Deuteronomi

12 “Hane hi la itre hna amekötin me itre wathebo, nyine tro epuni a trongën e nöjei drai ne mele epun, ngöne la nöj hnei Iehova Akötresi ne la itre qaaqaa i epun, hna troa hamën nyine zi i epun. 2 Ame ngöne la itre nöj hnei epuni hna troa thapa, ke qa i epun troa apatrene la nöjei götran asë hnei angatr hna nyihluene la itre haze i angatr, ngöne ju hë la itre wetre ka draië, maine ngöne la itre sasala, maine fene la itre sinöe ka cia lolo. 3 Qa i epuni troa apatrene la itre ita ne huuje i angatr, me thëtrije la itre ikapa ka hmitrötre i angatr, me dreuthetrije la itre ipoto ka hmitrötre i angatr, me akeine la itre haze i angatr hna tratraun. Qa i epuni fe troa apatrenetrij la ëjene la itre haze i angatr qa ngöne la götrane cili.

4 “Tha tro kö epuni a nyihlue i Iehova Akötresi epun, tune la aqane nyihluene la itre nöj la itre haze i angatr. 5 Ngo qa i epuni pe troa nyihlue i Iehova Akötresi epun ngöne la götran hnei nyidrëti hna troa iën qa ngöne la itre tribu, matre acile la ëje i nyidrë, memine la götran hnei nyidrëti hna lapa ngön. 6 E cili hi la hnei epuni hna troa traqa fë la itre huuj ne dreuth asë,* me itre huuj, me itre pane wen,* me itre ahnahna, me itre huuj hnei epun hna sisinyi fë, me itre huuj hna tro fë xanën, me itre pane nekön hna hnahon hnene la itre öni ka tru me itre öni ka co i epun. 7 Tro hë epun me itre fami* i epuni a xeni e cili, qëmekei Iehova Akötresi epun, me madrin ngöne la nöjei huliwa i epun, ke hnei Iehova Akötresi epun hna amanathithi epun.

8 “Tha tro kö epuni a kuca tune la aqane kuca huni enehila ngöne la götrane ce, la kola isa kuci mekun,* 9 ke tha lö pala kö epun ngöne la hnë mano, me ngöne la götran hnei Iehova Akötresi epun hna troa hamën nyine zi i epun. 10 Ngo ame hë la epuni a ase sasaithe la Ioridrano, me lapane la nöj hnei Iehova Akötresi epun hna troa hamën nyine zi i epun, ke tro hë nyidrëti a thue hnë mano i epun nyipine la itre ithupëjia me epun, nge tro hë epuni a mele tingeting. 11 Ngöne la götran hnei Iehova Akötresi epun hna iën troa acile la ëje i nyidrë, ke qa i epun troa traqa fë asë la hnenge hna upi epun troa traqa fë: ene la itre huuje ne dreuth asë, me itre huuj, me itre pane wen, me itre ahnahna, me nöjei huuj hnei epuni hna sisinyi fë koi Iehova. 12 Tro epuni a madrin qëmekei Iehova Akötresi epun, epun me itre nekö i epun trahmany me jajiny, me itre hlue i epun (trahmany me föe), me angetre Levi ka lapa ngöne la itre traone* i epun, ke pëkö götran me edrö i angatr thei epun. 13 Tha tro pi kö epuni a huujëne menun la itre huuj ne dreuth asë i epun, ngöne la nöjei götran hnei epuni hna ajan. 14 Tro hmekuje hi epun a huujëne la itre huuje ne dreuth asë, ngöne la götrane hnei Iehova hna iën, ngöne la ketre tribu i epun. E cili hmekuje hi la tro epuni a kuca asë la hnenge hna upi epun.

