Ezekiela

16 Hnei Iehova hmaca hna ewekë koi ni, me hape: 2 “Nekö i atr, qaja amamane jë koi Ierusalema la itre huliwa ka sis i angeic. 3 Hape jë: ‘Hane hi la hna qaja koi Ierusalema hnei Iehova Joxu Ka Sisitria: “Ame la nöje ne la itre qaaqaa i ö memine lo nöj hna hnaho eö ngön, ke nöje i angetre Kanana. Atre Amora la keme i ö, nge föe ne Heth la thine i ö. 4 Ame lo drai ne hnaho eö, ke tha hna xöje kö la enge i ö, me sië eö hnei tim, me köle la ngönetrei i ö hnei sotr, me atuthi ö hnei maano. 5 Pine laka pëkö ka utipi ö, matre tha hna hane kö kuca la ketre ewekë cili koi ö. Pëkö ala cas ka hane meku eö, ngo hna triji ö pe ngöne la itre hlapa, ke hna methinë eö ngöne lo drai ne kola hnaho eö.

6 “‘“Ame lo eni a tro ezi ö, hnenge hna öhnyi ö e ujëujë ngöne la madra i ö. Nge ngacama eö ju hë a meköl ngöne la madra i ö, ngo öninge lo: ‘The meci kö!’ Eje hi, hnenge hna qaja koi ö lo eö a meköle ngöne la madra i ö ka hape: ‘The meci kö!’ 7 Hnenge hna kuca matre ala nyimu jë eö, tune la hnitr ka eng ngöne la hlapa. Tru jë hi ö nge saze pi hi ö, matre hnei ö hna afenan la itre nyine thaip ka mingöminge catre kö. Ame hna tru la lue thi i ö, me qeadridri la penehe i ö, ngazo pe, ka pë iuti pala kö eö, eö pala kö a cile xöe.”’

8 “‘Ame lo eni a tro ezi ö, öhne ju hi ni laka, ijiji ö hë troa hetre trahmany. Matre hnenge hna heetrë eö hnene la iheetreng* nyine juetrën la ngönetrei i ö ka lapa xöe. Ame hnenge hna sisiny, me isisinyikeu me eö, matre tro pë hë eö a föeng,’ öni Iehova Joxu Ka Sisitria. 9 Nge hnenge fe hna sië eö hnei tim, me wasinetrije la madra i ö, me köle oelën la ngönetrei i ö. 10 Thupene lai, hnenge hna heetrë eö hnei iheetr ka mingöming. Thupene lai, hnenge hna heetrë eö hnene la iheetr hna sili drelan, me thue ibutre i ö hna kuca hnei kupeine öni* ka lolo, me atuthi ö hnei nyipi lino. Hnenge hna heetrë eö hnei iheetre ka tru thupen. 11 Hnenge hna thaipi ö matre mingöminge jë eö. Hnenge hna thaipi ö hnei otrene wanakoim, me afena eö hnei fini cein. 12 Hnenge mina fe hna ami otru ngöne la hnafiji ö, me itre ane hnangenyë, me ikorona ka mingöming hune la he i ö. 13 Mingöminge catre hë eö hnene la gool me sileva. Hna kuca la itre iheetre i ö hnei nyipi lino, me itre imaano ka tru thupen, nge hna sil amingömingön hnei drela. Nge tha itre xeni menu kö la hnei ö hna xen, kolo pe lo nyipi farin, me miel, me oel. Tha aqane mingöminge kö eö, ijiji ö hë troa hane isola.*’”

14 “‘Hlemu hë eö* nyipine la itre nöj pine la emingömingö i ö, ke hnenge lo hna atë hui ö la elolong ka pexej,’ öni Iehova Joxu Ka Sisitria.”

