Levitiko
17 Öni Iehova hmaca jë hi koi Mose: 2 “Hape jë koi Arona me itre nekö i angeic, me kowe la angetre Isaraela asë: ‘Hane hi la hnei Iehova hna amekötin:
3 “‘“Maine hnene la ketre trahmany ne Isaraela hna humuth la kau, maine neköi mamoe trahmany, maine nani föe ngöne la lapa, maine tröne la lapa, 4 nge maine tha hna tro fë kö la öni ngöne la hnë lö ne la itat ne icasikeu, nyine huuj koi Iehova qëmekene la uma maano i Iehova, ke tro ha upe zö angeic hnene la hna anenin la madra. Nge tro ha apatrenyi* angeic qa ngöne la nöje i angeic. 5 Celë hi matre, ame lo itre huuj hnei angatr hna huujën uti hë enehila ngöne la hlapa, tro hë la angetre Isaraela a tro fë koi Iehova, ngöne la hnë lö ne la itat ne icasikeu kowe la atre huuj. Nge qa i angatr troa huujën itre ej nyine huuj ne tingeting koi Iehova. 6 Nge qa ne la atre huuj troa thathane la ita ne huuje i Iehova hnene la madra ne la itre öni, ngöne la hnë lö ne la itat ne icasikeu. Nge qa i angeic troa huhajine la giris nyine pui loi koi Iehova. 7 Celë hi matre, tha tro hmaca kö angatr a tro fë la itre huuj kowe la itre haze ka ceitu memine la itre nani trahmany,* lo hnei angatr hna nyihluen me kuci ngazo memin. Celë hi wathebo ka epine palua kowe la nöjei xötre atr thei epun.”’
8 “Nge tro eö a qaja koi angatr ka hape: ‘Ame la atre Isaraela maine ketre trenyiwa ka lapa thei epun, nge ka huujëne la huuje ne dreuth asë maine ketre huuj pena, 9 nge tha tro fë kö ej ngöne la hnë lö ne la itat ne icasikeu matre huujëne koi Iehova, tro ha apatrenyi angeic qa ngöne la nöje i angeic.
10 “‘Nge maine tro la atre Isaraela maine ketre trenyiwa ka lapa thei epun, a öni la nöjei pengöne madra, tro hë ni a nuetrije la atre cili ka öni madra, nge tro hë ni a apatrenyi angeic qa ngöne la nöje i angeic. 11 Ke ame la mele ne la ngönetrei, ej e hnine la madra. Nge hnenge hna hamën ej thatraqai epun ngöne la ita ne huuj, matre kuca tune lo hna majemin, ene la huuj ne ialoinekeun, ke hnene la mel ka ej e hnine la madra, matre kola nue la itre ngazo. 12 Celë hi matre, hnenge hna qaja kowe la angetre Isaraela ka hape: “The tro kö la ketre e epun, me ketre trenyiwa ka lapa thei epun a öni la madra.”
13 “‘Nge maine tro la atre Isaraela maine ketre trenyiwa ka lapa thei epun, a ea la ketre öni maine waco nyine öni, tro hë angeic a anenine la madra, me kelem ej hnei dro. 14 Ke ame la mele ne la nöjei ngönetrei, ke madra, matre ame la mel, ej e hnine la madra. Celë hi matre, qaja jë ni kowe la angetre Isaraela ka hape: “The tro kö la ketre e epun a öni la madra ne la nöjei ka mel, ke mele ne la nöjei ngönetrei asë la madra. Nge ame la atre öni la madra, ke tro ha apatrenyi angeic.” 15 Nge maine tro la atre Isaraela maine ketre trenyiwa, a öhn me öni la ketre öni ka mec, maine ketre öni hna heje thaitrën hnene la ketre öni wael, qa i angeic troa wasine la itre iheetre i angeic, me si ngöne la tim, nge tro hë angeic a pui ngazo uti hë e hej. Thupene lai, tro hë angeic a pui loi. 16 Ngo maine tha wasine kö angeic la itre iheetre i angeic me si,* tro hë angeic a xeni pune la ngazo i angeic.’”