15 “Ngo e pi öni mitre mina epun, ijiji epuni hi troa humuthe la ketre öni, matre öni ngöne la itre traone i epun, thenge la manathith hnei Iehova Akötresi epun hna troa hamën. Ijije hi troa öni hnene la atr ka pui ngazo memine la atr ka pui loi, tune la kola öni la ketre drube. 16 Ngo tha tro pi kö epuni a öni la madra; tro epuni pe a neng e kuhu hnadro tune la tim. 17 Tha tro kö epuni a xen ngöne la itre traone i epun, la hna 10 ne la itre wene feja i epun, memine la waina i epun ka hnyipixe, me oel, memine la itre pane öni hna hnahon hnene la itre öni ka tru me itre öni ka co i epun, memine fe la itre huuj hnei epuni hna sisinyi fë, me itre huuj hnei epuni hna tro fë xanën, me itre ahnahna i epun. 18 Ngo tro pe epuni a xeni itre ej qëmekei Iehova Akötresi epun, ngöne la götran hnei Iehova Akötresi epun hna troa iën, epun me itre nekö i epun trahmany me jajiny, me itre hlue i epun (trahmany me föe), me angetre Levi ka lapane la itre traone i epun; nge tro epuni a madrin qëmekei Iehova Akötresi epun, ngöne la nöjei huliwa hnei epuni hna troa kuca. 19 Ngöne la nöjei ijin ne mele epuni ngöne la nöj, the wangacone kö la angetre Levi.

20 “Ame hë la Iehova Akötresi ö a atrune la zi i ö, tune lo hnei nyidrëti hna sisiny, nge e tro eö a qaja ka hape: ‘Eni a pi öni mitr’, ke eö a pi öni, ijiji ö hi troa öni e nöjei ijin eö a ajan. 21 Maine ka iananyi ö memine la götran hnei Iehova Akötresi ö hna iën troa acil la ëje i nyidrë, ke qa i ö troa humuthe la itre öni qa ngöne la itre öni ka tru me itre öni ka co i ö, lo hnei Iehova hna hamëne koi ö, tune lo hnenge hna ahnithe koi ö. Nge tro hë eö a öni itre ej ngöne la itre traone i ö e nöjei ijin eö a ajan. 22 Ijiji ö troa öni itre ej tune la kola öni la drube; ijije hi troa öni hnene la atr ka pui ngazo, memine la atr ka pui loi. 23 Ngo ame pe, loi e xeci e kuhu hni i ö laka, tha tro kö eö a öni madra, ke ame la madra, ke celë hi mel. Tha tro pi kö eö a ce öni la mitr memine la mele ne ej. 24 Tha tro kö eö a öni la madra. Ngo tro pe eö a neng e kuhu hnadro tune la tim. 25 Tha tro kö eö a öni madra, matre tro loi la mele i ö me itre nekö i ö, ke eö a kuca la ka loi qëmekei Iehova. 26 Ame hë la eö a traqa ngöne la götran hnei Iehova hna iën, tro hmekuje hi ö a traqa fë la itre ewekë ka hmitrötr, me itre huuje i ö hna sisinyi fë. 27 Qa i ö troa huujëne la itre huuje ne dreuth asë i ö, ene la ijön me madra, hune la ita ne huuje i Iehova Akötresi ö. Tro fe eö a neng la madra ne la itre xaa huuje i ö, fene la ita ne huuje i Iehova Akötresi ö. Ngo ame pë hë la mitr, ke ijiji ö hi troa öni.

28 “Thupëne kö troa drengethenge la itre trengewekë cili hnenge hna ahnithe koi ö, matre troa tro loi la mele i ö me itre nekö i ö, ke eö a kuca la ka loi me meköt qëmekei Iehova Akötresi ö.

29 “Ame hë la Iehova Akötresi ö a ase apatrene la itre nöj hnei ö hna troa thapa, nge tro eö a lapane la nöje i angatr, 30 thupëne kö wanga tra thethi ö pi thupene la kola apatrenyi angatr qëmekei ö. The hnyingë pengöi angatre kö göne la itre haze i angatr ka hape: ‘Tune kaa la aqane nyihluene la itre nöj la itre haze i angatr? Me eni fe, eni a hane pi tui angatr.’ 31 The tro kö eö a nyihlue i Iehova Akötresi ö tune lai, ke itre nöje cili a kuca kowe la itre haze i angatr, la itre ewekë hna sisin me hna methinën hnei Iehova. Goi dreuthe fe angatr la itre nekö i angatr trahmany me jajiny, kowe la itre haze i angatr. 32 Qa i ö troa trongën asë la nöjei ewekë hnenge hna amekötin koi ö. Nge tha tro kö eö a nyixan, maine xometrij la ketre sin.