15 “‘Ngazo pe, hnei ö hna mejiun kowe la emingömingö i ö, ke hlemu hë eö matre hnei ö pë hë hna nyi föe ne gojeny. Hnei ö hna nyi föe ne gojeny memine la nöjei atr ka cili thenge, matre ewekë i angatre pë hë la emingömingö i ö. 16 Hnei ö hna xome la itre xaa iheetre i ö, nyine kuca la itre hnë hmi gaa hmitrötr ka nyimu han, matre nyi föe ne gojenyi e cili. Maine ju, tha tro kö a traqa la itre ewekë cili, eje hi, tha tro kö lo a traqa tun. 17 Nge hnei ö fe hna xome la itre nyine thaip hna kuca hnei gool me sileva hnenge hna hamë eö, matre kuca la itre idrola trahmany, me kuci ngazo memin. 18 Hnei ö mina fe hna xome la itre iheetre i ö hna sili drelan, matre heetrë angatr.* Nge hnei ö hna tro fë koi angatr la oeleng me sinöe ka pui loi. 19 Hnei ö fe hna tro fë la falawa nyine huuj ka pui loi* koi angatr, lo falawa hna kuca hnei nyipi farin, me oel, me miel, lo hnenge hna hamën nyine a i ö. Celë hi ewekë ka traqa,’ öni Iehova Joxu Ka Sisitria.”

20 “‘Hnei ö hna xome la itre nekö i ö trahmanyi me jajiny, lo hnei ö hna hamë ni, nyine huujëne kowe la itre idrola matre troa öni angatr. Hapeu, tha ijije kö lo hnei ö hna nyi föe ne gojeny, nge eö hmaca fe hë a huujën la itre nekö i ö kowe la itre idrola? 21 Hnei ö hna humuthe la ha neköng trahmany, me dreuthi* angatr nyine tro fë huuj. 22 Ame lo eö a kuca la nöjei huliwa ka sis i ö, me nyi föe ne gojeny, ke tha hnei ö kö hna mekun lo ijin eö a jajiny, lo eö a pë iut me cile xöe, me ujëujë ngöne la madra i ö. 23 Ekölö, ekölöhini ö, ka luzi pë eö pine la nöjei huliwa i ö ka ngazo!,’ öni Iehova Joxu Ka Sisitria. 24 ‘Ngöne la nöjei götran, hnei ö hna xupe la itre gaa draië, matre acili hnë hmi gaa hmitrötr. 25 Hnei ö hna acili hnë hmi gaa hmitrötr ngöne la itre götran gaa mama ne la hnënge gojeny. Hnei ö hna adrone la emingömingö i ö qa ngöne la hnei ö a ce meköl* memine la nöjei atr ka cili thenge, nge hnei ö hna anyimua nyi föe ne gojeny. 26 Hnei ö hna nyi föe ne gojenyi memine la itre nekön ne Aigupito, lo itre ka lapa easenyi ö nge ka meci hnei aja.* Nge hnei ö hna jele la trengehning pine eö anyimua nyi föe ne gojeny. 27 Haawe, tro hë ni a xejë la imeng matre lepi ö, nge tro fe ni a acon la a i ö, me nuaxöji ö kowe la itre föe ka methinë eö, me itre jajinyi ne Filisiti, ka sesëkötre ngazo me elëhni pine la itre aqane ujë i ö ka sis.

28 “‘Nge pine laka, tha meji pala kö eö, hnei ö fe hna hane nyi föe ne gojenyi memine la angetre Asuria. Ngazo pe, thupene la hnei ö hna nyi föe ne gojenyi me angatr, ke tha ngaa pala kö eö. 29 Matre hnei ö hmaca hna nyixane la itre huliwa ka sis i ö, me nyi föe ne gojeny ngöne la nöj ne la itre ka salem* me kowe la angetre Kaledaia. Ngo ame pe, tha ngaa pala kö eö. 30 Tha aqane menu pi hë la hni i ö* lo eö a kuca la itre huliwa cili, me catre fë troa nyi föe ne gojeny!,’ öni Iehova Joxu Ka Sisitria. 31 Ngo ame lo eö a xupe la itre gaa draië ngöne la götran ka mama ne la hnënge gojeny, me acili hnë hmi gaa hmitrötr ngöne la nöjei götran, tha hnei ö kö hna ujë tune la föe ne gojeny, ke xele kö eö troa nyithupei ö. 32 Eö hi la ketre föe ka nyixetë, ke aja i ö kö la itre trenyiwa hune la sipu föi ö! 33 Hna majemine hamë mani kowe nöjei föe ne gojenyi asë, ngo ame kö eö, eö la ka hamë mani kowe la itre ka meciu eö, me nyithupei angatr matre tro angatr a traqa itronyi thei ö, göi tro eö a nyi föe ne gojenyi me angatr. 34 Isapengöne kö la aqane ujë i ö memine la itre xaa föe ne gojeny. Pëkö ka hane nyi föe ne gojenyi tui ö! Eö la ka nyithupen, ngo tha kolo kö a nyithupei ö. Isazikeu kö la aqane huliwa i ö me itre xan.”

