Hnaaluene Tus i Aqane Lapa Itre Joxu

18 Ka trenamo catre Iehosafata, nge tru la lolo i nyidrë, ngo hnei nyidrëti pe hna faipoipo memine la ketre atrene la hnalapa i Ahaba. 2 Itre macatre thupen, nyidrë a tro ju koi Ahaba e Samaria. Matre Ahaba a humuthe ju koi Iehosafata me itre sinatronge i nyidrë, la nyimu mamoe me kau. Thupene lai, hnei Ahaba hna sipone ielene* koi Iehosafata troa ce tro me nyidrë, matre lepi Ramothe-gileada. 3 Öni Ahaba joxu ne Isaraela, koi Iehosafata joxu ne Iudra ka hape: “Tro kö eö a ce tro me eni troa isi me angetre Suria e Ramothe-gileada?” Sa jë hi Iehosafata ka hape: “Tha isa pengöi nyiso kö, ketre tune fe la itre sooceng me itre sooce i ö, ce eahuni me eö ngöne la isi.”

4 Ngo öni Iehosafata kowe la joxu ne Isaraela: “Pane hnyingë Iehova jë.” 5 Ame hnene la joxu ne Isaraela hna acasine la itre perofeta, ala 400 lao trahmany, nge öni nyidrë: “Tro kö ni a isi me thepe Ramothe-gileada maine waea?” Matre sa jë hi angatre ka hape: “Tro jë joxu, ke tro la nyipi Akötresie a nue la traone celë koi nyipë.”

6 Ngo öni Iehosafata ka hape: “Hetre itre xa perofeta i Iehova kö ngöne la nöj? Nge maine hetreny, loi e tro fe sa hnyinge koi Akötresie jën angatr.” 7 Matre önine la joxu ne Isaraela: “Ca atre pala kö ka atreine hnyinge koi Iehova. Ngo cane mething angeic, ke pëkö maca ka loi hnei angeic hna perofetane göi ni, ngo ka ngazo pala hi. Mikaia la ëje i angeic, nekö i Imela.” Ngo öni Iehosafata jë hi: “Joxu, hmitrötre troa qaja tun.”

8 Ame hnene la joxu ne Isaraela hna hëne la ketre ka huliwa koi nyidrë, me hape: “Canga tro jë troa thei Mikaia nekö i Imela.” 9 Nge kola isa lapa hune la itre therone i nyidro hnene la joxu ne Isaraela, me Iehosafata joxu ne Iudra, nge nyidroti a isa heetrë iheetre i joxu. Nyidro a lapa hmekune la hnë lepe qitr, ezine la qëhnelö ne Samaria. Nge itre perofeta asë, a perofetan qëmeke i nyidro. 10 Ame hnei Zedekia nekö i Kenaana hna kuci jiane fao, me hape: “Hane hi la hna qaja hnei Iehova, ‘Jëne la jiane celë, tro eö a thin axulune* la angetre Suria, me lep apatrenyi angatr.’” 11 Nge casi hi la hna qaja hnene la itre perofeta. Öni angatr: “Tro jë e Ramothe-gileada, tro nyipëti a hun, ke tro Iehova a nue la traone koi nyipë joxu.”

12 Nge hnene lo atre hna upe troa thei Mikaia hna qaja koi angeic ka hape: “Dreng, itre xa perofeta a qeje maca ka loi kowe la joxu, nge hane jë fe eö tui angatr.” 13 Ngo sa jë hi Mikaia ka hape: “Qëmeke i Iehova Akötresie ka mel, tro hi ni a tro fë la maca hna upi ni hnene la Akötresing.” 14 Thupene lai, angeic a lö ju koi joxu, nge önine la joxu: “Mikaia, tro kö huni a isi me thepe Ramothe-gileada, maine waea?” Nge canga öni angeice jë hi: “Tro jë, ke tro kö nyipëti a hun. Tro ha nue angatre koi epun.” 15 Ngo önine hmaca jë la joxu ka hape: “Tro ni a aija upi eö troa sisiny ngöne la ëje i Iehova troa qaja la nyipici?” 16 Matre öni Mikaia jë hi: “Eni a goeëne la angetre Isaraela, angatr a isa lapa ngöne la itre wetr, nge ceitu i angatr me itre mamoe ka pë atre thupën. Matre öni Iehova, ‘Pë hë maseta i angatr, nge loi e tro angatr a bëek koi isa hnalapan cememine la tingeting.’

