Numera
13 Ame hnei Iehova hna qaja koi Mose ka hape: 2 “Upe jë la itre trahmanyi troa waipengöne* la nöje Kanana, lo hnenge hna hamën kowe la angetre Isaraela. Tro eö a upe la ca trahmany qa ngöne la isa tribu ne la itre qaaqaa i angatr, lo itre tixe ne lapa.”
3 Matre hnei Mose hna upi angatr qa ngöne la hnapapa ne Parana, thenge la hna amekötin hnei Iehova. Ame asë hi la itre trahmanyi cili, ke itre tixe ne lapa i angetre Isaraela. 4 Hane hi la itre ëje i angatr: Samua nekö i Zakuri, qa ngöne la tribu ne Reubena; 5 Safata nekö i Hori, qa ngöne la tribu ne Simeona; 6 Kaleba nekö i Iefune, qa ngöne la tribu ne Iudra; 7 Igala nekö i Iosefa, qa ngöne la tribu ne Isakara; 8 Osea nekö i Nuna, qa ngöne la tribu ne Eferaima; 9 Paleti nekö i Rafu, qa ngöne la tribu ne Beniamina; 10 Gadiela nekö i Sodi, qa ngöne la tribu ne Zebulona; 11 Gadi nekö i Susi, qa ngöne la tribu ne Iosefa kowe la tribu ne Manase; 12 Amiela nekö i Gemali, qa ngöne la tribu ne Dana; 13 Setura nekö i Mikaela, qa ngöne la tribu ne Azera; 14 Nahebi nekö i Vofese, qa ngöne la tribu ne Nafatali; 15 nge Geuela nekö i Maki, qa ngöne la tribu ne Gada. 16 Celë hi la ëje ne la itre trahmanyi hnei Mose hna up troa waipengöne la nöj. Nge hnei Mose hna ati ëje i Osea nekö i Nuna, Iosua.*
17 Ame la Mose a upi angatr troa waipengön e Kanana, öni angeice koi angatr ka hape: “Elë jë kowe la Negeb, nge tro jë kowe la itre wetr, 18 matre wang ka hape, tune kaa la nöj, e ka catr la itre atren maine tha ka catre kö angatr, e ka ala nyimu angatr maine xalaithe hi, 19 e ka loi la nöj maine ka ngazo, nge e hna eköhagen la itre traone i angatr maine waea. 20 Nge tro fe epuni a wang ka hape, ka loi* kö la dro maine ka ngazo,* nge maine hetre sinöe kö maine pëkö. Loi e tro epuni a catr, nge traqa fë pi la itre xaa wene sinöe qa ngöne la nöj.” Ke kolo ijine la itre pane wene rezë ka hmedr.
21 Ame hnei angatr hna elë me waipengöne la nöj qa ngöne la hnapapa ne Zin, uti hë Rehoba ezin e Lebohamath.* 22 Angatr a elë jë kowe la Negeb me traqa e Heberona, nge e cili hi la zi i Ahiman, me Sesai, me Talemai, lo itre Anaka. (Hna pane xupi Heberona 7 lao macatre qëmekene troa xupi Zoana e Aigupito.) 23 Ame hë la angatr a traqa ngöne la Hnathup ne Esekolo, hnei angatr hna sa la ketre wapicine vin hna thipi ngön hnene la ca fini rezë, nge hna ce ajön hnei ala lu jëne la hnepe sinöe. Hnei angatre fe hna huj la itre grenad me itre wene wacua.* 24 Ame hna hëne la götrane cili Hnathup ne Esekolo,* pine la fini rezë hna thupa hnene la angetre Isaraela.
25 Thupene la 40 lao drai, hnei angatr hna bëek qa hna waipengöne la nöj. 26 Matre hnei angatr hna bëeke hmaca koi Mose, me Arona, memine la angetre Isaraela asë ngöne la hnapapa ne Parana e Kadesi. Ame hnei angatr hna qejepengöne la nöj kowe la nöjei atr e cili, me amamane la itre wene sinöe. 27 Hane hi la hnei angatr hna qaja koi Mose: “Hne huni hna lö ngöne la nöj hnei ö hna upi huni kow, kola neni gala la melek me miel e cili, nge hane hi la itre wene sinöe. 28 Ngo ka catr la itre atrene la nöj, nge ka tru catr la itre traon hna eköhagen. Goi öhne fe hun la itre Anaka. 29 Kola lapane la Negeb hnene la angetre Amaleka; kola lapane la itre wetr hnene la angetre Heth, me angetre Iebusi, me angetre Amora; nge angetre Kanana a lapa ezine la hnagejë, me lapa xötreithe la Ioridrano.
30 Matre hnei Kaleba hna thele troa atingetingëne la nöj ka cil qëmekei Mose me hape: “Canga elë jë së, matre tro sa thapa la nöj. Tha tro kö sa luelu!” 31 Ngo önine jë hi la itre trahmanyi ka ce elë me angeic ka hape: “Tha ijiji së kö troa cil kowe la nöje ce, ke ka catre kö angatr hui easë.” 32 Nge angatre pala hi a qaja angazone la nöj hnei angatr hna öhn; öni angatr kowe la angetre Isaraela: “Ame la nöj hne huni hna trongëne me waipengön, ke ej a heje thaitrën la itre atren; nge ame la itre trahmanyi hne huni hna öhn, ke itre ka tru matran. 33 Hne huni hna öhn la itre Nefilim, ene la itre nekö i Anaka, lo itre matra ne la itre Nefilim; kösë itre sipa hun ezi angatr, nge celë hi aqane goeë hun hnei angatr.”