35 “Qa ngöne lai, drenge ju föe ne gojeny la hna qaja hnei Iehova. 36 Hane hi la hna qaja hnei Iehova Joxu Ka Sisitria: ‘Hnei ö hna nu asë troa eatrën la itre aja i ö ka sis. Nge hnei ö hna amamane la ngönetrei i ö ka xöe, lo eö a nyi föe ne gojenyi me itre hanyi ö, me nöjei idrola i ö hna methinën nge ka sis.* Goi huujëne fe eö la madra ne la itre nekö i ö kowe la itre idrola cili. 37 Celë hi matre, eni a acasine la itre hanyi ö, lo hnei ö hna aupune la trenge aja, lo itre hnei ö hna hnim me methinën. Tro ni a traqa sai angatr qa ngöne la nöjei götran troa lepi ö, tro ni a amamai angatr la ngönetrei i ö ka pë iut, nge tro angatr a goeën la ngönetrei i ö ka cile xöe.

38 “‘Tro hë ni a axulun koi ö la pun hna hnëkën kowe la itre föe ka nyixetë, nge ka aneni madra. Eje hi, tro hë ni a anenine la madra i ö hnei elëhni me zalu. 39 Tro ni a nue eö kowe la ime i angatr; tro hë angatr a thëtrije la itre gaa draië hnei ö hna xup, me apatren la itre hnë hmi gaa hmitrötre i ö. Tro angatr a thapa la itre iheetre i ö, me itre nyine thaip ka mingöminge i ö, nge tro pë hë eö a pë iut me cile xöe. 40 Tro angatr a ce traqa memine la ka ala nyim troa lepi ö. Tro angatr a tranyi ö hnei etë, me humuthi ö hnei taua. 41 Tro angatr a manithetrije la itre uma i ö, me eatrën la hna amekötin göi ö qëmeken la itre föe ka ala nyim. Tro hë ni a nyipun la huliwa ne föe ne gojenyi ö, nge tha tro hmaca kö eö a nyithupei angatr. 42 Tro ha lapa kötr la elëhninge koi ö, nge tha tro hmaca kö ni a wesitr. Haawe, tro ha uqa la hning, nge tha tro hmaca kö ni a drenge la akötr.’

43 “‘Thëthëhmine hë eö lo eö a nekö jajiny, nge hnei ö hna jele la trengehning hnene la nöjei huliwa i ö asë. Celë hi matre, tro hë ni a kuca matre tro eö a xeni pun la aqane ujë i ö,’ öni Iehova Joxu Ka Sisitria, ‘nge tro hë eö e cili a nuetrije la itre thiina i ö ka sis, me itre huliwa i ö hna methinën.

44 “‘Dreng! Tro asë hi la itre ka majemin qeje edromë, a qeje eö me hape: “Hnaiji thin!” 45 Eö hnyawa hi la hnaiji thine i ö, lo ka methinëne la föi eahlo me ha nekö i eahlo. Nge ceitui ö hnyawa hi me itre mama i ö, lo itre ka methinëne la itre föi angatr me ha nekö i angatr. Föe ne Heth la thine i ö, nge atre Amora la keme i ö.’”