17 Ame hnene la joxu ne Isaraela hna qaja koi Iehosafata ka hape: “Öhne hi ö, eni hi lo a qaja hnyawa koi ö ka hape, pëkö maca ka loi hnei angeic hna perofetane göi ni, ngo ka ngazo pala hi.”

18 Thupene lai öni Mikaia: “Pane drenge ju la hnei Iehova hna qaja koi nyipë: Hnenge hna öhnyi Iehova hune la therone i nyidrë. Nge itre trongene isi e hnengödrai, a cil ngöne la götrane maca me mi i nyidrë. 19 Öni Iehova jë hi, ‘Drei la ka troa amenu Ahaba joxu ne Isaraela, matre tro angeic a tro Ramothe-gileada me mec?’ Ame hna sa hnene la ketre angela, nge ketre angela a qeje ketre mekun. 20 Ame hnene la ketre angela* hna easenyi koi Iehova, me hape: ‘Tro ni a amenu angeic.’ Nge öni Iehova jë hi: ‘Tro eö a kuca tune kaa?’ 21 Nge sa jë hi lai angela ka hape: ‘Tro ni a tro koilo, me kuca matre thoi* jë la itre perofeta i angeic.’ Nge öni Akötresieti jë hi: ‘Ka loi, tro hë eö lai a amenu angeic. Tro jë hë, nge kuca jë la hnei ö hna qaja.’ 22 Celë hi aqane kuca i Iehova, matre thoi* jë la itre perofeta i nyipë. Ngo eje hi laka, ase hë nyidrëti mekun troa lepi nyipë hnei akötr.”

23 Ame hnei Zedekia nekö i Kenaana, hna tro koi Mikaia me xe angeic, me hape: “Matre eö lai a hape, hna tro qaatheng la ua i Iehova troa ithanata me eö? Nga hna kaa thenge?” 24 Sa jë hi Mikaia ka hape: “Tro eö lai a öhn, e tro eö a zae hnine la hnahag ka mi ne la uma.” 25 Matre önine la joxu ne Isaraela: “Tro sai Mikaia jë koi Amona tane la traon, me Ioasa nekö i joxu. 26 Hape jë koi nyidro, ‘Hane hi la hna amekötin hnei joxu, “Umë angeice jë hnine kalabus, nge tro hi a thue wamine falawa me timi koi angeic, uti hë la bëeke hmaca ni memine la tingeting.”’” 27 Ngo öni Mikaia jë hi: “E traqa jë nyipë bëek cememine la tingeting, hatrene hi lai laka, tha hnei Iehova kö hna ithanata me eni.” Nge öni angeice hmaca: “Mekune pala kö epun* lo hnenge hna qaja.”

28 Nge hnene la joxu ne Isaraela, me Iehosafata joxu ne Iudra, hna tro Ramothe-gileada. 29 Nge önine la joxu ne Isaraela koi Iehosafata: “Tro ni a nyiha* troa isi. Ngo ame eö, tro eö a heetrëne la iheetr ne joxu.” Matre hnene la joxu ne Isaraela hna nyiha,* me tro troa isi. 30 Nge hnene la joxu ne Suria hna amekötin kowe la itre tane ikatr ka hape: “The tro kö nyipunie a isi me itre sooc, me itre ka huliwa koi joxu. Tro hi nyipunie a isi memine la joxu ne Isaraela.” 31 Matre ame hë la itre tane ikatr a öhnyi Iehosafata, öni angatre pala kö ka hape, joxu ne Isaraela. Matre angatr a tro ju koi nyidrë troa lepi nyidrë. Ame hnei Iehosafata hna hë me sipo ixatua, nge Iehova a amele nyidrëti jë, me ananyi angatr qaathei Iehosafata. 32 Nge ame la itre tane ikatr a trotrohnine laka, tha joxu ne Isaraela kö, tha weje huzu Iehosafata ju hi angatr.

33 Ngo hnene la ketre sooc hna huje menune la pehna i angeic, nge eatre ju hi la joxu ne Isaraela. Hna lö meköt akawane la lue götranene la iheetr ne isi. Matre önine la joxu kowe la ka xomiujine la ikatr: “Bëeke hmaca jë, ke eatre hë ni la, loi e tro na tro qa ngöne la hna isi.”* 34 Nge ngöne la drai cili, hna catrehnine catre la isi, nge hnene la itre xa sooc hna cila xome la joxu, matre tro nyidrëti a cile meköt qëmekene la angetre Suria uti hë e hej. Nge ame hë la kola lö la jö, tria pi hi la joxu.