Iosua

22 Ame hnei Iosua hna hëne la angetre Reubena, me angetre Gada, memine la ketre sine la tribu i Manase, 2 me hape: “Hnei epuni hna kuca asë lo hnei Mose hlue i Iehova hna ahnith koi epun, nge hnei epuni hna drengethenge la aqane ewekëng, ngöne la epuni a kuca asë la hnenge hna amekötin. 3 Tha hnei epuni kö hna nuetrij la itre trejin me epun uti hë la drai celë, nge hnei epuni hna drengethenge la itre hna amekötin hnei Iehova Akötresi epun. 4 Ame enehila, ase hë Iehova hamëne la tingeting kowe la itre trejin me epun, tune lo hnei nyidrëti hna sisinyi koi angatr. Haawe, ijiji epuni hë troa bëeke hmaca kowe la nöj hnei Mose hlue i Iehova hna hamë epun, ngöne la ketre götran ne la hneopegejë Ioridrano. 5 Ame pe, thupëne kö epun troa trongën la hna amekötin memine la Wathebo hna hamën hnei Mose hlue i Iehova, ene la troa hnimi Iehova Akötresi epun, me trongën asë la itre hnei nyidrëti hna qaja, me drengethenge la itre wathebo i nyidrë, me qale koi nyidrë, me nyihlue i nyidrë hnene la hni i epuni ka pexej, me mele i epuni ka pexej.”

6 Thupene lai, hnei Iosua hna amanathithi angatr, me upi angatr troa tro. Ame hnei angatr hna bëeke kowe la isa hnalapa i angatr. 7 Ame pena kowe la ketre sine la tribu i Manase, hnei Mose lo hna hamë angatr la ketre götran ngöne la nöj e Basana. Nge ame pë hë kowe la ketre sine la tribu i Manase, hnei Iosua hna hamë hnepadro i angatr ngöne la götran e kuë ne la hneopegejë Ioridrano, thene la itre trejin me angatr. Ketre, ame lo Iosua a upi angatr troa bëeke hmaca kowe la zi i angatr, hnei angeic hna pane amanathithi angatr, 8 me hape: “Bëeke hmaca jë kowe la itre hnalapa i epun cememine la itre trengamo, me hnëng öni, me sileva me gool, me kopa, me fao, me itre iheetr ka nyimutre. Xome jë la itre ewekë hnei epuni hna thapa qaathene la itre ithupëjia, nge ce thawa pi memine la itre trejin me epun.”

9 Thupene lai, hnene la angetre Reubena, me angetre Gada, memine la ketre sine la tribu i Manase, hna isaije memine la itre xaa atre Isaraela. Hnei angatr hna mejë qa Silo, ngöne la nöje Kanana, me bëeke hmaca kowe la nöje Gileada, lo zi i angatr hnei angatr hna lapan, tune lo hnei Iehova hna amekötin jëne Mose. 10 Ame ju hi la angatr a traqa ngöne la itre nöj e Kanana, hmekun la hneopegejë Ioridrano, hnene la angetre Reubena, me angetre Gada, memine la ketre sine la tribu i Manase, hna xupe la ketre ita ne huuj ezin la hneopegejë Ioridrano, ketre ita ne huuj ka tru catr. 11 E thupen, hnene la itre xaa atre Isaraela hna drei mejen ka hape: “Hnene la angetre Reubena, me angetre Gada, memine la ketre sine la tribu i Manase, hna xupe la ketre ita ne huuj ngöne la ifego ne Kanana, ezine la hneopegejë Ioridrano, hmekun la götrane i eahun!” 12 Matre ame ju hi la kola drenge lai hnene la nöje Isaraela asë, hnei angatr hna tro Silo troa isi memine la itre tribu cili.

13 Ame hnene la angetre Isaraela, hna upi Fineasa nekö i Eleazara atre huuj, kowe la angetre Reubena, me angetre Gada, me kowe la ketre sine la tribu i Manase, ngöne la nöje Gileada. 14 Nge ce nyidrë memine la 10 lao tan, ca tan qa ngöne la itre lapa ne la itre tribu ne Isaraela; angatre hi la itre tixe ne lapa thene la itre milio* e Isaraela. 15 Ame ju hi la angatr a traqa thene la angetre Reubena, me angetre Gada, memine la ketre sine la tribu i Manase, ngöne la nöje Gileada, öni angatre jë hi:

16 “Hane hi la maca qaathene la nöje i Iehova asë: ‘Hnauëne la epuni a tha mele nyipici kowe la Akötresi Isaraela? Hnei epuni hna nuetriji Iehova ngöne la epuni a acile la ita ne huuj, me icilekeu me Iehova. 17 Hapeu, pëkö koi epun la ngazo hne së hna kuca e Peora? Uti hë enehila, tha ase pala kö ahmitrötrë së qa ngöne la ngazo cili, ngacama hna pane lepe la nöje i Iehova. 18 Nge ame epuni ke, epuni fe a hane pi trotriji Iehova? Maine tro epuni a icilekeu me Iehova enehila, tro hë nyidrëti elanyi a elëhni kowe la nöje Isaraela asë. 19 Ngo maine epuni a kuca tun, ke ka pui ngazo la nöj hna hamë epun, nga traqa pi hö kowe la nöje i Iehova, lo hna acile la uma maano i Iehova, nge ce lapa ju me eahun. Ngo the icilekeu pi kö me Iehova, nge the alö huni kö ngöne la icilekeu i epun, ngöne la epuni a xupe la ketre ita ne huuj, ngo tha ita ne huuje i Iehova Akötresi së pe. 20 Ke ame lo Akana nekö i Zera, a kuca la ngazo la nyidrëti a atrekënö la itre ewekë nyine apatren,* ke hapeu, tha hnei Akötresieti kö lo hna elëhni kowe la nöj asë? Tha Akana casi kö lo ka xeni pune la ngazo i angeic.’”