46 “‘Samaria la mama i ö, lo ka lapa e kolopi* memine la itre nekö i angeice jajiny*; nge Sodroma la jini i ö, lo ka lapa e kolojë* memine la itre nekö i angeice jajiny. 47 Maine nyipici laka, hnei ö hna nyitipu angatr me xome la itre thiina i angatr ka sis, ngo ngöne hi la hnepe ijin, hna ngazo catre hmaca kö la aqane ujë i ö hui angatr. 48 Matre eni a sisinyi ngöne la meleng,’ öni Iehova Joxu Ka Sisitria, ‘tha hnei Sodroma kö jini i ö me ha nekö i angeic, hna hane kuca tui ö me itre nekö i ö jajiny. 49 Haawe dreng! Hane hi la ngazo i Sodroma jini i ö: hnei angeic me itre nekö i angeice jajinyi hna pi tru, nge ka tiqa catr hnei a i angatr, nge ka tingetinge la mele i angatr. Ame pe, tha hnei angatre kö hna xatuane la itre ka akötr, nge ka mel ngöne la pë. 50 Hnei angatr pala hi hna pi mama, me kuca catrën la itre huliwa ka sis qëmekeng. Celë hi matre, hnenge hna mekun troa apatrenyi angatr.

51 “‘Nge goi ame fe Samaria, tha traqa ju kö angeic kowe la sine la itre ngazo i ö. Tru catre ju kö la itre huliwa ka sis hnei ö hna kuca hui nyidro, matre kösë meköt hmaca ju kö nyidro pine la aqane sisi catre la itre huliwa i ö. 52 Haawe, ijine hë troa ahmahmanyi ö, ke hnei ö hna apujen la ngazo* ne la lue trejin me eö. Meköti hë nyidro, ke sisi pala ha la aqane ujë i ö hui nyidro. Matre enehila, loi e tro eö a meci hnei hmahma, ke zö i ö matre meköti hë la lue trejin me eö.’

53 “‘Nge tro ni a acasine la itre hna akalabusin thei Sodroma me itre nekö i angeice jajiny, me itre hna akalabusin thei Samaria me itre nekö i angeice jajiny. Tro fe ni a ce amë la itre hna akalabusin thei ö me thei angatr, 54 matre troa thaipië eö. Nge tro hë eö a hmahma pine eö aupunyi angatr. 55 Tro hmaca Sodroma jini i ö me itre nekö i angeice jajiny, a tune lo aqane i angatr ekö. Nge tro hmaca Samaria mama i ö me itre nekö i angeice jajiny, a tune lo aqane i angatr ekö. Nge tro hmaca eö me itre nekö i ö jajiny, a tune lo aqane i epun ekö. 56 Ame lo ijin eö a pi tru, ke tha hane kö eö pi qeje Sodroma jini i ö, 57 ke tha mama pala kö la iakötrë i ö. Ngo enehila, kolo ha qaqa eö hnene la itre nekö jajinyi ne Suria, me itre ka lapa ezin, nge kolo ha wangangazonyi ö hnene la itre nekö jajinyi ne Filisiti, me itre ka lapa ezin. 58 Tro hë eö a xeni pune la aqane ujë i ö ka sis, me itre huliwa i ö hna methinën,’ öni Iehova.”

59 “Ke hane hi la hna qaja hnei Iehova Joxu Ka Sisitria: ‘Tro hë ni a kuca koi ö tune hnyawa hi lo hnei ö hna kuca, ke tha hnei ö kö hna metrötrën la hna sisiny, ngöne lo eö a apëne la isisinyikeung. 60 Ngo tha tro kö ni a thëthëhmine lo isisinyikeu i nyiso, lo eö pala kö a jajiny, nge tro hë ni a acil la ketre isisinyikeu ka epine palua me eö. 61 Tro hmaca eö a mekune lo aqane ujë i ö, nge tro hë eö a hmahma la eö a troa kapa la itre trejin me eö, ene la itre mama i ö me itre jini i ö. Tro ni a hamë angatr nyine nekö i ö, ngo tha hnene kö la isisinyikeu i ö.’

62 “‘Eje hi, tro ni a acil la isisinyikeung me eö, nge tro hë eö a atre e cili laka, Iehova ni. 63 Ame hë la eni a troa nue* la ngazo i ö, ngacama ngazo catr la thiina i ö, tro hmaca ha eö a mekun me hmahma troa fe la që i ö pine la aqane thaipië eö,’ öni Iehova Joxu Ka Sisitria.”