.
14 Ngo ame la Amazia a bëeke qa hna lepi angetre Edoma, nyidrëti a traqa fë pi la itre haze ne Seira, me acili angatr nyine haze i nyidrë. Matre nyidrëti a nyiqaane thili ju koi angatr, me huhajine la itre huuj. 15 Ame hnei Iehova hna elëhni koi Amazia, me upe la ketre perofeta koi Amazia troa qaja ka hape: “Hnauëne laka, eö pena a nyihluene la itre haze ne la nöje ce, itre haze ka thatreine amelene la itre nöje i angatr, itre nöj hnei eö hna lep?” 16 Kolo pala kö a ithanata hnene lai perofeta, nge önine la joxu ka hape: “Ke hna acili eö troa atresi ne la joxu? Loi ju hë! Wanga tro huni a humuthi ö!” Ame hnene la perofeta hna tro pi, me qaja hmaca ka hape: “Atre hi ni laka, aja i Akötresie troa apatrenyi nyipë, pine nyipë ujë tun, me tha drenge la eamong.”
17 Thupene lai, hnei Amazia joxu ne Iudra hna hnyinge kowe la itre atresi nyidrë, me iupi fë la maca celë koi Ioasa, nekö i Iehoaza, nekö i Iehu joxu ne Isaraela, ka hape: “Trohemi ma tro nyiso a pane isi.”* 18 Ame hnei Ioasa joxu ne Isaraela, hna iupi fë la maca celë koi Amazia joxu ne Iudra, me hape: “Hnene la feja ka ithiny ne Lebanona, hna iupi fë maca kowe la arasi ne Lebanona, me hape, ‘Hamëne pi la nekö i eö jajiny troa föene la neköng.’ Ngo hnene la öni wael ne Lebanona hna cili thenge, me waja fica la feja ka ithiny. 19 Öni eö: ‘Goeën! Ase hë ni* ngaa Edoma,’ matre pi tru hë la hni ö, nge ej a ajane la iatruny. Ngo lapa ju kö ngöne la nöje* i ö. Hnauëne laka eö a pi hnëjin me kei, me huli Iudra troa ce kei me eö?”
20 Ngo xele kö Amazia ma dreng, ke aja ne la nyipi Akötresieti lai. Eje hi, hnei nyidrë hna mekune troa nue Amazia me nöj i angeic kowe la itre ithupëjia, pine angatr nyihluene la itre haze ne Edoma. 21 Matre hnei Ioasa joxu ne Isaraela, hna isi me Amazia joxu ne Iudra, e Bethe-semes e Iudra. 22 Hna ngaa Iudra hnei Isaraela, nge hnene la itre sooc ne Iudra hna isa kötre bëek kowe la isa hnalapa* i angatr. 23 Nge e Bethe-semes, hnei Ioasa joxu ne Isaraela hna othi Amazia joxu ne Iudra, nekö i Ioasa, nekö i Ahazia. Thupene lai, hnei Ioasa hna tro e Ierusalema, me thë la ketre götrane la ihag. Traqa koi 400 kubit* la hna jë qa ngöne la qëhnelö ne Eferaima, uti hë la qëhnelö ne la Kona. 24 Matre nyidrëti a eöth asë jë la gool, me sileva, me nöjei ewekë hnine la uma ne hmi ne la nyipi Akötresie thei Obed-edoma,* me itre trengamo hnine la hnalapa i joxu, me itre xa atr, nge nyidrëti a bëeke hmaca jë a tro Samaria.
25 Nge ame Amazia joxu ne Iudra, lo nekö i Ioasa, hnei nyidrëti hmaca kö hna mel koi 15 lao macatre thupene la meci Ioasa joxu ne Isaraela, lo nekö i Iehoaza. 26 Nge ame la mele i Amazia, hna fejan asë hnine la itre Itus ne la mele ne la itre joxu ne Iudra, me Isaraela. 27 Qane lo Amazia a xele ma wai Iehova, hnei itre xa atre hna nyiqaane thele troa humuthi nyidrë e Ierusalema. Matre hnei Amazia hna kötr a tro Lakisa, ngo hna upe la itre trahmany troa huzu nyidrë, nge angatr a humuthi nyidrëti jë e Lakisa. 28 Thupene lai, hna bëeke fë la ngönetrei i nyidrë a tro Ierusalema, hna atë hune la ketre ikatr hna hul hnei hos. Ame hna kelemi nyidrë me itre qaaqaa i nyidrë ngöne la traon ne Iudra.