21 Matre hnene la angetre Reubena, me angetre Gada, memine la ketre sine la tribu i Manase, hna sa kowe la itre tane la ala 1 000 ne Isaraela ka hape: 22 “Iehova* la Akötresie ne la itre akötresie! Iehova la Akötresie ne la itre akötresie! Atre kö nyidrë, nge tro fe Isaraela a hane atre. Maine hne huni hna icilekeu me tha mele nyipici koi Iehova, epi tha tro kö nyidrëti a nuamele hun ngöne la drai ce. 23 Nge maine hne huni hna xupi ita ne huuj matre icilekeu me Iehova, me huujën la itre huuj ne dreuth asë, me itre huuj ne wene feja,* me itre huuj ne tingeting,* nga tro hë Iehova a nyithupen koi hun. 24 Ngo hetre nyipi kepin matre hne huni hna kuca lai, ke öni hun: ‘Elany, tro hë la itre nekö i epun a qaja kowe la itre nekö hun ka hape: “Öni drei ka hape, tro epuni a ce nyihlue i Iehova Akötresi Isaraela me eahun?* 25 Hnei Iehova hna amë la Ioridrano nyine ifego nyipi së, matre aisa hun me epun, angetre Reubena me Gada. Tha ijiji epuni kö troa hane hmi koi Iehova.” Nge e cili, tro hë la itre nekö i epun a sawa la itre nekö hun troa nyihlue* i Iehova.’

26 “Celë hi matre, öni eahun ka hape: ‘Loi e tro sa canga kuca la ketre ewekë. Tro sa xupe la ketre ita ne huuj, tha göi tro kö a tro fë huuj ne dreuth asë, me itre xaa huuj, 27 ngo göne hi troa anyipicine koi eahun me epun, me kowe la itre matra huni e thupen laka, eahuni fe a hane nyihlue i Iehova, jëne la itre huuj ne dreuth asë, me itre xaa huuj, me itre huuj ne tingeting hne huni hna tro fë. Hne huni hna kuca lai, matre tha tro kö la itre nekö i epun elanyi a qaja kowe la itre nekö hun ka hape: “Tha ijiji epuni kö troa hmi koi Iehova.”’ 28 Matre öni eahuni jë hi: ‘Maine tro angatr a qaja lai koi hun me kowe la itre matra hun elany, tro hë huni a sa ka hape: “Goeëne la ita ne huuj hnene lo itre qaaqaa hun hna xupe ceitu memine la ita ne huuje i Iehova, tha göi tro kö a huujën la itre huuj ne dreuth asë, maine itre xaa huuj, ngo göne tro pe a anyipicin koi epun me koi hun.”’ 29 Thatreine kö huni mekun troa icilekeu me Iehova, me nuetriji Iehova, ngöne la eahuni a xup la ketre ita ne huuj ka troa nyihnane la ita ne huuje i Iehova Akötresi së qëmeken la uma maano i nyidrë, matre tro fë la itre huuj ne dreuth asë, me itre huuj ne wene feja, me itre xaa huuj!”

30 Matre ame hë la Fineasa atre huuj, me itre tane la nöj, me itre tixe ne la ala 1 000 e Isaraela, a dreng la hna qaja hnene la itre matra i Reubena, me Gada, me Manase, ke madrine jë hi angatr. 31 Ame hnei Fineasa nekö i Eleazara atre huuj, hna qaja kowe la itre matra i Reubena, me Gada, me Manase ka hape: “Atre hë huni enehila laka, ce Iehova me easë, ke tha hnei epuni kö hna mele thoi koi Iehova. Nge hnei epuni hna sewe Iehova troa axulune la hnëjin koi Isaraela.”

32 Thupene lai, hnei Fineasa nekö i Eleazara atre huuj, me itre tan, hna trotrij la angetre Reubena, me angetre Gada ngöne la nöje Gileada, me bëeke hmaca kowe la nöje Kanana. Nge hnei angatr hna thuemacanyine la angetre Isaraela la ewekë ka traqa. 33 Nge hnene la angetre Isaraela hna kapa madrin la hnei angatr hna qaja, me atrunyi Akötresie, matre tha tro ju kö angatr troa isi me angetre Reubena, me Gada, me apatrene la nöj hnei angatr hna lapan.

34 Celë hi kepin matre, hnene la angetre Reubena me Gada, hna ati ëjen lai ita ne huuj,* ke öni angatr, “ej a anyipicin nyipi së laka, Iehova la nyipi Akötresie.”